នាព្រឹកថ្ងៃទី៣០ ខែតុលា ឆ្នាំ២០១៩ នេះ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សកម្ពុជា បានរៀបចំ ពិធីបើកកិច្ចប្រជុំពិគ្រោះយោបល់មន្ត្រីជាន់ខ្ពស់ កម្រិតបច្ចេកទេស នៃប្រទេសបញ្ជូនទាំងបី កម្ពុជា ឡាវ និងមីយ៉ាន់ម៉ា (CLM) ស្តីពី «តួនាទីប្រទេសបញ្ជូនក្នុងការការពារពលករទេសន្តរប្រវេសន៍» នៅសណ្ឋាគារសុខាល័យអង្គរ ខេត្តសៀមរាប ដែលកិច្ចប្រជុំនេះ មានរយៈពេល២ថ្ងៃ គឺពីថ្ងៃទី៣០ ដល់ថ្ងៃទី៣១ ខែតុលាឆ្នាំ២០១៩ ក្រោមអធិបតីភាពដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស កម្ពុជា ដោយមានការអញ្ជើញចូលរួមពីសំណាក់គណៈប្រតិភូនៃព្រះរាជាណាចក្រកម្ពុជា ដឹកនាំដោយលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស , គណៈប្រតិភូឡាវ ដឹកនាំដោយនាយនគរបាលជាន់ខ្ពស់បណ្ឌិត ផេងសាវ៉ាញ់ ធីផាវងសាយ អគ្គស្នងការរង នៃអគ្គនាយកដ្ឋាននគរបាល ប្រធានលេខាធិការដ្ឋានគណៈ កម្មាធិការជាតិប្រឆាំងការជួញដូរមនុស្ស ក្រសួងសន្តិសុខសាធារណៈឡាវ និង គណៈប្រតិភូមីយ៉ាន់ម៉ា ដឹកនាំដោយឯកឧត្តមឧត្តមសេនីយ៍ទោ អោង ធូ អនុរដ្ឋមន្ត្រី ក្រសួងមហាផ្ទៃ មីយ៉ាន់ម៉ា ព្រមទាំងមានតំណាងក្រសួងការបរទេសនៃព្រះរាជាណាចក្រកម្ពុជា , តំណាងស្ថានទូតមីយ៉ាន់ម៉ា , ស្ថានទូតឡាវ , អភិបាល អភិបាលរងខេត្តជាប់ព្រំដែនថៃ , កងកម្លាំងប្រដាប់អាវុធ , ដៃគូជាតិ និងអន្តរជាតិពាក់ព័ន្ធ ជាច្រើនរូប ។
លោកជំទាវ ជូ ប៊ុនអេង មានប្រសាសន៍ថា ៖ កិច្ចប្រជុំពិភាក្សានេះធ្វើឡើងក្នុងគោលបំណង ៖ ទី១. ស្វែងយល់អំពីស្ថានភាព និងទំនោរនៃទេសន្តរប្រវេសន៍បច្ចុប្បន្ន ដើម្បីរិះរកវិធានការ ក្នុងការលុបបំបាត់ការធ្វើទេសន្តរប្រវេសន៍មិនប្រក្រតី ការជួញដូរមនុស្ស និងរាល់ទម្រង់នៃអំពើកេងប្រវ័ញ្ចក្នុងវដ្តនៃទេសន្តរប្រវេសន៍ និងលើកកម្ពស់ ទេសន្តរប្រវេសន៍ដោយសុវត្ថិភាព រៀបរយ និងស្របច្បាប់ និង ទី២. កំណត់រកបញ្ហារួម និងផ្លាស់ប្តូរមេរៀនបទពិសោធន៍ល្អៗ ក្នុងការដោះស្រាយបញ្ហាទាំងនោះ តាមរយៈការពង្រឹងកិច្ចសហការក្នុងការឆ្លើយតបទៅនឹងការងារបង្ការទប់ស្កាត់ ការអនុវត្តច្បាប់ និងកិច្ចការពារជនរងគ្រោះ នៅក្នុងប្រទេសរៀងៗខ្លួន ក៏ដូចជាក្នុងប្រទេសគោលដៅ ។
ថ្លែងក្នុងឱកាសបើកកិច្ចប្រជុំនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជា ប្រធាន គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស មានប្រសាសន៍ថា ៖ ប្រទេសទាំងបី ជាប្រទេសជិតខាងគ្នា មានវប្បធម៌ប្រហាក់ប្រហែលគ្នា មានព្រំដែនជាប់ជាមួយប្រទេសថៃដូចគ្នា ហើយប្រជាពលរដ្ឋយើង ក៏បាននឹងកំពុងតែនាំគ្នាទៅធ្វើការក្នុងប្រទេសថៃ ទាំងស្របច្បាប់ និងមិនស្របច្បាប់យ៉ាងច្រើន ខណៈមួយចំនួន បាននឹងកំពុងប្រឈមនឹងបញ្ហាជាច្រើន ក្នុងដំណើរការទេសន្តរប្រវេសន៍ តាំងពីចាកចេញ នៅកន្លែងធ្វើការ រហូតដល់ពេលត្រឡប់មកវិញ បើទោះបីជាការធ្វើទេសន្តរប្រវេសន៍ គឺជាសិទ្ធិពលរដ្ឋ ក្នុងការជ្រើសរើសការងារ មុខរបរ និងទីកន្លែងរស់នៅ តែទន្ទឹមនឹងនោះ សិទ្ធិ ផលប្រយោជន៍ និងសេចក្តីថ្លៃថ្នូរក្នុងនាមជាមនុស្សរបស់ពលករក៏ត្រូវតែទទួលបាននូវការគោរព និងលើកកម្ពស់ផងដែរ ។
សម្តេចក្រឡាហោម ស ខេង មានប្រសាសន៍បន្ថែមថា ការធ្វើទេសន្តរប្រវេសន៍ គឺជាសិទ្ធិពលរដ្ឋ ក្នុងការជ្រើសរើសការងារ មុខរបរ និងទីកន្លែងរស់នៅ តែយើងក៏ត្រូវគិតអំពីសិទ្ធិ ផលប្រយោជន៍ និងសេចក្តីថ្លៃថ្នូរក្នុងនាមជាមនុស្សរបស់ពលករ ការគ្រប់គ្រង និងកិច្ចការពារពលរដ្ឋរបស់យើង ក្នុងនាមជាប្រទេសដែលមានអធិបតេយ្យភាព និងទំនាក់ទំនងល្អរវាងប្រទេសជិតខាង និងរវាងប្រទេសបញ្ជូន និងប្រទេសទទួលផងដែរ ដែលបញ្ហាទាំងនេះ គឺជាតួនាទីរបស់ប្រទេសយើងទាំងបី ដែលជាប្រទេសបញ្ជូន ចាំបាច់ត្រូវរួមសហការគ្នាក្នុងការដោះស្រាយបញ្ហារួម បើទោះបីជាប្រទេសនីមួយៗ មានរបៀបគ្រប់គ្រង បទដ្ឋាន និងនីតិវិធីក្នុងការអនុវត្តដោយឡែកៗពីគ្នាក៏ពិតមែន ប៉ុន្តែក៏មានទាំងចំណុចល្អ ទាំងចំណុចខ្វះខាត ដូច្នេះ ការពិភាក្សា ដើម្បីរិះរកស្តង់ដាអនុវត្តមួយ ដែលសមស្របសម្រាប់ប្រទេសទាំងបី គឺជាការចាំបាច់សម្រាប់ការលើកកម្ពស់សុវត្ថិភាព និងផលប្រយោជន៍ពលករ ក៏ដូចជាកាត់បន្ថយភាពរងគ្រោះក្នុងអំឡុងពេលនៃទេសន្តរប្រវេសន៍ និងផលប៉ះពាល់អវិជ្ជមានចំពោះពលករ គ្រួសារ និងសង្គមជាតិយើង ។
សម្តេចក្រឡាហោម ស ខេង មានប្រសាសន៍បន្ថែមទៀតថា មានកិច្ចការជាច្រើនដែលត្រូវធ្វើតាមប្រទេសរៀងៗខ្លួន តែក៏មានកិច្ចការខ្លះដែលទាមទារឲ្យមានកិច្ចសហការជាមួយគ្នា ដើម្បីផ្លាស់ប្តូរយោបល់ បទពិសោធន៍ សម្រាប់ការដោះស្រាយបញ្ហារួម និងមានចំណុចសេសសល់មួយចំនួនទៀត ដែលត្រូវលើកយកទៅពិភាក្សាជាមួយភាគីថៃ ដែលជាប្រទេសគោលដៅ ដើម្បីមានវិធានការរួមគ្នា រវាងប្រទេសបញ្ជូន និងប្រទេសទទួល ក្នុងកិច្ចការពារ សិទ្ធិមនុស្ស សិទ្ធិពលករ និងការបែងចែកផលប្រយោជន៍រវាងពលករ និងនិយោជិក និងការចែករំលែកការទទួលខុសត្រូវរវាងប្រទេសបញ្ជូន និងប្រទេសទទួល ដើម្បីលើកកម្ពស់ទេសន្តរប្រវេសន៍ដោយសុវត្ថិភាព រៀបរយ និងស្របច្បាប់ (Safe, Orderly and Regular Migration) ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
