កាលពីថ្ងៃទី២២ ខែតុលា ឆ្នាំ២០១៩ មន្ទីរកសិកម្ម រុក្ខាប្រមាញ់ និងនេសាទ បានប្រកាសជូនដំណឹងដល់សាធារណជនមេត្តាជ្រាបថា ៖ ដោយមានសេក្ដីរាយការណ៍ពីករណីកាប់ដើមឈើនៅវត្តអធ្វា ស្ថិតក្នុងភូមិក្រសាំងរលើង សង្កាត់សៀមរាប ក្រុងសៀមរាប ខេត្តសៀមរាប នៅថ្ងៃអង្គារ ទី១៥ ខែតុលា ឆ្នាំ២០១៩ វេលាម៉ោង២២ និង២៦នាទី កម្លាំងនគរបាលប្រឆាំងបទល្មើសសេដ្ឋកិច្ច សហការជាមួយខណ្ឌរដ្ឋបាលព្រៃឈើសៀមរាប និងអាជ្ញាធរពាក់ព័ន្ធ បានចុះត្រួតពិនិត្យជាក់ស្ដែង ដែលមានទីតាំងដូចបានជម្រាបជូនខាងលើ សមត្ថកិច្ចបានប្រទះឃើញឈើអាររួច ប្រភេទឈើទាលចំនួន ៤៦សន្លឹក និងឈើមូលចំនួន ០២ កំណាត់ ។
ដោយពេលវេលាយប់ជ្រៅ និងទីតាំងកើតហេតុក្រៅបរិវេណវត្តពុំមានអ្នកទទួលខុសត្រូវ សមត្ថកិច្ចសម្រេចដឹកជញ្ជូនវត្ថុតាងមករក្សាទុកជាបណ្តោះអាសន្ន នៅផ្នែករដ្ឋបាលព្រៃឈើបន្ទាយស្រី ភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប ។
តាមការស្រាវជ្រាវរបស់សមត្ថកិច្ចនៅទីតាំងជាក់ស្តែង ព្រះសង្ឃព្រះនាម ភ្លឿន រ័ត្ន ព្រះគ្រូសូត្រស្តាំ តំណាងព្រះចៅអធិការវត្ត មានសង្ឃដីកាថា ការកាប់ដើមឈើទាល ០១ ដើមនេះ ដោយសារដើមឈើនេះត្រូវរន្ទះបាញ់ ចាប់ផ្តើមងាប់ និងមានមែកឈើមួយចំនួនបាក់ធ្លាក់មកដី អាចបង្កគ្រោះថ្នាក់ជាយថាហេតុ ប៉ុន្តែគណៈកម្មការអាចារ្យវត្ត ពុំបានជូនដំណឹងទៅអាជ្ញាធរមូលដ្ឋាន និងសមត្ថកិច្ចពាក់ព័ន្ធ ។
ព័ត៌មានជាតិ ថ្មីៗ
ដោយពិនិត្យឃើញថា វត្តកំពុងសាងសង់កុដិ និងដោយមានការស្នើសុំបិណ្ឌបាតពីព្រះសង្ឃ និង គណៈកម្មការអាចារ្យវត្ត សមត្ថកិច្ចបានសម្រេចប្រគេនឈើទៅព្រះសង្ឃវិញ និងបានចូលបច្ច័យសាងសង់កុដិចំនួនមួយលានរៀល ។
អាស្រ័យហេតុនេះ សូមសាធារណជនមេត្តាជ្រាបជាសេចក្តីបំភ្លឺ តាមការគួរ៕
អត្ថបទ និង រូបថត ៖ រដ្ឋបាលខេត្តសៀមរាប
