ឯកឧត្តម ហោ សារុន អនុរដ្ឋលេខាធិការក្រសួងទេសចរណ៍ បានថ្លែងប្រាប់អ្នកសាព័ត៌មាន នៅច្រកទ្វារព្រំដែនអន្តរជាតិអូស្មាច់ កាលពីល្ងាចថ្ងៃទី២៦ ខែតុលា ឆ្នាំ២០១៩ចុងសប្តាហ៍កន្លងទៅនេះ បន្ទាប់ពីបានបញ្ចប់ ការដឹកនាំប្រតិភូប្រតិបត្តិករទេសចរណ៍ខេត្តសៀមរាប បំពេញទស្សនកិច្ចឆ្លងដែនដោយរថយន្តផ្ទាល់ខ្លួន ( Tourism Caravan Road Show Siem Reap-Thailand ) ដើម្បីផ្សព្វផ្សាយសក្តានុពលទេសចរណ៍កម្ពុជា ទៅកាន់បណ្តាខេត្តចំនួន៣ ( ប្រាជិនបូរី នគររាជសីមា និងខេត្តបូរូរ៉ាំ ) នៃប្រទេសថៃ ជាប់ព្រំដែនកម្ពុជា ដោយរំពឹងថា ភ្ញៀវទេសចរថៃ នឹងចូលមកទស្សនាកម្ពុជា ជាពិសេសគោលដៅអង្គរសៀមរាប នឹងមានការកើនឡើង ។
–
ឯកឧត្តមបន្តឲ្យដឹងថា ៖ នៅក្នុងកម្មវិធីកម្សាន្តផ្សព្វផ្សាយសក្តានុពលទេសចរណ៍កម្ពុជាទៅប្រទេសថៃនេះ ក្លឹបសមាគមប្រតិបត្តិករទេសចរណ៍ខេត្តសៀមរាប បានចុះហត្ថលេខាលើអនុស្សរណៈនៃការយោគយល់គ្នា ( MOU ) ចំនួន២ គឺជាមួយសភាពាណិជ្ជកម្មខេត្តនគររាជសីមា និងជាមួយសភាពាណិជ្ជកម្មខេត្តបូរីរ៉ាំរបស់ថៃ ស្តីពីកិច្ចសហប្រតិបត្តិការទំនាក់ទំនង លើវិស័យទេសចរណ៍ និងពាណិជ្ជកម្ម ឱ្យកាន់តែមានភាពល្អប្រសើរឡើង ។
ខ្លឹមសារ MOU នោះ ទី១). ធ្វើឱ្យមានការរីកចម្រើន និងពង្រឹងសម្ព័ន្ធភាពលើវិស័ទេសចរណ៍ ប្រកបដោយភាពយោគយល់និងស្មើសិទ្ធិគ្នា ហើយក៏ដើម្បីរក្សានូវឧត្តមប្រយោជន៍ រវាងគ្នាទៅវិញទៅមក ។ ទី២). ភាគីទាំងពីរ នឹងផ្សព្វផ្សាយអំពីសក្ដានុពល នៃវិស័យទេសចរណ៍ប្រទេសជាតិរបស់ខ្លួន, ចូលរួមសិក្ខាសាលា, កិច្ចប្រជុំ, សន្និសីទ, ពិព័រណ៌, និងសកម្មភាពនានា ដែលពាក់ព័ន្ធនឹងវិស័យទេសចរណ៍នៃប្រទេសទាំងពីរ ។ ទី៣). ភាគីទាំងពីរ នឹងមានការគាំទ្រ លើកទឹកចិត្ត បង្ហាញមធ្យោបាយ ក្នុងការផ្លាស់ប្ដូរនៃដំណើរទស្សនកិច្ច និងគោលដៅទេសចរណ៍របស់ប្រទេសនីមួយៗ ដល់គ្នាទៅវិញទៅមក ។ ទី៤). ជួយសម្របសម្រួល និងរៀបចំនូវឯកសាររដ្ឋបាល និងឯកសារពាក់ព័ន្ធនានា ក្នុងការធ្វើដំណើរឆ្លងដែន និងឯកសារពាក់ព័ន្ធទៅនឹងវិស័យទេសចរណ៍ ដល់គ្នាទៅវិញទៅមក ។ ទី៥). នឹងមានការផ្លាស់ប្ដូរ ចែករំលែកបទពិសោធន៍ ចំណេះដឹង ការប្រតិបត្តិល្អ និងនវានុវត្តន៍ រួមទាំងកម្មវិធីទស្សនកិច្ចសិក្សា ដែលពាក់ព័ន្ធនឹងវិស័យទេសចរណ៍ ដល់គ្នាទៅវិញទៅមក ។
ឯកឧត្តមបញ្ជាក់ថា នៅក្នុងដំណើរទស្សនកិច្ចនេះ កម្ពុជាទទួលបានបទពិសោធន៍ជាច្រើន ពាក់ព័ន្ធនឹងការឆ្លងដែនដោយប្រើប្រាស់រថយន្តផ្ទាល់ខ្លួន ក្នុងនោះក៏បានរកឃើញចំនុចខ្វះខាតមួយចំនួនផងដែរ ដែលនិងធ្វើការកែតម្រូវឱ្យបានកាន់តែប្រសើរឡើង ។
យ៉ាងណាក៏ដោយ ឯកឧត្តមបានសំណូមពរឲ្យវិស័យឯកជនក្នុងវិស័យទេសចរណ៍ សម្រួលតម្លៃកញ្ចប់ទស្សនាចរណ៍របស់ខ្លួនឡើងវិញ និងសំណូមពរដល់សមត្ថកិច្ចច្រកទ្វារព្រំដែនអន្តរជាតិទាំងអស់ បន្ថែមនូវការយកចិត្តទុកដាក់ ក្នុងស្មារតីសម្របសម្រួលឲ្យបានល្អ ដើម្បីលំហូរចេញចូលនៃភ្ញៀវទេសចរ កាន់តែបានច្រើន រលូន និងគ្មានឧបស័គ្គ ។
លោក ចាន់ សុភា អនុប្រធានសមាគមក្លិបប្រតិបត្តិករទេសចរណ៍សៀមរាប បានឲ្យដឹងថា ៖ ក្លឹបសមាគមប្រតិបត្តិករទេសចរណ៍សៀមរាប ត្រៀមខ្លួនជានិច្ចរង់ចាំស្វាគមន៍ភ្ញៀវទេសចរថៃ ហើយបន្ទាប់ជោគជ័យ នៃដំណើរកម្សាន្តដោយរថយន្តផ្ទាល់ខ្លួន ផ្សព្វផ្សាយសក្តានុពលទេសចរណ៍កម្ពុជាទៅប្រទេសថៃលើកទី១នេះ សមាគមក្លឹបប្រតិបត្តិករទេសចរណ៍សៀមរាប នឹងមានគម្រោងបន្ត រៀបចំកម្មវិធីដូចគ្នានេះ ( Siem Reap Caravan Tour ) ទៅប្រទេសជិតខាងផ្សេងទៀត គឺប្រទេសឡាវ និង វៀតណាម ៕
អត្ថបទ និង រូបថត ៖ លោក ងិន គឹមឡេង លោក យូ វង្ស
