កាលពីថ្ងៃទី៣០ ខែតុលា ឆ្នាំ២០១៩នេះ ឯកឧត្តមនាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីន បានអញ្ជើញជាអធិបតីក្នុងពិធីបើកអង្គវិបស្សនាការងាររបស់អគ្គលេខាធិការដ្ឋានអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ដោយមានអញ្ជើញចូលរួមពីតំណាងដៃគូអភិវឌ្ឍ ថ្នាក់ដឹកនាំ មន្ត្រីរាជការ បុគ្គលិកអាជ្ញាធរមីនទាំងអស់។អង្គវិបស្សនាការងារនេះ រៀបចំឡើងក្នុងគោលបំណងលើកកម្ពស់ប្រសិទ្ធភាពការងារ តាមរយ:ការបង្ហាញពីសមិទ្ធផលសម្រេចបាន ប្រឈមដែលបានជួបប្រទះ ដើម្បីរិះរកដំណោះស្រាយរួមគ្នា និងការកំណត់ទិសដៅការងារសម្រាប់អនុវត្តបន្ត។
មានប្រសាសន៍ក្នុងឱកាសនេះ ឯកឧត្តម សែម សុវណ្ណនី បាននាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និង ជាប្រធានអាជ្ញាធរមីនកម្ពុជា ព្រមទាំងថ្លែងអំណរគុណយ៉ាងស្មោះចំពោះថ្នាក់ដឹកនាំ មន្ត្រី បុគ្គលិក អាជ្ញាធរមីនទាំងអស់ ដែលបានប្រឹងប្រែងអស់កម្លាំងកាយ កម្លាំងចិត្ត រួមគ្នាបំពេញភារកិច្ច និងសម្រេចបាននូវស្នាដៃ និងសមិទ្ធផលការងារសំខាន់ៗជាច្រើននាពេលកន្លងមក ដើម្បីឈានទៅសម្រេចបាននូវផែនការសកម្មភាពយុទ្ធសាស្ត្រជាតិសកម្មភាពមីន ២០១៨-២០២៥។
ឯកឧត្តម សែម សុវណ្ណនី មានប្រសាសន៍បន្ថែមថា៖ វិបស្សនា គឺជាការប្រជុំការងារមួយ ដែលខុសពីការប្រជុំជាប្រពៃណីដែលយើងធ្វើនៅកន្លែងធ្វើការ ហើយមានលក្ខណៈមិនផ្លូវការ ដែលត្រូវហ៊ានផ្តល់ និងទទួលយោបល់ក្នុងន័យស្ថាបនាត្រង់ទៅត្រង់មកត្រួតពិនិត្យ និងវាយតម្លៃឡើងវិញនឹងរកឲ្យឃើញនូវបញ្ហាប្រឈម ចំណុចខ្វះខាត ចំណុចខ្លាំង និងចំណុចខ្សោយ លើការងារជាបុគ្គល និងតាមនាយកដ្ឋាននីមួយៗ ការងារស្ថាប័នទាំងមូល និង គម្រោងការនានាដែលបានអនុវត្តកន្លងមក រិះរកដំណោះស្រាយ និងវិធានការកែលំអឲ្យកាន់តែប្រសើរឡើង ព្រមទាំងទទួលបាននូវការយល់ដឹង ចំណេះដឹង និងការណែនាំបន្ថែម ដែលអាចជាទុនសម្រាប់អនុវត្តការងារឲ្យកាន់តែប្រសើរឡើងថែមទៀត ដើម្បីសម្រេចការងារតាមផែនការប្រចាំឆ្នាំ និងផែនការយុទ្ធសាស្ត្រជាតិសកម្មភាពមីន ស្របតាមគោលដៅចម្បងរបស់រាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ច និងកាត់បន្ថយភាពក្រីក្រ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
