នៅរសៀលថ្ងៃទី២៥ ខែតុលា ឆ្នាំ២០១៩ កម្លាំងសមត្ថកិច្ចចម្រុះខេត្តសៀមរាប បានដុតកម្ទេចសាច់ និងគ្រឿងក្នុងជ្រូកខូចគុណភាពនាំចូលពីប្រទេសថៃ ទម្ងន់១,៣៣០គីឡូក្រាម ស្ថិតនៅក្នុងស្ថានីយ៍កសិកម្មទឹកវិល ក្រុងសៀមរាប។
លោក ព្រំ វ៉ិច នាយការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឲ្យដឹងថា សាច់ចម្រុះសាច់ និងគ្រឿងក្នុងជ្រូកខូចគុណភាពទាំងអស់នេះ បានដឹកជញ្ជូនតាមរថយន្តមាកសាំយ៉ុងមួយគ្រឿង ឆ្លងកាត់តាមច្រកប៉ោយប៉ែត ខេត្តបន្ទាយមានជ័យ ឆ្ពោះទៅកាន់រាជធានីភ្នំពេញ។
លោក ព្រំ វ៉ិច បន្តថា លុះមកដល់ចំណុច ភូមិដូនទ្រ ឃុំល្វា ស្រុកពួក ខេត្តសៀមរាប នៅលើបណ្តោយផ្លូវជាតិលេខ៦ កម្លាំងសមត្ថកិច្ចចម្រុះខេត្តសៀមរាប បានធ្វើការឃាត់រថយន្តខាងលើមួយគ្រឿង និងអ្នកបើកបរម្នាក់ ឈ្មោះ ឆុង ចាន់ដា អាយុ៣៩ឆ្នាំ នៅវេលាម៉ោង០៥ល្ងាច ថ្ងៃទី២៤ ខែតុលា ឆ្នាំ២០១៩។ ក្នុងនោះសាច់ និងគ្រឿងក្នុងជ្រូកខូចគុណភាព ដែលបង្ក្រាបបានរួមមាន ៖ក្រពះ ជើង ត្រចៀក កន្ទុយ ពោះវៀនធំ អណ្តាត ខួរ ឆ្អឹងក និងឆ្អឹងជំនី ។
សូមជម្រាបថា ប្រតិបត្តិការនេះ មានចូលរួមសហការណ៍ពី លោកប្រធានមន្ទីរកសិកម្ម ស្នងការរងទទួលបន្ទុកផ្នែកសេដ្ឋកិច្ច ភ្នាក់ងារតំណាងការិយាល័យបង្ការ និងបង្ក្រាបបទល្មើសរត់ពន្ធ តំបន់៥ លោកប្រធាន និងអនុប្រធានការិយាល័យផលិតកម្ម និងបសុព្យាបាល ព្រមទាំងមន្ត្រីជំនាញការិយាល័យផលិតកម្ម និងបសុព្យាបាលខេត្តសៀមរាប។ ទន្ទឹមនោះដែរ អ្នកបើកបរត្រូវបានមន្ត្រីគយចល័តប្រចាំខេត្តសៀមរាប នាំយកទៅសាកសួរ និងចាត់ការតាមនីតិវិធីច្បាប់។
អត្ថបទ និង រូបភាព ៖ លោក ស៊ាន សុផាត
កែសម្រួល៖ លោក សេង ផល្លី
