លោកស្រី អេង សាឡូត ទីប្រឹក្សាកម្មវិធីអភិវឌ្ឍសេដ្ឋកិច្ចតំបន់ GIZ រ៉េដហ្វ័រ បានឲ្យដឹងថា ក្នុងដំណើរកំសាន្ត ជាលើកទី២ ដែលបានទៅទស្សនា និងសិក្សាស្វែងយល់ពីសក្តានុពលទាក់ទាញទេសចរណ៍នៅខេត្តសៀមរាប ដូចជា កសិដ្ឋានដំណាំសរីរាង្គ មជ្ឈមណ្ឌលអភិវឌ្ឍស្ត្រី វិទ្យាស្ថានវាយនភ័ណ្ឌសូត្រ ផ្ទះស្នាក់ សហគមន៍ទេសចរណ៍ចង្ក្រានរយ តំបន់ទេសចរណ៍បឹងទន្លេសាប ដែលមានយ៉ាងតិច ៦៥ទីតាំងនៅក្នុងក្រុងសៀមរាប , ស្រុកអង្គរធំ , ស្រុកវ៉ារិន , ស្រុកសូទ្រនិគម និងស្រុកប្រាសាទបាគង នោះ ត្រូវបានចាត់ទុកជាតំបន់ដែលមានសក្ដានុពល និងត្រូវជ្រើសរើសបង្កើតឲ្យសហគមន៍ទេសចរណ៍ ដើម្បីទាក់ទាញឲ្យភ្ញៀវគ្រប់ជាតិសាសន៍បានទស្សនាកម្សាន្ដ ក្រៅពីការទស្សនាប្រាសាទ ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឲ្យដឹងថា តំបន់ទេសចរណ៍ក្រៅពីប្រាសាទ ពិតជាមានសក្ដានុពលសម្រាប់ពង្រឹងវិស័យទេសចរណ៍នៅខេត្តសៀមរាប ហើយសមាគមនឹងចូលរួមប្រែក្លាយតំបន់ទាំងនោះឲ្យក្លាយជាផលិតផលទេសចរណ៍ ដែលអាចអូសទាញឲ្យភ្ញៀវស្នាក់នៅយូរ និងទម្លាក់ការចំនាយលុយឲ្យបានច្រើននៅខេត្តសៀមរាប ដូច្នេះ តាមរយៈនេះ សំណូមពរដល់អាជ្ញាធរនិងអង្គភាពស្ថាប័នពាក់ព័ន្ឋ ជួយបណ្តុះបណ្តាលដល់អ្នកនៅក្នុងសហគម ឱ្យចេះផលិតចំណីអាហារ និងរបៀបបដិសណ្ឋារកិច្ច ដើម្បីផ្តល់ឱកាសដល់ពួកគាត់ទាញយកចំណូលពីការចំណាយរបស់ភ្ញៀវ ដូចជាការជម្រុញឲ្យសមាជិកសហគមន៍កែច្នៃវត្ថុអនុស្សាវរីយ៍ដោយប្រើប្រាស់វត្ថុធាតុដើមពីព្រៃសហគមន៍ ដាំបន្លែ ផ្លែឈើ ចិញ្ចឹមសត្វ បង្កើតផ្ទះស្នាក់សម្រាប់ភ្ញៀវ ជាដើម ។ល ។
សូមបញ្ជាក់ថា កាលពីពេលថ្មីៗកន្លងមកនេះ អង្គការ GIZ សហការជាមួយមន្ទីរទេសចរណ៍ និងអាជ្ញាធរខេត្តសៀមរាប បានរៀបចំកម្មវិធីដំណើរកម្សាន្ដសាកល្បង ( សៀមរាបក្រៅពីប្រាសាទ )នៅតាមសហគមន៍គោលដៅទេសចរណ៍មួយចំនួនក្នុងខេត្តសៀមរាប ដោយមានអ្នកចូលរួមមកពីវិស័យឯកជន ក្រុមហ៊ុនភ្នាក់ងារទេសចរណ៍ ប្រតិបត្តិករទេសចរណ៍ អ្នកគ្រប់គ្រងសណ្ឋាគារ ជាច្រើន ដើម្បីឱ្យពួកគាត់ចាប់យកឱកាសរៀបចំជាកញ្ចប់ទស្សនាចរ នៅតាមសហគមន៍ទេសចរណ៍ធម្មជាតិនានានៅក្នុងខេត្តសៀមរាប ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ទេសចរណ៍ក្រៅពីប្រាសាទ
