នៅថ្ងៃទី២២ ខែតុលា ឆ្នាំ២០១៩ ថ្នាក់ដឹកនាំមន្ទីរ និងមន្ត្រីពាណិជ្ជកម្មខេត្តសៀមរាប ចូលរួមសហការជាមួយមន្ត្រីសាខាកាំកុងត្រូលខេត្តសៀមរាប មន្ត្រីនគរបាលខេត្តសៀមរាប និងគណៈកម្មការផ្សារ បានចុះត្រួតពិនិត្យ និងផ្សព្វផ្សាយអំពីគុណភាព សុវត្ថិភាពម្ហូបអាហារ ដែលមានដាក់តាំងលក់នៅក្នុងផ្សារសម្ដេចតេជោរដើមក្រឡាញ់ ដែលមានទីតាំងនៅភូមិត្រពាំងសេះ សង្កាត់គោកចក និងផ្សារទឹកវិល ស្ថិតនៅភូមិទឹកវិល សង្កាត់ទឹកវិល ក្រុងសៀមរាប ខេត្តសៀមរាប។
មានប្រសាសន៏នាឪកាសនោះ លោក ព្រៅ ខេមរិទ្ធ ប្រធានសាខាកាំកុងត្រូលខេត្តសៀមរាប បានឲ្យដឹងថា គោលបំណងដែលក្រុមការងារចុះមកពិនិត្យនៅពេលនេះ គឺក្នុងគោលដៅទទួលខុសត្រូវរបស់សាខាកាំកុងត្រូលខេត្ត ដោយផ្ដោតសំខាន់លើសុវត្ថិភាពចំណីអាហារ ដោយបញ្ហានេះ វាជាចំណែកមួយដ៏ធំ ដើម្បីសុខុមាលភាពប្រជាពលរដ្ឋ ក្នុងដំណើរឆ្ពោះទៅរកការអភិវឌ្ឍជាតិដែរ ។
លោក ព្រៅ ខេមរិទ្ធ បានឲ្យដឹងទៀតថា ដោយឡែកក្នុងសកម្មភាពនាឱកាសនេះ មន្ត្រីជំនាញ បានធ្វើតេស្តបឋម ដើម្បីរកសារធាតុគីមីហាមឃាត់មួយចំនួន ទៅលើផលិតផលម្ហូបអាហារដែលដាក់លក់ក្នុងផ្សារនោះបានចំនួន ៩គំរូ មានដូចជា៖ បង្គាថៃ ប្រហិតសាច់គោ ខ្ញីហ៊ាន់ មីលឿង សរសៃលោត គុយទាវបាញ់កាញ់ សណ្ដែកបណ្ដុះ ស្ពៃជ្រក់ និងអំបិល។ ជាមួយគ្នានោះ មន្ត្រីជំនាញ បានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។
ព័ត៌មានជាតិ ថ្មីៗ
លោក ព្រៅ ខេមរិទ្ធ មានប្រសាសន៍បន្តថា ជាលទ្ធផលសម្រាប់ថ្ងៃនេះដែរ មន្ត្រីជំនាញបានរកឃើញទំនិញ និងម្ហូប ចំណីអាហារដែលខូចគុណភាព និងហួសសុពលភាពប្រើប្រាស់មួយចំនួនរួមមាន ប្រហិតស៊ីភីរ៉ូស ចំនួន៦០០០ក្រាម ហតដកសាច់មាន់ ចំនួន២០០០ក្រាម ហតដករស់ជាតិឈិស ចំនួន៣០០០ក្រាម សរុបចំនួនទាំងអស់ស្មើ១១គីឡូក្រាមត្រូវបានមន្ត្រីជំនាញកាំកុងត្រូលធ្វើកំណត់ហេតុដកហូតយកទៅកំទេចចោលភ្លាមៗផងដែរ។
ក្នុងឱកាសនោះដែរ លោក ព្រៅ ខេមរិទ្ធ បញ្ជាក់បន្ថែមថា ក្នុងការចុះត្រួតពិនិត្យសុវត្ថិភាពចំណីអាហារ និងផលិតផលប្រើប្រាស់ផ្សេងៗ ពុំត្រូវបានកំណត់កាលវេលាណាមួយត្រូវបញ្ចប់នោះក៏ដោយ តែការវាយតម្លៃអំពីស្ថានភាពប្រសើរឡើង នៃការដាក់តាំងលក់ផលិតផលចំណីអាហារ និងផលិតផលប្រើប្រាស់ផ្សេងៗនៅតាមផ្សារទំនើបនានាក្នុងក្រុងសៀមរាបនឹងមានទំនួលខុសត្រូវខ្ពស់ តាមការណែនាំរបស់មន្ត្រីជំនាញត្រួតពិនិត្យ ។ ហើយក្នុងនោះដែរ សូមឲ្យបងប្អូនអាជីវករយើងទាំងអស់ ត្រូវចូលរួម យល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ទាំងអស់គ្នា ជៀសវាងការបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀត ៕
អត្ថបទ និង រូបភាព ៖ ស៊ាន សុផាត
កែសម្រួល៖ អ៊ុន ណារាជ្យ
