លោកវរសេនីយ៍ឯក មិន ចន្ថា អធិការនគរបាលស្រុកប្រាសាទបាគង បានឲ្យដឹងថា កាលពីវេលាម៉ោង០៧និង៣០នាទី ថ្ងៃទី២២ ខែតុលា ឆ្នាំ២០១៨នេះ បន្ទាប់ពីទទួលបានសេចក្តីរាយការណ៍ថា មានមនុស្សស្លាប់អណ្តែតទឹកស្ថិតនៅក្នុងភូមិឪឡោក ឃុំបាគង លោកបានបញ្ជាកម្លាំងនគរបាលជំនាញផ្នែកព្រហ្មទណ្ឌ និងកម្លាំងប៉ុស្តិ៍នគរបាលរដ្ឋបាលបាគង ចុះទៅដល់កន្លែងសាកសព ដែលស្ថិតនៅត្រង់ចំណុចទឹកទក្សិណក្នុងភូមិឪឡោក ដើម្បីធ្វើការពិនិត្យលើសាកសព ហើយបានកត់សម្គាល់សាកសពមានឈ្មោះ ហ៊ុល គឹមសាន្ត ភេទប្រុស អាយុ២៦ឆ្នាំ មានទីលំនៅភូមិឪឡោក ឃុំបាគង និង សាកសព ពុំមានស្លាកស្នាមអ្វីដែលពាក់ព័ន្ធទៅ នឹងបទល្មើសព្រហ្មទណ្ឌឡើយ។
លោក មិន ចន្ថា បានឲ្យដឹងទៀតថា យោងតាមការបំភ្លឺរបស់ម្តាយជនរងគ្រោះបានបញ្ជាក់ថា សាកសពដែលត្រូវជាកូនរបស់គាត់ បានបាត់តាំងយប់ថ្ងៃទី២០ ខែតុលា ឆ្នាំ២០១៨មកម្លេះ ដោយមិនដឹងទៅណាទេ ហើយកូនគាត់តែងតែផឹកស្រាជាប្រចាំ និង មានរោគស្កន់ជាន់ រយៈពេលកន្លះខែម្តង ឬ១ខែម្តង ជួនកាលអត់ទៀងទាត់ ហើយនៅពេលផឹកស្រវឹងខ្លាំងអាចប្រកាច់ផងដែរ ខណៈអ្នកជិតខាងម្នាក់ឈ្មោះ ស៊ុយ សុខឃី ភេទស្រី អាយុ៤១ឆ្នាំ បានបំភ្លឺផងដែរថា នៅថ្ងៃទី២០ ខែតុលា ឆ្នាំ២០១៨ វេលាម៉ោង១៩ ឈ្មោះ ហ៊ុល គឹមសាន្ត បានដើរទៅផឹកផ្ទះគាត់រហូតដល់ម៉ោង២០និង៣០នាទី ទើបដើរមកផ្ទះវិញម្នាក់ឯង ។
ក្រោយពីត្រួតពិនិត្យ និងបានធ្វើកោសល្យវិច្ច័យនៅកន្លែងកើតហេតុឃើញថា មិនមានពាក់ព័ន្ធនិងរឿងឃាតកម្មទេ គឺពិតជាស្លាប់ដោយសារលង់ទឹកប្រាកដមែន ហើយសាកសពជនរងគ្រោះបានប្រគល់ជូនឪពុកម្តាយ និងក្រុមគ្រួសារយកទៅធ្វើបុណ្យតាមប្រពៃណី ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
