សមាជិកសភា និងជាអតីតរដ្ឋមន្ដ្រីក្រសួងការបរទេសរបស់ប្រទេសជប៉ុន ដែលជាប្រទេសផ្ដល់ជំនួយយ៉ាងច្រើនដល់មជ្ឍមណ្ឌលកំចាត់មីនកម្ពុជា ហៅកាត់ថាស៊ីម៉ាក់ CMAC លោកកាស៊ូណូរី តានណាកា KAZUNORI TANAKA បានមកទស្សនៈកិច្ចនៅសារមន្ទីរសន្ដិភាពសកម្មភាពកំចាត់មីន នៅខេត្ដសៀមរាប ដើម្បីស្វែងយល់ពីគ្រាប់យុទ្ធភ័ណ្ឌមិនផ្ទុះនៅកម្ពុជាបន្ថែមទៀត។
ឯកឧត្ដម ហេង រតនា នាយកមជ្ឍមណ្ឌលសកម្មភាពកំចាត់មីននៅកម្ពុជា បានមានប្រសាសន៍ក្រោយពីទស្សនកិច្ច កាលពីល្ងាចថ្ងៃទី២១ខែតុលានេះថា ដំណើរទស្សនកិច្ចសមាជិកសភាប្រទេសជប៉ុននេះ ក្នុងគោលបំណងស្វែងយល់ពីសំណល់ជាតិផ្ទុះសល់ពីសង្គ្រាមអោយកាន់តែច្បាស់បន្ថែមទៀត ដើម្បីផ្ដល់ថវិកាសម្រាប់ជួយដោះស្រាយប្រទេសកម្ពុជាអោយមានសន្ដិសុខ សុវត្ថិភាព និងរួចផុតពីវិបត្ដិមីននៅកម្ពុជា។
ឯកឧត្ដមបានបន្ដទៀតថា ក្នុងនាមជាប្រទេសរដ្ឋភាគី ប្រទេសជប៉ុន ប្ដេជ្ញានឹងជួយដល់ប្រទេសកម្ពុជាបន្ថែមទៀតទៅលើវិស័យមីននៅកម្ពុជា ដែលពេលបច្ចុប្បន្ននេះ ប្រទេសទាំងពីរ កំពុងសិក្សាគម្រោងចំនួន៤គម្រោង រួមមានគម្រោងបោសសំអាតមីននៅក្នុងខេត្ដបាត់ដំបង ដែលមានទឹកប្រាក់ជិត២០លានដុល្លា ក្នុងរយៈពេលបីឆ្នាំ គម្រោងទី២ការអភិវឌ្ឍន៍ក្រោយបោសសំអាតមីនរួច ការជួយដល់ជនពិការ គម្រោងទី៣នៅខេត្ដបន្ទាយជ័យ និងទី៤ខេត្ដកំពង់ធំ។ ការសិក្សាគម្រោងនេះ ដើម្បីងាយស្រួលស្នើរសុំអោយរដ្ឋាភិបាលប្រទេសជប៉ុនបន្ដជួយកម្ពុជាបន្ថែមទៀត ។
ឯកឧត្ដម ហេង រតនា បានបន្ថែមទៀតថា គ្រាប់មីនភាគច្រើនមានច្រើននៅតាមបណ្ដាស្រុក រវាងប្រទេសកម្ពុជា និងថៃ ដោយសារនៅទីនោះ មានសង្គ្រាមស៊ីវិល តស៊ូដោយប្រដាប់អាវុធរ៉ាំរ៉ៃ។ ចំណែកគ្រប់បែកទម្លាក់ពីលើយន្ដហោះមាននៅសល់ច្រើននៅភាគខាងកើត ដូចជាខេត្ដរតនគីរី មណ្ឌលគីរី ស្វាយរៀង ព្រៃវែង ជាដើម ខណៈគ្រាប់បែកដៃមាននៅគ្រប់ទីកន្លែង។
ឯកឧត្ដមបានបន្ថែមទៀតថា តំណាងរាស្ដ្រប្រទេសជប៉ុន សន្យានឹងចូលរួមជាមួយកម្ពុជា នឹងធ្វើយ៉ាងណាអោយប្រទេសកម្ពុជាមានសន្ដិភាព សុវត្ថិភាពលើបញ្ហាគ្រាប់យុទ្ធភណ្ឌមិនទាន់ផ្ទុះនេះ ហើយជប៉ុនក៍បានសម្ដែងការកោតសរសើរចំពោះប្រទេសកម្ពុជា ដែលបានខិតខំដោះស្រាយលើវិបត្ដិនេះ បានច្រើនគួរអោយកត់សំគាល់ ។
បើតាមអគ្គនាយកស៊ីម៉ាក់ដដែល បានអោយដឹងថា រយៈពេល២៥ឆ្នាំនេះ កម្ពុជាសម្រេចបាននូវការបោសសំអាតផ្ទៃដីមីន បានចំនួនជាង១០០០គីឡូម៉ែត្រក្រឡា និងបានបំផ្លាញចោលនូវគ្រាប់មីន និងយុទ្ធភ័ណ្ឌមិនទាន់ផ្ទុះមានចំនួនជាង២លាន៧សែនគ្រាប់ ដែលបញ្ជាក់ថា នេះជាភាពជោគជ័យដ៍ធំធេង ដែលបានជួយសង្គ្រោះដល់ពលរដ្ឋកម្ពុជា ដែលប្រឈមនឹងគ្រោះថ្នាក់នេះ។ ជាមួយគ្នានោះ កម្ពុជាគ្រោងនឹងមានផែនការបោសសំអាតមីនអោយបានជាង១២០០គីឡូម៉ែត្រក្រឡាដល់ឆ្នាំ២០២៥ នៅលើផ្ទៃដីដែលនៅសល់៦០% ព្រោះបច្ចុប្បន្ន បច្ចេកវិទ្យា និងចំណេះដឹង នៅប្រទេសកម្ពុជាកាន់តែរីកចំរើនលើវិស័យកំចាត់មីន៕
អត្ថបទ: លោក ជា ស្រស់
កែសម្រួល: លោក សេង ផល្លី
