នៅព្រឹកថ្ងៃទី៣០ ខែតុលា ឆ្នាំ២០១៩ នេះ កូនឈើក្រញ៉ូងជាង១០០ដើម ត្រូវបានដាំនៅក្នុង ក្នុងភូមិសណ្ដាយ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប ដោយមានការអញ្ជើញចូលរួម កញ្ញា ម៉ារីសា ផុនធីរ៉ាត់ បវរកញ្ញា ភពផែនដីលេខ២អន្តរជាតិ Miss Planet International និង ប្រធានក្រុមប្រឹក្សាភិបាលនៃបុរីអង្គរលែនម៉ាក្ស បន្ទាយស្រី រួមនិង អាជ្ញាធរស្រុក លោកគ្រូ អ្នកគ្រូ និងសិក្សានុសិស្សប្រមាណ១០០នាក់ផងដែរ ។
លោក ទួស សាភឿន ប្រធានក្រុមប្រឹក្សាភិបាល នៃបុរីអង្គរលែនម៉ាក្ស បន្ទាយស្រី បានលើកឡើងថា បច្ចុប្បន្ននេះ បម្រែបម្រួលអាកាសធាតុនៅលើភពផែនដី បានកំពុងចោទជាបញ្ហាចំបង ដោយតំបន់ក្នុងប្រទេសមួយចំនួនបាននឹងកំពុងទទួលរងដោយគ្រោះធម្មជាតិ គឺបណ្តាមកពីការបំពុលបរិស្ថាននេះឯង ។
លោក ទួស សាភឿន បញ្ជាក់ថា ការដាំកូនដើមឈើនាពេលនេះ គឺដើម្បីលើកកម្ពស់បរិស្ថាន និងបង្កើនគម្របព្រៃឈើ ហើយក៏ជាផ្នែកមួយទប់ស្កាត់ឱ្យបាននូវសកម្មភាពអនាធិបតេយ្យ ក្នុងវិស័យព្រៃឈើ ជួយជំរុញទាំងបច្ចេកទេស និងស្មារតីដល់សហគមន៍ឱ្យបានរឹងមាំ ដើម្បីជាគុណប្រយោជន៍ដល់ប្រជាពលរដ្ឋ ដែលរស់នៅពឹងផ្អែកលើផលអនុផលព្រៃឈើ ។ មួយវិញទៀត ដើម្បីបំផុសឲ្យប្រជាពលរដ្ឋក្នុងខេត្តសៀមរាប បន្តរួមគ្នាដាំដើមឈើ ធ្វើឲ្យខេត្តទេសចរណ៍មួយនេះ ស្រស់បំព្រង ពោរពេញដោយពណ៌បៃតង។
ព័ត៌មានជាតិ ថ្មីៗ
ក្នុងឱកាសនោះដែរ កញ្ញា ម៉ារីសា ផុនធីរ៉ាត់ បានបង្ហាញថានេះជាលើកទី២ ហើយដែលកញ្ញា បានចូលរួមដាំកូនឈើនៅក្នុងខេត្តសៀមរាប ដែលសកម្មភាពនេះមិនត្រឹមតែជាការជួយថែរក្សាបរិយាកាសនៅជុំវិញខ្លួនទេ តែជាការថែរក្សា ជំរកដល់មនុស្ស សត្វ នៅលើពិភពលោកទាំងមូល ។
អត្ថបទ និង រូបថត ៖ លោក អ៊ុន ណារាជ្យ
កែសម្រួលអត្ថបទ ៖ លោក សេង ផល្លី
