លោក មាន់ ផានិត មន្ត្រីបច្ចេកទេសរបស់នាយកដ្ឋានគ្រប់គ្រងទឹកនៃអាជ្ញាធរជាតិអប្សរា បានឱ្យដឹងថា អាជ្ញាធរជាតិអប្សរាបានធ្វើការជួសជុលតួទំនប់បារាយណ៍ទឹកថ្លា នៅជ្រុងខាងត្បូង ប៉ែកខាងលិច ស្ថិតនៅភូមិប្រឡាយ ឃុំខ្នាត ស្រុកពួក ប្រវែង១.៦៤០ម៉ែត្រ ដែលរងការខូចខាតដោយសារអាយុកាល ទឹករលក និងការហូរច្រោះដោយទឹកភ្លៀងជាដើម ហើយការងារនេះ អនុវត្តន៍ដោយក្រុមហ៊ុនរាជសីហ៍ ស្ថិតនៅក្រោមការពិនិត្យជាប្រចាំ ដោយក្រុមការងារបច្ចេកទេសរបស់អជ្ញាធរជាតិអប្សរា ក្នុងបំណងអភិរក្សនិងថែរក្សាបារាយណ៍ទឹកថ្លាឱ្យមាំទាំជាងមុននិងស្ថិតនៅគង់វង្សយូរអង្វែង។
លោកមាន់ ផានិត បានបញ្ជាក់ទៀតថា គម្រោងនៃការជួសជុលនេះ មានរយៈពេល៦ខែ គិតចាប់ពីថ្ងៃ២៦ ខែកក្កដា ឆ្នាំ២០១៨ រហូតដល់ថ្ងៃទី២៦ ខែមករា ឆ្នាំ២០១៩ ហើយចំពោះការអនុម័តយល់ព្រមឱ្យប្រើប្រាស់គ្រឿងចក្រក្នុងការជួសជុលពង្រឹងទំនប់បុរាណនេះ ក្រុមអ្នកបុរាណវិទ្យានៃអាជ្ញាធរជាតិអប្សរា ក៏បានធ្វើកំណាយ ដើម្បីសិក្សាបន្ថែមអំពីវិធីសាស្ត្របង្ហាប់ដីបុរាណ រចនាសម្ពន្ធ និងប្រភេទដីទំនប់ដើម្បីធានាថា ការជួសជុលនេះមិនប៉ះពាល់ដល់បុរាណដ្ឋាន និងធានាគុណភាពយូរអង្វែង ខណៈកន្លងមក អាជ្ញាធរជាតិអប្សរា បានយកចិត្តទុកដាក់អភិរក្ស និងជួសជុលតួទំនប់បារាយណ៍ទឹកថ្លា ជាច្រើនដំណាក់កាលមកហើយ ។
សូមបញ្ជាក់ថា បារាយណ៍ទឹកថ្លា មានទំហំធំជាងគេក្នុងចំណោមបារាយណ៍ទាំងបួននៅក្នុងតំបន់សៀមរាប-អង្គរ ដែលស្ថិតនៅខាងលិចក្រុងអង្គរធំ មានទទឹងប្រវែង២.២០០ម៉ែត្រ និងបណ្តោយប្រវែង៨.០០០ម៉ែត្រ អាចរក្សាទឹករហូតដល់៥៦លានម៉ែត្រគូប ដែលមានសារៈសំខាន់ខ្លាំងណាស់ សម្រាប់ផ្គត់ផ្គង់ទឹកស្រោចស្រពស្រែ និងដំណាំផ្សេងៗជាងមួយម៉ឺនហិកតា ព្រមទាំងបញ្ជៀសបញ្ហាទឹកជំនន់ក្នុងតំបន់សៀមរាប-អង្គរ , ជាប្រភពផ្គត់ផ្គង់ទឹកសម្រាប់ផលិតទឹកស្អាត ក្នុងក្រុងសៀមរាប ទំហំ១៨.០០០ម៉ែត្រគូបក្នុងមួយថ្ងៃ ជាពិសេសទឹកបារាយណ៍ បានចូលទៅបំពេញទឹកក្រោមដីឱ្យរក្សាបាននូវតុល្យភាព និងរក្សាលំនឹងគ្រឹះប្រាសា ទឱ្យមានភាពរឹងមាំ រួមទាំងបានទាក់ទាញភ្ញៀវទេសចរណ៍តាមរយៈសេវាជិះទូកកំសាន្ត ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#បារាយណ៍ទឹកថ្លា
