ក្រុមគ្រូពេទ្យ គួរធ្វើបច្ចុប្បន្នភាពជំនាញរបស់ខ្លួន ដើម្បីព្យាបាលអ្នកជំងឺឲ្យកាន់តែមានប្រសិទ្ធិភាព គុណភាពប្រកបដោយវិជ្ជាជីវៈ ខណៈក្រុមគ្រូពេទ្យមួយចំនួន បានព្យាបាលអ្នកជំងឺខ្វះក្រមសីលធម៌ និងវិជ្ជាជីវៈ បណ្ដាលឲ្យប្រឈមនឹងគ្រោះថ្នាក់។
ឯកឧត្ដម ធា គ្រុយ រដ្ឋលេខាធិការនៃក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិកម្ពុជា បានថ្លែងបែបនេះនៅក្នុងសន្នីសិទប្រចាំឆ្នាំលើកទី០៣ របស់មន្ទីរពេទ្យកុមារអង្គរខេត្ដសៀមរាប ក្រោមប្រធានបទ ”ជំងឺតំបន់ត្រូពិចលើកុមារ” ដែលធ្វើឡើងនៅសាលសន្និសីទសុខា ខេត្ដសៀមរាប ព្រឹកថ្ងៃទី២៦ ខែតុលា ឆ្នាំ២០១៩នេះ រួមនឹងវត្តមានក្រុមគ្រូពេទ្យក្នុងខេត្តសៀមរាបជាច្រើនរូបចូលរួម។
សន្នីសិទនេះ បែកចែកជាបីផ្នែកសំខាន់ៗ ដោយផ្នែកទី១ផ្ដោតសំខាន់ទៅលើភាពស៊ាំជំងឺឆ្លងនៅក្នុងប្រទេសកម្ពុជា ការសិក្សាហានីភ័យជំងឺគ្រុនឈាម ផ្នែកទី២ ជំងឺបង្កដោយបាក់តេរីរីកស៊ីស្យា លើកុមារកម្ពុជា និងទី៣ជំងឺតេតាណូសទារក ឱម៉ាល់ទិក និងពស់វែកចឹក៕
ឯកឧត្ដម ធា គ្រុយ បានសង្កត់ធ្ងន់ថា ក្រុមគ្រូពេទ្យដែលមិនគោរពេលវេលា និងការងារ ព្រមទាំងគ្មានក្រមសីលធម៌វិជ្ជាជីវៈ គឺមិនបាច់ធ្វើពេទ្យនោះទេ បើទោះបីគ្រូពេទ្យនោះពូកែប៉ុណ្ណាក៍ដោយ។
ឯកឧត្ដម លើកឡើងថា ក្ដីកង្វល់របស់អ្នកជំងឺគឺជាកង្វល់របស់ក្រុមគ្រូពេទ្យ ដែលគ្រូពេទ្យត្រូវធ្វើយ៉ាងណាគោរពវិន័យ បទបញ្ជា ពេលវេលា និងមើលថែទាំ និងព្យាបាលអ្នកជំងឺឲ្យបាន២៤ម៉ោងលើ២៤ម៉ោង និងមានជំនាញច្បាស់លាស់ ដើម្បីព្យាបាលអ្នកជំងឺឲ្យមានប្រសិទ្ធិភាពនិងគុណភាពខ្ពស់ ហើយការធ្វើឲ្យបានមួយកញ្ចប់នេះឲ្យបានល្អគឺជាគ្រូពេទ្យដែលល្អបំផុត។ ដោយឡែក គ្រូពេទ្យមាំទាំ និងមានជំនាញប៉ុណ្ណា អ្នកថែទាំក៏ត្រូវមាំទាំប៉ុណ្ណឹងដែរ។
ឯកឧត្ដមរដ្ឋលេខាធិការ បានទទួលស្គាល់ថា មន្ទីរពេទ្យកុមារអង្គរ មន្ទីរពេទ្យគន្ធបុប្ផាភ្នំពេញ និងនៅសៀមរាប ជាមន្ទីរពេទ្យ ដែលបានបណ្ដុះបណ្ដាលគ្រូពេទ្យបន្ថែម និងការថែទាំព្យាបាលអ្នកជំងឺមានគុណភាពល្អ។
សូមជម្រាបថា មន្ទីរពេទ្យកុមារអង្គរខេត្ដសៀមរាប បង្កើតឡើងក្នុងឆ្នាំ ១៩៩៩ ទទួលព្យាបាល និងថែទាំសុខភាព ទារក និងកុមារកម្ពុជា ដល់អាយុ១៦ឆ្នាំ ដោយមិនគិតកម្រៃសេវា។ ជារៀងរាល់ថ្ងៃ មន្ទីរពេទ្យនេះ ទទួលអ្នកជំងឺប្រមាណ ៥០០នាក់។ រហូតដល់ពេលបច្ចុប្បន្ននេះ មន្ទីរពេទ្យកុមារអង្គរខេត្តសៀមរាប បានផ្តល់ការព្យាបាល ដល់ទារក និងកុមារកម្ពុជា ប្រមាណច្រើនជាង ២.៥លានករណីហើយ។
អត្ថបទ និង រូបភាព ៖ លោក បូ សាវី
កែសម្រួល៖ លោក សេង ផល្លី
