នៅថ្ងៃទី២៩ ខែតុលា ឆ្នាំ២០១៩ ឯកឧត្តម យ៉ាណូស អាឌ័រ (János Áder) ប្រធានាធិបតី នៃសាធារណរដ្ឋហុងគ្រី និងលោកជំទាវ បានធ្វើដំណើរតាមជើងយន្តហោះពិសេស មកដល់ព្រលានយន្តហោះអន្តរជាតិខេត្តសៀមរាប នៅវេលាម៉ោង១១:១០នាទីព្រឹក ដោយមានការទទួលបដិសណ្ឋារកិច្ចយ៉ាងកក់ក្ដៅជាទីបំផុតពីសំណាក់ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប មន្ត្រីអ្នកមុខអ្នកការ ព្រមទាំងសិស្សានុសិស្សយ៉ាងច្រើនកុះករ។
ដំណើរទស្សនកិច្ចរយៈពេល២ថ្ងៃ ចាប់ពីថ្ងៃទី២៩ដល់ថ្ងៃទី៣០ខែតុលាឆ្នាំ២០១៩ ក្នុងខេត្តសៀមរាប ឯកឧត្តម យ៉ាណូស អាឌ័រ (János Áder) និងលោកជំទាវ នឹងអញ្ជើញទស្សនាប្រាសាទបុរាណដ៏អស្ចារ្យរបស់កម្ពុជាមួយចំនួន ដូចជា ប្រាសាទព្រះខ័ន ប្រាសាទបាយ័ន ប្រាសាទអង្គរវត្ដ ជាដើម។
សូមបញ្ជាក់ថា ការអញ្ជើញមកបំពេញទស្សនកិច្ចផ្លូវការរបស់ ឯកឧត្តមប្រធានាធិបតី ហុងគ្រី និងលោកជំទាវ នៅព្រះជារាណាចក្រកម្ពុជា បានធ្វើឡើងតបតាមការអញ្ជើញ របស់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជារយៈពេល៤ថ្ងៃ ចាប់ពីថ្ងៃទី២៧ ដល់ថ្ងៃទី៣០ ខែតុលា ឆ្នាំ២០១៩ ។
ព័ត៌មានជាតិ ថ្មីៗ
នៅក្នុងដំណើរទស្សនកិច្ចនៅកម្ពុជានេះ ឯកឧត្ដម យ៉ាណូស អាឌ័រ (János Áder) បានចូលគាល់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ចូលជួបសម្តែង ការគួរសម ជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា ជំនួបពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ នៅក្នុងជំនួបនេះដែរ ឯកឧត្តមប្រធានាធិបតីនៃប្រទេសហុងគ្រី បានបង្ហាញពីការចូលរួមរបស់ហុងគ្រី ជាមួយនឹងការអភិវឌ្ឍរបស់កម្ពុជា ដែលក្នុងនោះឯកឧត្តម នឹងបញ្ជូនអ្នកជំនាញការរបស់ហុងគ្រី ដើម្បីមកជួយកម្ពុជាក្នុងការសិក្សា លើបញ្ហាទឹកស្អាត សំរាម សំណល់រឹង និងសំណល់រាវ និងបញ្ហាផ្សេងៗទៀតពាក់ព័ន្ធ នឹងការអភិវឌ្ឍទីក្រុង។ បន្ទាប់ពីការសិក្សាហើយ ក្រុមអ្នកជំនាញរបស់ហុងគ្រីនឹងផ្ដល់ជូននូវបច្ចេកវិទ្យា និងដំណោះស្រាយដើម្បីដោះស្រាយបញ្ហាទឹកស្អាត បញ្ហាសំណល់រឹង និងរាវនៅកម្ពុជា។ ជាងនេះទៀត ហុងគ្រី នឹងជួយជំរុញការអភិវឌ្ឍកម្ពុជារយៈពេលវែង ដូចជាការបណ្ដុះបណ្ដាល ធនធានមនុស្ស និងវិស័យសុខភាពផងដែរ៕
អត្ថបទ និង រូបភាព ៖ លោក ឃុត សៅ
កែសម្រួល៖ លោក សេង ផល្លី
