ជនជាតិចិន ចំនួន៤នាក់ លួចបើកល្បែងស៊ីសងនៅលើប្រព័ន្ធអ៊ិនធើណិត (Online Gambling) ត្រូវបានកម្លាំងសមត្ថកិច្ច នៃការិយាល័យស៊ើបអង្កេតនិងអនុវត្តនីតិវិធី សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គុំ ចុះបង្ក្រាប ស្ថិតនៅចំនុចផ្ទះលេខ D២៧ បុរីអង្គរផាលេស ភូមិ គ្រួស សង្កាត់ ស្វាយដង្គំ ក្រុងសៀមរាប ថ្ងៃទី២៤ ខែតុលា ឆ្នាំ២០១៩ ។
លោកលោកវរសេនីយ៍ឯក តូច សុគន្ធ នាយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋានខេត្តសៀមរាប បានឲ្យដឹងថា ប្រតិបត្តិការនេះ ឃាត់ខ្លួនបានបុរសជនជាតិចិនចំនួន០៤នាក់ ជាមួយនិងលិខិតឆ្លងដែន៤ក្បាល ក្នុងនោះវត្ថុតាងដកហូតបាន មាន៖ ទូរសព្ទទំនើប ០៧គ្រឿង កុំព្យូទ័រ ០៦គ្រឿង និងវត្ថុតាងមួយចំនួនទៀត។
បន្ទាប់ពីកម្លាំងជំនាញ របស់ការិយាល័យស៊ើបអង្កេតនិងអនុវត្តនីតិវិធី រៀបចំកសាងសំណុំរឿងបញ្ជូនទៅសាលាដំបូងខេត្តសៀមរាប នៅរសៀលថ្ងៃទី២៥ ខែតុលា ឆ្នាំ២០១៩ ជនសង្ស័យទាំង០៤នាក់ និង វត្ថុតាង ត្រូវបានតំណាងអយ្យការ នៃសាលាដំបូងខេត្តសៀមរាប បញ្ជូនទៅដាក់ពន្ធនាគារ បណ្តោះអាសន្ន។
អត្ថបទ និង រូបភាព ៖ លោក ខេង ឧត្តម
កែសម្រួល៖ លោក សេង ផល្លី
