នៅព្រឹកថ្ងៃទី២៥ ខែតុលា ឆ្នាំ ២០១៩នេះ ក្រុមការងារសាខាកាកបាក្រហមកម្ពុជាខេត្តសៀមរាប ដឹកនាំដោយ លោកស្រី សំ សាវ៉ាង មន្ត្រីគម្រោងសុវត្ថិភាពចរាចរណ៍សាខាកាកបាទក្រហមកម្ពុជាខេត្តសៀមរាប ដោយបានសហការជាមួយ យុវជនស្ម័គ្រចិត្តរបស់កាកបាទក្រហមកម្ពុជាខេត្តសរុប ចំនួន ២២ នាក់ ស្រី ១៦ នាក់ បានចុះផ្សព្វផ្សាយពីហានិភ័យនៃការបើកបរក្រោមឥទ្ធិពលគ្រឿងស្រវឹង និង មិនពាក់មួកសុវត្ថិភាព ដល់សិស្សានុសិស្សចំនួន ០៣វិទ្យាល័យ ក្រោមកិច្ចសហការ ពីក្រុមហ៊ុនcambodia Airprot រួមមានវិទ្យាល័យ ១០មករា ១៩៧៩ វិទ្យាល័យអង្គរ និង វិទ្យាល័យសម្ដេចឪ ក្នុងក្រុងសៀមរាប ដោយមានសិស្សានុសិស្សអ្នកចូលរួមទាំង៣វិទ្យល័យ សរុប ចំនួន ៣៧៦នាក់ ស្រី ២៦៤ នាក់ នៅក្នុងគោលបំណងចូលរួមកាត់បន្ថយអត្រាការស្លាប់ របួស ពិការដោយគ្រោះថ្នាក់ចរាចរណ៍ និងលើកកម្ពស់សិទ្ធជនពិការផងដែរ ។
លោកស្រី សំ សាវ៉ាង បានអោយដឹងថា បច្ចុប្បន្នគ្រោះថ្នាក់ចរាចរណ៍ គឺជាបញ្ហាប្រឈមយ៉ាងធំរបស់ប្រទេសកម្ពុជាវាបានសម្លាប់មនុស្សជារៀងរាល់ថ្ងៃធ្វើឱ្យបាត់បង់ធនធានមនុស្សបន្សល់ទុកនូវកុមារកំព្រាស្ត្រីមេម៉ាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គមជាតិ គឺបណ្តាលមកពីអ្នកប្រើប្រាស់ផ្លូវមិនគោរពច្បាប់ចរាចរណ៍បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាពនៅពេលធ្វើដំណើរ ។
ក្នុងនោះដែរលោកស្រី សំ សាវ៉ាង ក៏បានធ្វើការសំណូមពរដល់អ្នកបើកបរយានយន្តគ្រប់ប្រភេទពេលមកដល់ជិតសាលារៀនមន្ទីរពេទ្យ និងទីប្រជុំជននានា សូមមេត្តាបន្ថយល្បឿនផង ដើម្បីរួមគ្នាកាត់បន្ថយការស្លាប់ និងរបួសដោយសារគ្រោះថ្នាក់ចរាចរណ៍ព្រមទាំងបានជំរុញដល់សិស្សានុសិស្សដែលបានចូលរួម សូមជួយណែនាំដល់បងប្អូន មិត្តភក្តិ សមាជិ គ្រួសារ និងអ្នកជិតខាងឱ្យពួកគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឲ្យបានជាប់ជាប្រចាំពេលបើកបរ ទៅតាមល្បឿនកំណត់ គោរពស្លាកសញ្ញាតាមដងផ្លូវជាដើម ដើម្បីជៀសវាងការគ្រោះថ្នាក់ជាយថាហេតុណាមួយកើតឡើង ។
លោកស្រី បន្តថា ក្នុងឱកាសនោះដែរក្រុមការងារ ក៏បានធ្វើការបង្រៀនពាក់មួកសុវត្ថិភាព និងអប់រំ ផ្សព្វផ្សាយតាមថ្នាក់រៀនបានបង្រៀនពីរបៀបកុមារឆ្លងផ្លូវដោយសុវត្ថិភាព ហើយក៏បានចែកនូវខិតប័ណ្ណសុវត្ថិភាពចរាចរណ៍ ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ វិធីពាក់មួកសុវត្ថិភាពឲ្យបានត្រឹមត្រូវ ចែកខិតប័ណ្ណស្តីពីស្លាកសញ្ញាចរាចរណ៍សំខាន់ៗនៃសុវត្ថិភាព និងស្ទិកខ័រចំណាំងផ្លាតជនពិការ ដូចទៅនឹងពាក្យស្លោកលើកឡើងថា ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍ ៕
អត្ថបទ និង រូបភាព ៖ ខេង ឧត្តម
កែសម្រួល៖ អ៊ុន ណារាជ្យ
