ដោយយោងទៅតាមប្រព័ន្ធផ្សព្វផ្សាយបណ្តាញសង្គម Facebookក្នុងរយៈពេល១សប្តាហ៍មកនេះដែលធ្វើឲ្យប្រជាពលរដ្ឋមានការយល់ច្រឡំ និងធ្វើការរឹះគន់មកលើចំណាត់ការរបស់សមត្ថកិច្ច និងមន្ទីរជំនាញដែលបានចុះធ្វើការសម្របសម្រួលដោះស្រាយក្នុងករណីនេះ ហើយត្រូវបានឯកឧត្តមអភិបាលខេត្ត ធ្វើការប្រគេនឈើមួយដើមនេះជូនដល់វត្តអធ្វាទៅតាមការបិណ្ឌបាត្ររបស់គ្រូចៅអធិការវត្តអធ្វា ។ដើម្បីស្វែងរកនូវការពិត និងភាពយុត្តិធម៌ជូនដល់ ព្រះសង្ឃ គណៈកម្មការវត្តអធ្វា ដែលត្រូវបានទទួលការចោទប្រកាន់ថា ព្រះសង្ឃវត្តអធ្វា បានឃុបឃិតគ្នាកាប់ឈើជាច្រើនដើមនៅក្នុងវត្តស្ថិតក្នុងតំបន់អភិរក្សលួចលក់ទៅឲ្យឈ្មួញខុសច្បាប់ស្ថិតនៅភូមិក្រសាំងរលើងសង្កាត់សៀមរាប ក្រុង ខេត្តសៀមរាប ។
តាមការបញ្ជាក់របស់ព្រះសង្ឃវិសុទ្ធិញាណ បិយធម្មោ ភ្លឿន ដៃ ព្រះគ្រូសូត្រស្តាំ វត្តអធ្វា បានមានសង្ឃដិកាប្រាប់អ្នកសារព័ត៌មាន យើងកាលពីរសៀលថ្ងៃទី២៤ ខែតុលា ឆ្នាំ២០១៩នេះ បានឲ្យដឹងថា ដើម្បីបំពេញនូវតម្រូវការ នៃការខ្វះខាតក្នុងវត្ត ក្នុងការសាងសង់ សាលាកុដ្ឋិ ដែលមានប្រវែង៣០ម៉ែត្រ ទទឹង៨ ម៉ែត្រ ហើយដោយឃើញថា ឈើមួយដើមដែលគណៈកម្មការវត្តកាប់អារយកមកធ្វើ ដំបូលកុដ្ឋិនេះ គឺឈើមួយដើមនេះទទួលរងគ្រោះរន្ទះបាញ់ ហើយងាប់ជ្រុះស្លឹកទៅហើយនោះ ទើបបានសម្រេចធ្វើការកាប់ផ្តួលរំលំ ធ្វើការអារបានឈើខ្លះយកមកកុដ្ឋិ បើទុកបន្តទៀតក៏មានបញ្ហាផ្សេងៗកើតឡើងដល់ពុទ្ធបរិស័ទ ហើយបើទុកឲ្យទាំងស្រុងនោះ គឺ បានត្រឹមតែធ្វើអុសដុតតែប៉ុណ្ណោះ ។
ព្រះអង្គបានមានសង្ឃដិកាបន្តទៀតថា ក្រោយពីការផ្សព្វផ្សាយព័ត៌មានតាមបណ្តាញសង្គម Facebook ដែល បានចោទថាព្រះសង្ឃ និង គណៈកម្មការ បានឃុបឃិតគ្នាកាប់ឈើជាច្រើនដើមនៅ ក្នុងវត្ត ស្ថិតក្នុងតំបន់អភិរក្ស លួចលក់ទៅឲ្យឈ្មួញខុសច្បាប់ ហើយក៏ត្រូវបានកម្លាំងសមត្ថកិច្ច មន្ទីរជំនាញចុះមកធ្វើការត្រួតពិនិត្យ ឃើញថា ពិតជាបានកាប់ឈើនៅក្នុងវត្តអធ្វា តែវាបានផ្ទុយស្រឡះពីព័ត៌មានប្រព័ន្ធផ្សព្វផ្សាយបណ្តាញសង្គម Facebook ដែលបានចោទប្រកាន់ព្រះសង្ឃ ។ ក្នុងនោះព្រះអង្គក៏ ទទួលនូវកំហុសដែលព្រះអង្គពុំបានស្នើសុំទៅអាជ្ញាធរអប្សរា និង អាជ្ញាធរមូលដ្ឋាន តែក្រោយពីកម្លាំងសមត្ថកិច្ច មន្ទីរជំនាញបាន ដឹកយកទៅរក្សាទុកនៅរដ្ឋបាលព្រៃឈើហើយនេះ ព្រះអង្គក៏បានធ្វើការបិណ្ឌបាត្រឈើទាំងនោះ ពីឯកឧត្តមអភិបាលខេត្ត ហើយ ឯកឧត្តមក៏បានប្រគេនឈើទាំងនោះ ដើម្បីប្រើប្រាស់ជាសម្បត្តិក្នុងវត្តអធ្វា ទៅតាមតម្រូវការចាំបាច់របស់វត្ត ។
ព័ត៌មានជាតិ ថ្មីៗ
ក្នុងនោះដែរព្រះអង្គ ក៏បានធ្វើការថ្លែងអំណរគុណដល់ឯកឧត្តមអភិបាលខេត្ត កម្លាំងសមត្ថកិច្ច និងមន្ទីរជំនាញ ដែលបានស្វែងរកនូវភាពយុត្តិធម៌សម្រាប់ព្រះសង្ឃ គណៈកម្មការវត្ត និងបានប្រគេននូវឈើមួយដើមនេះវិញ ដើម្បីប្រើប្រាស់ជាសម្បត្តិវត្ត ព្រមទាំងស្វែងរកនូវភាពយុត្តិធម៌ ដល់ព្រះសង្ឃ គណៈកម្មការវត្ត ឲ្យបានជ្រះស្រឡះពីការមួលបង្កាច់ និង ព័ត៌មានបំភ្លើសពីការពិត ក្នុងការចោទប្រកាន់ថា ព្រះសង្ឃវត្តអធ្វា បានឃុបឃិតគ្នាកាប់ឈើជាច្រើនដើមនៅ ក្នុងវត្ត ស្ថិតក្នុងតំបន់អភិរក្ស លួចលក់ទៅឲ្យឈ្មួញខុសច្បាប់ទៀតផង ។
ព្រះអង្គ ក៏បានអំពាវនាវដល់គ្រប់បណ្តាញសង្គមFacebook មួយចំនួនមុននឹងធ្វើការផ្សព្វផ្សាយព័ត៌មានរបស់ខ្លួន ត្រូវក្តាប់ឲ្យបានព័ត៌មានគ្រប់ច្រកហក ដែលជាការធ្វើឲ្យប្រជាពលរដ្ឋ មានការយល់ច្រឡំ ព្រមទាំងធ្វើឲ្យប៉ះពាល់ ដល់ព្រះពុទ្ធសាសនាទៀតផង ៕
រូបភាព ៖ ម៉ី សុខារិទ្ធ , ខេង ឧត្តម
កែសម្រួល៖ អ៊ុន ណារាជ្យ
