នារសៀលចុងសប្តាហ៍នេះ ឯកឧត្តមនាយឧត្តមសេនីយ៍ ទេសរដ្ឋមន្ត្រី គន់ គីម អនុប្រធានសមាគម និងជាអគ្គលេខាធិការសមាគមអតីតយុទ្ធជនកម្ពុជា បានជួបធ្វើការសំណេះសំណាលជាមួយប្រតិភូ សាខា សមាគមមិត្តភាព យោធភូមិភាគនិរតីវៀតណាម ប្រចាំរដ្ឋធានីហាណូយ (អង្គភាពទ័ពលេខ៣) ដឹកនាំដោយឯកឧត្តម ឧត្តមសេនីយ៍ទោ ង្វៀន គួកធឿក ប្រធានប្រតិភូសាខាសមាគមមិត្តភាព យោធភូមិភាគនិរតីវៀតណាម ប្រចាំរដ្ឋធានីហាណូយ នៃសាធារណរដ្ឋសង្គមនិយមវៀតណាម រួមនឹងសហការី នៅទីបញ្ជាការយោធភូមិភាគទី៤ ខេត្តសៀមរាប ។
ក្នុងកិច្ចស្វាគមន៍នោះដែរឯកឧត្តមនាយឧត្តមសេនីយ៍ ទេសរដ្ឋមន្ត្រី គន់ គីម បានលើកឡើងថា ដំណើរទស្សនកិច្ចនេះ គឺដើម្បីផ្លាស់ប្តូរនូវបទពិសោធន៍ពីគ្នាទៅវិញទៅមក លើការងារសមាគម អតីតយុទ្ធជន និង ការងារការពារជាតិ។
ឯកឧត្តមនាយឧត្តមសេនីយ៍ទេសរដ្ឋមន្ត្រី ក៏បានធ្វើការថ្លែងនូវអំណរគុណ ចំពោះរដ្ឋមន្ត្រីក្រសួងការពារជាតិវៀតណាម ដែលបានបង្កលក្ខណៈអនុគ្រោះ ដល់សមាគមអតីតយុទ្ធជនកម្ពុជា បានចូលទៅធ្វើការព្យាបាលជម្ងឺដោយឥតគិតថ្លៃនៅប្រទេសវៀតណាម ។
មានប្រសាសន៍នោះឯកឧត្តមឧត្តមសេនីយ៍ទោ ង្វៀន គួកធឿក ក៏បានបង្ហាញនូវក្តីរំភើប បន្ទាប់ពីបានមកដល់ប្រទេសកម្ពុជា សំខាន់ខេត្តសៀមរាប បានឃើញការរីកចម្រើនយ៉ាងឆាប់រហ័ស បើប្រៀបធៀបទៅនឹងអតីតកាល៣៩ឆ្នាំមុន ដែល ឯកឧត្តមជាសាក្ស៉ីរស់មួយរូប ដែលបានចូលរួមក្នុងជួរកងទ័ពស្ម័គ្រចិត្តវៀតណាម ដើម្បីរំដោះប្រទេសជាតិ និងប្រជាជនកម្ពុជាពីរបប ប៉ុល ពត រហូតទទួលបានជោគជ័យនាថ្ងៃជ័យជន្នះ៧ មករា១៩៧៩ ។
ឯកឧត្តមបន្តថា ឥឡូវកម្ពុជាបានក្លាយជាកន្លែងអភិវឌ្ឍន៍ឥតឈប់ឈរ ជីវភាពប្រជាជនសម្បូរធូរធារ និងបានក្លាយជាប្រទេសជាតិមួយស្មើមុខស្មើមាត់ជាមួយបណ្តាប្រទេសអភិវឌ្ឍន៍ផងដែរ។ ម្យ៉ាងទៀត សូមឲ្យកងទ័ពនិងប្រជាជននៃប្រទេសទាំងពីរ បន្តកិច្ចសហការគ្នាឲ្យកាន់រឹងមាំថែមទៀត ក្នុងន័យបម្រើឲ្យផលប្រយោជន៍រួម ដើម្បីជ្រោងទង់កសាងជាតិឲ្យកាន់តែអភិវឌ្ឍន៍ខ្លាំងក្លា ស្មើភាពគ្នាជាមួយប្រទេសក្នុងតំបន់ និង នៅលើពិភពលោក ។
នាឱកាសនោះ ឯកឧត្តមនាយឧត្តមសេនីយ៍ ទេសរដ្ឋមន្ត្រី គន់ គី បានថ្លែងអំណរគុណ ចំពោះដំណើរទស្សនកិច្ចរបស់សមាគមអតីតយុទ្ធជនវៀតណាមនាពេលនេះ បានផ្តល់ នូវបទពិសោធន៍ល្អៗ និង បានបង្ហាញពីវីរៈភាពរបស់កងទ័ពទាំងពីរ ដើម្បីជាបទពិសោធន៍សម្រាប់វីរៈយុទ្ធជនជំនាន់ ក្រោយ បន្តវេនដឹកនាំក្នុងកងយោធពលខេមរភូមិន្ទ៍ ព្រមទាំងពង្រឹងចំណងមិត្តភាព ឲ្យមានភាពរឹងមាំដល់កងទ័ពកម្ពុជា ដើម្បីបុព្វហេតុ កសាងការពារសុខសន្តិភាពនៅកម្ពុជា ។
ម្យ៉ាងទៀតដំណើរទស្សនកិច្ចនេះ ក៏បានធ្វើឲ្យសមាគមអតីតយុទ្ធជន កម្ពុជា ទទួលបានបទពិសោធន៍ ក្នុងការដឹកនាំសមាគម ធានាបានការទ្រទ្រង់ដល់អតីតយុទ្ធជន និងមានកិច្ចអភិវឌ្ឍន៍ គ្រួសារអតីតយុទ្ធជនកម្ពុជា។
