នៅព្រឹកថ្ងៃទី៣០ ខែតុលា ឆ្នាំ២០១៩នេះ ព្រះសង្ឃនិងប្រជាពលរដ្ឋរាប់រយអង្គ/នាក់ មកពីដែនដីទាំង៥ក្នុងតំបន់ទន្លេមេគង្គ បានរួមគ្នាដង្ហែក្បួនធម្មយាត្រាលើកទី២ នៅក្នុងក្រុងសៀមរាប ខេត្ដសៀមរាប ដើម្បីសុំសុខសន្ដិភាព និងបង្ហាញពីវិស័យវប្បធម៌ព្រះពុទ្ធសាសនាផ្សារភ្ជាប់រវាងប្រទេសទាំង៥ នៅក្នុងតំបន់ទន្លេមេគង្គ រួមមានប្រទេសកម្ពុជា , ប្រទេសថៃ , ប្រទេសមីយ៉ាន់ម៉ា , ប្រទេសឡាវ និង ប្រទេសវៀតណាម ។
ព្រះតេជគុណ មាន សុមេត គ្រូសូត្រស្ដាំវត្ដព្រះឥន្ទកោសា ព្រះអង្គមានសង្ឃដីការថា ការដង្ហែក្បួនធម្មយាត្រានេះ ធ្វើឡើងក្នុងគោលបំណងស្វែងរកសុខសន្ដិភាព ទាំងវិស័យព្រះពុទ្ធសាសនា ហើយធម្មយាត្រានេះ ពិតជាមោទនភាពសម្រាប់ប្រជាពលរដ្ឋនិងព្រះសង្ឃក្នុងខេត្ដសៀមរាប ក៏ដូចជានៅទូទាំងប្រទេស ព្រោះពិធីនេះ បានធ្វើឲ្យពលខ្មែរ ក៏ដូចព្រះសង្ឃដែលជាអ្នកកាន់ព្រះពុទ្ធសាសនា បានរំលឹកដល់វប្បធម៌ព្រះពុទ្ធសាសនា និងបង្ហាញពីសុខសន្ដិភាពទាំងផ្លូវកាយ និងផ្លូវចិត្ដយ៉ាងទូលំទូលាយ ជាពិសេសបានបង្ហាញពីភាពសាមគ្គីភាពគ្នា និងសុខសន្ដិភាព រវាងប្រទេសទាំង៥ក្នុងតំបន់ទន្លេមេគង្គ ។
ក្បួនដង្ហែរនេះបានចាប់ផ្ដើមឡើងនៅម៉ោងជាង៨ព្រឹក បន្ទាប់ពីពិធីដាំដើមពោធិប្រឹក្ស នៅវត្តទេពពោធិវង្ស ហៅវត្តក្បាលខ្មោចរួច ដោចេញដំណើរពីខាងមុខសណ្ឋាគារសូហ្វីតែល កាត់តាមបណ្ដោយផ្លូវហ្សាឌឺហ្គោល ឆ្ពោះទៅកាន់ព្រះអង្គចេក ព្រះអង្គចម ក្បែរព្រះរាជដំណាក់ខេត្ដសៀមរាប និងមានធ្វើពិធីរាប់បាតព្រះសង្ឃប្រមាណ៣០០អង្គផងដែរ ដើម្បីឧទ្ទិស្ទកុសលផលបុណ្យ និងរំលឹកគុណដល់បុព្វការីជនដែលបានបាត់បង់ជីវិតផងដែរ ។
សូមបញ្ជាក់ថា ពិធីដង្ហែក្បួនធម្មយាត្រានេះ ជាកម្មវិធីមួយ ក្នុងចំណោមកម្មវិធីជាច្រើន នៃពិធីបិទធម្មយាត្រាលើកទី២ ក្នុងដែនដីទាំង៥ នៃប្រទេសក្នុងតំបន់ទន្លេមេគង្គ (កម្ពុជា, វៀតណាម, ថៃឡាវ និង មីយ៉ាន់ម៉ា ) ដែលប្រារព្ធឡើងនៅក្នុងក្រុងសៀមរាប ខេត្តសៀមរាប ក្រោមអធិបតីភាពដ៏ខ្ពង់ខ្ពស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តសៀមរាប រួមមាន ៖ ពិធីដាំដើមពោធិប្រឹក្សនៅវត្តទេពពោធិវង្ស , ពិធីដង្ហែធម្មយាត្រានៅក្នុងក្រុងសៀមរាប , ពិធីរាប់បាត្រនៅព្រះអង្គចេកព្រះអង្គចម , ពិធីបិទធម្មយាត្រាលើកទី២ នៅសណ្ឋាគារសូហ្វីតែលអង្គរសៀមរាប និង ពិធីបួងសួងនៅមុខប្រាសាទអង្គរវត្ត ៕
អត្ថបទ និង រូបថត ៖ លោក បូ សាវី , លោក ខេង ឧត្ដម និង លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
