ព្រះគ្រូចៅអធិការ គណៈកម្មការវត្តនិងប្រជាពុទ្ឋបរិស័ទចំណុះជើងវត្តបារាយណ៍មហានទី រតនារាម ហៅវត្តស្វាយរមៀតបានរៀបចំពិធីប្រណាំងទូកលក្ខណៈប្រពៃណី៤ឆ្នាំជាប់ៗគ្នា ដោយពិនិត្យឃើញពីស្ថានភាពភូមិសាស្ត្រនៃវត្ត មានអំណោយផលល្អនៅក្បែរបារាយណ៍ទឹកផ្លានិងដោយសង្កេតឃើញសក្តានុពលវិស័យទេសចរណ៍កំពុងទទួលបានកំណើនភ្ញៀវទេសចរណ៍ជាតិនិងអន្តរជាតិកាន់តែកើនឡើងពីមួយឆ្នាំទៅមួយឆ្នាំ។
ព្រះតេជគុណ វិមុលសំវភទ្ទកោ នឿម វុឌ្ឍី ព្រះគ្រូចៅអធិការវត្ត មានថេរដីកាថា៖ រៀបចំការប្រណាំងទូកលក្ខណៈប្រពៃណី បានធ្វើឡើង៤ឆ្នាំជាបន្តបន្ទាប់មកហើយ ដើម្បីអបអរសាទរ អង្គកឋិនទានសាមគ្គីដែលបានដង្ហែចូលវត្តនេះផងនិង ដើម្បីញ៉ាំងទឹកចិត្តបងប្អូនប្រជាពលរដ្ឋរួមគ្នា អភិរក្សថែរក្សាប្រពៃណី ទំនៀមទំលាប់និងជួយលើកកំពស់វិស័យព្រះពុទ្ឋសាសនាឱ្យកាន់តែរីកចំរើនឡើងថែមទៀតផងដែរ។
មានព្រះថេរដិកាក្នុងពិធីបិទការប្រណាំងទូក កាលពីរាត្រីថ្ងៃទី២៧ខែតុលាឆ្នាំ២០១៩ ព្រះធម្មសេរី ជុំ គឹមឡេង ព្រះសុមង្គលសិលាចារ្យ អាភាករោ ព្រះមេគណខេត្ត បាន ចាត់ទុកការរៀបចំឱ្យមានពិធីប្រណាំងទូកនេះគឺស្របទៅតាមទំនៀមទំលាប់ ប្រពៃណីដូនតាខ្មែរដែលនិយមធ្វើតៗគ្នាមក និងជាសកម្មភាពមួយជួយចូលរួមលើកស្ទួយវិស័យព្រះពុទ្ឋសាសនារបស់យើងផងដែរ។ព្រះអង្គថា៖ កត្តាសំខាន់ គឺជួយអូសទាញអ្នកទេសចរណ៍ឱ្យចាប់ចិត្តដិតអារម្មណ៍ ស្របទៅតាមភូមិសាស្ត្រវត្តនេះ ទទួលបានសក្តានុពលទេសចរណ៍ពីធម្មជាតិនិងមរតកប្រាង្គប្រាសាទពីបុរាណ។
ព្រះអង្គបន្តថា៖អ្វីៗដែលអាចដំណើរការដោយរលូននិងប្រកបដោយភាពសប្បាយរីករាយរបស់យើងទាំងអស់គ្នានាពេលនេះ គឺកើតឡើងបានក៍អាស្រ័យដោយមានគោលការណ៍ដឹកនាំច្បាស់លាស់របស់អាជ្ញាធរខេត្ត ក្រសួងស្ថាប័នពាក់ពន្ឋ័និងរាជរដ្ឋាភិបាល និងមានការចូលរួមពីព្រះសង្ឃនិងប្រជាពុទ្ឋបរិស័ទ គួបផ្សំជាមួយស្ថានភាពបរិយាកាសសុខសុវត្ថិភាព សន្តិសុខ សណ្តាប់ធ្នាប់របៀបរៀបរយល្អ ក្រោមការដឹកនាំដ៍ឈ្លាសវៃនិងប៉ិនប្រសព្វ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទើប ញ៉ាំងឱ្យជីវភាពបងប្អូនប្រជាពលរដ្ឋរីកចំរើនឡើងពីមួយឆ្នាំទៅមួយឆ្នាំ ហើយព្រះសង្ឃនិងវត្តអារាមក៍ទទួលបានការរីកចម្រើនទៅតាមនោះដែរ ព្រោះវត្តអារាមនិងព្រះសង្ឃរីកចម្រើនទៅបានអាស្រ័យដោយជីវភាពប្រជាពុទ្ឋបរិស័ទចំណុះជើងវត្តមានជីភាពសំបូរធូធារ ក្រោមឆន្ទៈសាមគ្គីជាធ្លុងមួយ។
សូមបញ្ជាក់ថា៖វត្តស្វាយរមៀតបួនឆ្នាំជាប់គ្នាហើយ បានរៀបចំ កម្មវិធីការប្រណាំងទូកលក្ខណៈប្រពៃណីដែលកម្មវិធីនេះ ធ្វើឡើងក្នុងគោលបំណងរឹតចំណងបង្កើនសាមគ្គីភាពរវាងវត្តអារាមនិងពុទ្ឋបរិស័ទ រក្សាប្រពៃណីទំនៀមទំលាប់របស់ខ្មែរ និងក៍គឺដើម្បីញ៉ាំងអង្គកឋិនសាមគ្គីឱ្យរឹងរឹតតែអឹកធិក និងជាពិសេសដើម្បីរំលឹកនឹកគុណដល់កងទ័ពជើងទឹកដែលបានទទួលជោគជ័យលើខ្មាំងសត្រូវឈ្លានពានមកលើទឹកដីខ្មែរ។ កម្មវិធីនេះរៀបចំដោយកិច្ចសហការរវាងព្រះគ្រូចៅអធិការ ព្រះសង្ឃ និងគណៈកម្មការអាចារ្យក្នុងវត្តទាំងអស់ ព្រមទាំងទទួលបានការគាំទ្រចូលរួមពីប្រជាពុទ្ឋបរិស័ទ អាជ្ញាធរមូលដ្ឋា ប្រជាការពារក្នុងសង្កាត់ នគរបាលប៉ុស្តិ៍ អាជ្ញាធរអប្សរានិងអាជ្ញាធរខេត្តផងដែរ ក្រោមការចូលរួមឧបត្ថម្ភគាំទ្រថវិកាពីសប្បុរជនជាពាណិជ្ជករ អាជីវករ និងប្រជាពលរដ្ឋជាច្រើនទៀត។
ពិធីប្រណាំងមានរយៈពេល២ថ្ងៃចាប់ពីថ្ងៃទី២៦ដល់ថ្ងៃទី២៧ខែតុលាឆ្នាំ២០១៩ មានទូកចូលរួម១២ គូរ ទូកនីមួយៗចំណុះ៦នាក់ ចានដែក៥គូ។លទ្ឋផលនៅវគ្គផ្តាច់ព្រ័ត្ត ទូកលេខ១ ទទួលបានពាន១និងថវិកា៦០ម៉ឺនរៀលបូករួមទាំងថវិកាទទួលបានពីសប្បុរសជនផង ជាង១លាន លេខ២បាន ពាន១និងថវិកា៥០ម៉ឺនរៀល បានពីសប្បុរសផងសរុបជិត៨០ម៉ឺនរៀល លេខ៣បាន ពាន១និង៤០ម៉ឺនរៀល បូកទាំងការទទួលបានពីសប្បុរសជនផងបានជាង៧០ម៉ឺនរៀល។ ចំណែកទូកចំនួន២១ទូកទៀត ដែលពុំទទួលចំណាត់ថ្នាក់ទទួលបានថវិកាក្នុងមួយទូក២០ម៉ឺនរៀលស្មើៗគ្នា។
អត្ថបទ និង រូបភាព ៖ លោក យូ វង្ស លោក បូ សាវី លោក ម៉ី សុខារិទ្ធ
