រដ្ឋមន្ត្រីហិរញ្ញវត្ថុកូរ៉េខាងត្បូង បានឱ្យដឹងថាទីក្រុងសេអ៊ូលនឹងមិនស្វែងរកការលើកលែង ឬការអនុគ្រោះពិសេស ពីអង្គការពាណិជ្ជកម្មពិភពលោក (WTO) នៅក្នុងកិច្ចចរចានាពេលអនាគតដ៏ខ្លីខាងមុខ ទៀតនោះទេ បន្ទាប់ពីទទួលរងការរិះគន់ពីលោក ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី២៥ ខែតុលា ឆ្នាំ២០១៩។
ប្រធានាធិបតីអាមេរិក លោក ដូណាល់ ត្រាំ កាលពីខែកក្កដា កន្លងទៅ បានដាក់សម្ពាធឱ្យអង្គការ WTO លុបចោលនូវការអនុគ្រោះពិសេសផ្នែកពាណិជ្ជកម្មដល់បណ្តាប្រទេសមួយចំនួនដូចជា ចិន កូរ៉េខាងត្បូង សិង្ហបុរី ព្រមទាំងប្រទេសមួយចំនួនទៀត ដែលលោកអះអាងថា បច្ចុប្បន្នគឺជាប្រទេសអភិវឌ្ឍ ឬអ្នកមានទៅហើយ តែនៅតែពាក់ស្លាកប្រទេសកំពុងអភិវឌ្ឍ ដើម្បីកេងចំណេញក្នុងការធ្វើពាណិជ្ជកម្ម។
ជុំវិញបញ្ហានេះដែរ ថ្លែងក្នុងសន្និសីទសារព័ត៌មានដ៏ខ្លីមួយ នៅថ្ងៃសុក្រនេះ រដ្ឋមន្ត្រីហិរញ្ញវត្ថុកូរ៉េខាងត្បូង លោក Hong Nam-ki បានបញ្ជាក់ថាទីក្រុងសេអ៊ូល នឹងមិនស្វែងរកការអនុគ្រោះពិសេសក្នុងនាមជាប្រទេស កំពុងអភិវឌ្ឍនៅក្នុងកិច្ចចរចានៃអង្គការ WTO នៅពេលខាងមុខទៀតនោះទេ។ ហើយកូរ៉េខាងត្បូង ក៍មិនបានបោះបង់ចោលឋានៈជាប្រទេសកំពុងអភិវឌ្ឍឡើយ ពោលគឺគ្រាន់តែមិនស្វែងរកការអនុគ្រោះពិសេសពី WTO ប៉ុណ្ណោះ ។
គួរបញ្ជាក់ថា កូរ៉េខាងត្បូង ដែលជាប្រទេសមានសេដ្ឋកិច្ចធំជាងគេលំដាប់៤ នៅក្នុងតំបន់អាស៊ី បានរក្សាឋានៈ ជាប្រទេសកំពុងអភិវឌ្ឍក្នុងនាមជាសមាជិក WTO ចាប់តាំងពីអង្គការអន្តរជាតិមួយនេះបង្កើតឡើងនៅឆ្នាំ ១៩៩៥មកម្លេះ ៕
