នាព្រឹកថ្ងៃទី៣០ ខែតុលា ឆ្នាំ២០១៩នេះ គណ:កម្មាធិការជាតិសុវត្ថិភាពចរាចរណ៍ផ្លូវគោកខេត្តសៀមរាប បានបើកកិច្ចប្រជុំត្រួតពិនិត្យការអនុវត្តផែនការសកម្មភាពសុវត្ថិភាពចរាចរណ៍ផ្លូវគោគឆ្នាំ២០១៩ នៅរដ្ឋបាលសាលាខេត្តសៀមរាប ក្រោមការដឹកនាំរបស់ឯកឧត្តមនាយកឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ និងជាអនុប្រធានអចិន្ត្រៃយ៍អនុគណៈកម្មការទី២ នៃក្រុមការងារជំរុញអនុវត្តផែនការសកម្មភាពសុវត្ថិភាពចរាចរណ៍ផ្លូវគោក ។
តាមសេចក្តីរាយការណ៍របស់ក្រុមការងារលេខាធិការដ្ឋាននៃ អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានឲ្យដឹងថា មូលហេតុគ្រោះថ្នាក់ចរាចរណ៍ដែលតែងកើតឡើងនៅក្នុងខេត្ត ក៏ដូចជានៅក្នុងកម្ពុជាយើងទាំងមូល គឺបណ្តាលមកពីកំណើនយានយន្ត និងកត្តាសំខាន់ៗ ដូចជាការបើកបរហួសល្បឿនកំណត់ , បើកបរនៅក្រោមឥទ្ធិពលនៃគ្រឿងស្រវឹង ឬគ្រឿងញៀន , ការមិនគោរពសិទ្ធិអាទិភាពនៅកន្លែងផ្លូវប្រសព្វ , បើកជែងដោយខ្វះការប្រុងប្រយ័ត្ន , មិនគោរពសញ្ញាចរាចរណ៍ , ការបត់ឆ្វេង បត់ស្តាំ ឬបត់ត្រឡប់ក្រោយដោយគ្មានការប្រុងប្រយ័ត្ន ។
របាយការណ៍បានឲ្យដឹងបន្ថែមថា ចំពោះយានយន្តក៏ជាកត្តាមួយដែលនាំឲ្យមានគ្រោះថ្នាក់ដែរ ដូចជាពេលកំពុងបើកបរហ្វ្រាំងមិនស៊ី ឬបែកកង់ជាដើម ដូច្នេះចំណុចសុវត្ថិភាពរបស់យានយន្តមានបួនសំខាន់ៗគឺ ៖ ហ្វ្រាំង , ចង្កូត , កង់ និងភ្លើងបំភ្លឺ ខណៈផ្លូវក៏ជាកត្តានាំឲ្យមានគ្រោះថ្នាក់ចរាចរណ៍ផងដែរ ដូចជាផ្លូវកោងខ្លាំង , ផ្លូវធំរួមតូច , ផ្លូវសំបុកមាន់ , ផ្លូវដែលគ្មានបរិក្ខាសុវត្ថិភាពគ្រប់គ្រាន់ ដូចជា ៖ គ្មានផ្លាកសញ្ញា , គំនូសសញ្ញា , រនាំងសុវត្ថិភាព ឬរនាំងបែងចែកទ្រូងផ្លូវ ដែលនៅពេលកន្លងមក អនុគណៈកម្មាធិការសុវត្ថិភាពចរាចរណ៍ផ្លូវគោកខេត្ត បានធ្វើយុទ្ធនាការរឹតបន្តឹងតាមបណ្តាក្រុង ស្រុកមួយចំនួន ដោយមានការចែកជូននូវឯកសារពាក់ព័ន្ធនឹងច្បាប់ ស្តីពីចរាចរណ៍ផ្លូវគោកមួយចំនួន និងបានរៀបចំកម្មវិធីសំណួរ-ចម្លើយ ស្តីពីច្បាប់ចរាចរណ៍ផ្លូវគោកផងដែរ ។
ឯកឧត្តម នាយកឧត្តមសេនីយ៍ ហ៊ឹម យ៉ាន បានមានប្រសាសន៍ថា ដើម្បីពង្រឹងយន្តការដឹកនាំ និងគ្រប់គ្រងការងារសុវត្ថិភាពចរាចរណ៍នៅគ្រប់ថ្នាក់ គឺត្រូវអនុវត្តនូវវិធានការបន្ទាន់ក្នុងការបង្ការ និង ទប់ស្កាត់គ្រោះថ្នាក់ចរាចរណ៍ផ្លូវគោក ដោយយកចិត្តទុកដាក់អនុវត្តឲ្យមានប្រសិទ្ធភាព នូវវិធានការសំខាន់ៗទាំងបួនគឺ៖ ១. ការរឹតបន្ដឹងអនុវត្តច្បាប់ , ២. ការផ្សព្វផ្សាយអប់រំច្បាប់ និងបទដ្ឋានសុវត្ថិភាពចរាចរណ៍ផ្លូវគោក , ៣. ការរៀបចំផ្លូវថ្នល់ឲ្យមានសុវត្ថិភាពដល់ការធ្វើចរាចរណ៍ និង ៤. ការសិក្សាកែលម្អខ្លឹមសារច្បាប់ស្តីពីចរាចរណ៍ផ្លូវគោក ហើយត្រូវបែងចែកឲ្យបានច្បាស់លាស់ នូវសកម្មភាពដែលចាំបាច់ត្រូវអនុវត្តចំពោះមុខ និងសកម្មភាពដែលត្រូវអនុវត្តយូរអង្វែង ។
ឯកឧត្តមនាយកឧត្តមសេនីយ៍ ហ៊ឹម យ៉ាន បានមានប្រសាសន៍ណែនាំ និងផ្តាំផ្ញើដល់ក្រុមការងារលេខាធិការដ្ឋាននៃអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប គឺត្រូវជ្រើសរើសខ្លឹមសារ និងរូបភាពផ្សព្វផ្សាយជាសាធារណៈ តាមបណ្តាញព័ត៌មាន តាមវេទិកា ឬកម្មវិធីនានាឲ្យមានការទាក់ទាញអារម្មណ៍សាធារណជន និងចំគោលដៅនៃជនដែលងាយរងគ្រោះ , ត្រូវកសាងគ្រូបង្គោលឲ្យបានច្រើន ដើម្បីជួយធ្វើការផ្សព្វផ្សាយអប់រំចុះឲ្យដល់តាមរោងចក្រសហគ្រាសតាមសហគមន៍និងតាមខ្នងផ្ទះ , ជំរុញគ្រប់ក្រសួងស្ថាប័ន អង្គភាពរដ្ឋ ត្រូវយកចិត្តទុកដាក់ធ្វើការផ្សព្វផ្សាយអប់រំ ព្រមទាំងធ្វើការត្រួតពិនិត្យជាប់ជាប្រចាំ អំពីការគោរពច្បាប់ ឬអាចដាក់បញ្ចូលខ្លឹមសារច្បាប់ក្នុងបទបញ្ជាផ្ទៃក្នុង សំដៅលើកម្ពស់ស្មារតីគំរូក្នុងការគោរពច្បាប់របស់មន្ត្រីរាជការនិងកងកម្លាំងប្រដាប់អាវុធ ជាពិសេសត្រូវសហការជាមួយមន្ទីរអប់រំ យុវជន និងកីឡាខេត្ត ដើម្បីបង្កើនបន្ថែមកម្មវិធីសិក្សាច្បាប់ ស្តីពីចរាចរណ៍ផ្លូវគោកដល់សិស្ស និង ជំរុញឲ្យមានការចូលរួមពីគ្រប់សាលាក្នុងការត្រួតពិនិត្យណែនាំជម្រុញ សិស្សឲ្យគោរពច្បាប់ ស្តីពីចរាចរណ៍ផ្លូវគោកជាប្រចាំ ។
ឯកឧត្តមនាយកឧត្តមសេនីយ៍ ហ៊ឹម យ៉ាន បានណែនាំបន្ថែមឲ្យបង្កើនការប្រជុំជាមួយសមាគមដឹកជញ្ជូន និងប្រធានក្រុមហ៊ុនរថយន្តដឹកជញូនទំនិញ និងអ្នកដំណើរ ធ្វើការត្រួតពិនិត្យសុវត្ថិភាពចរាចរណ៍ និងដាក់ចេញវិធានការថ្មីៗ ក្នុងការជ្រើសរើស និងគ្រប់គ្រងអ្នកបើកបរ ការត្រួតពិនិត្យលក្ខណៈបច្ចេកទេស ការដឹកជញ្ជូនប្រកបដោយសុវត្ថិភាពនិងដោះស្រាយសំណូមពរនានា ពិសេសត្រូវជំរុញការងារប្រឡងប្រណាំង លើកសរសើរដល់ក្រុមហ៊ុនណាដែលបានទទួលជោគជ័យ ក្នុងការដឹកជញ្ជូនប្រកបដោយសុវត្ថិភាព និងធ្វើការព្រមាន ឬចាត់វិធានការនានា ចំពោះក្រុមហ៊ុនណាដែលបង្កគ្រោះចរាចរណ៍ច្រើនលើក ឬប្រព្រឹត្តល្មើសច្បាប់មិនរាងចាល ហើយត្រូវគៀងគរក្រុមហ៊ុនផលិតទំនិញនានា ឲ្យចូលរួមក្នុងការសុវត្ថិភាពចរាចរណ៍ផ្លូវគោក តាមរយៈការជ្រើសរើសរថយន្ត និងអ្នកបើកបរណា ដែលគោរពច្បាប់ចរាចរណ៍ ធានាសុវត្ថិភាពក្នុងការដឹកជញ្ជូនទំនិញរបស់ខ្លួនផងដែរ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
