នៅព្រឹកថ្ងៃទី ០៧ ខែ វិច្ឆិកា ឆ្នាំ២០១៩នេះ សាខាកាកបាទក្រហមខេត្តបានសហការជាមួយក្រុមហ៊ុនAPISWA រៀបចំបើកយុទ្ធនាការ អប់រំផ្សព្វផ្សាយ ស្តីពីសុវត្ថិភាពចរាចរណ៍ ក្នុងឱកាសព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក នៅខេត្តសៀមរាប ដោយផ្តោតលើផលប៉ះពាល់នៃការបើកបរក្រោមឥទ្ធិពលគ្រឿងស្រវឹង ។ ពិធីនេះ បានប្រព្រឹត្តទៅក្រោមអធិបតីភាពលោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហម ខេត្ត ដោយមានការអញ្ជើញចូលរួមពីសំណាក់អស់លោក លោកស្រីជាថ្នាក់ដឹកនាំមន្ទីរ សហការី មន្ត្រីនគរបាលចរាចរណ៍ខេត្ត តំណាងអង្គការ សិស្ស យុវជនកាកបាទ ក្រហម ទីប្រឹក្សាយុវជន អ្នកស្ម័ត្រចិត្ត យុវជនកាយរឹទ្ធ សរុបចំនួន ១៥០នាក់ ចូលរួមនៅវិទ្យាល័យ១០មករា ១៩៧៩ ។
ក្នុងចំណាប់អារម្មណ៍របស់ កញ្ញា អ៊ុច ធារី តំណាងក្រុមហ៊ុនAPISWA បានបញ្ជាក់ថា យុទ្ធនាការនេះ ធ្វើឡើងក្នុងគោល បំណង លើកកម្ពស់ការយល់ដឹងជាសាធារណៈ តាមរយៈការផ្សព្វផ្សាយពីសុវត្ថិភាពចរាចរណ៍ ដោយបានផ្តោតលើហានីភ័យនៃការ បើកបរក្រោមឥទ្ធិពលនៃគ្រឿងស្រវឹង និង ដើម្បីចូលរួមជាមួយរាជរដ្ឋាភិបាលកម្ពុជា ក្នុងការកាត់បន្ថយការគ្រោះថ្នាក់ចរាចរណ៍ ក្នុង កំឡុងព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក ឆ្នាំ២០១៩នេះ ។
តាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានឲ្យដឹងថា ក្នុងរយៈពេលមួយឆមាសទី១ ឆ្នាំ ២០១៩នេះ ករណីគ្រោះថ្នាក់ចរាចរណ៍ផ្លូវគោកមានការកើនឡើង បណ្តាលឲ្យមានមនុស្សស្លាប់១ពាន់៣៣នាក់ របួសចំនួន ៣ពាន់ ២២៤នាក់ បើធៀបរយៈពេលដូចគា្នក្នុងឆ្នាំ២០១៨ ចំនួនអ្នកស្លាប់កើន១០៣នាក់ ស្មើ១១% និង របួស កើន៨២៥នាក់ ស្មើ៤% ។
មានប្រសាសបើកយុទ្ធនាការ ក្នុងនាមឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត សៀមរាប លោកជំទវ ទាង អេង ក៏បានគូសបញ្ជាក់ថា ការរៀបចំយុទ្ធនាការអប់រំផ្សព្វផ្សាយ ស្តីពីហានីភ័យនៃការបើកបរក្រោមឥទ្ធិ ពលនៃគ្រឿងស្រវឹង និង មិនបានពាក់មួកសុវត្ថិភាពដ៏មានសារៈសំខាន់នេះឡើង គឺដើម្បីផ្សព្វផ្សាយតាមរយៈការចែកខិតប័ណ្ណដល់ បងប្អូនអ្នកបើកបរ ក៏ដូចប្រជាពលរដ្ឋទូទៅ ក្នុងការបង្កើននូវចំណេះដឹង និង ការដាស់តឿនក្រើនរំលឹកដល់បងប្អូន អំពីផលប៉ះពាល់ នឌការបើកបរក្រោមឥទ្ធពលគ្រឿងស្រវឹង និង មិនពាក់មួកសុវត្ថិភាព ក្នុងគោលបំណងចូលរួមកាត់បន្ថយអត្រាស្លាប់ ពិការដោយគ្រោះថ្នាក់ចរាចរណ៍ សំខាន់ក្នុងឱកាសពិធីបុណ្យអុំទូក បណ្តែតប្រទីប និង សំពះព្រះខែ អកអំបុកខាងមុខនេះ ។
លោកជំទាវក៏បាន បន្តទៀតថា យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ដែលបានបង្ហាញពីចំនួននៃអត្រាគ្រោះ ថ្នាក់ចរាចរណ៍ ដែលបណ្តាលឲ្យមានបាត់បង់ជីវិត រងរបួស ហើយបានបន្សល់សង្គមជាតិនូវ ជនពិការ ស្ត្រីមេម៉ាយ ក្មេងកំព្រាជាដើម ទៀតផង ។ កត្តាទាំងនេះកើតឡើងដោយការបើកបរបញ្ជាយានយន្តមិនគោរពច្បាប់ចរាចរណ៍ រួមមានការបើកបរលើសល្បឿនកំណត់ មិនគោរពសិទ្ធគ្នា អាធ្យាស្រ័យគ្នា មិនប្រកាន់ស្តាំ បើកបរក្រោមឥទ្ធិពលគ្រឿងស្រវឹង និង មិនពាក់មួកសុវត្ថិភាពជាដើម ។
ក្នុងនោះដែរលោកជំទាវក៏បានសម្តែងនូវការសោកស្តាយយ៉ាងខ្លាំងចំពោះការបាត់បង់ជីវិតរបស់កុមារសិស្សសាលាម្នាក់ ដែលបាន រថយន្តបើកបុកកាលពីម្សិលមិញ នៅភ្លើងស្តុបសាលារៀនគ្រួស ព្រមទាំងសុំចូលរួមរំលែងទុក្ខសោកជាមួយអាណាព្យាបាលសិស្ស នោះផងដែរ។ ដើម្បីឆ្លើយតបចំពោះករណីគ្រោះថ្នាក់ចរាចរណ៍ លោកជំទាវក៏បានសំណូមដល់កងកម្លាំងសមត្ថកិច្ច អាជ្ញាធរមូលដ្ឋាន ប្រជាការពារភូមិ ត្រូវរួមសហការគ្នា ជម្រុញធ្វើការផ្សព្វផ្សាយតាមរយៈយុវជនកាកបាទក្រហមកម្ពុជា យុវជនកាយរឹទ្ធ និង សហភាព សហព័ន្ធយុវជនកម្ពុជា អ្នកស្ម័ត្រចិត្ត ធ្វើការផ្សព្វផ្សាយបន្តទៅគ្រប់គ្រឹះស្ថានសិក្សារដ្ឋ និង ឯកជន សហគមន៍ ស្តីពីច្បាប់ចរាចរណ៍ផ្លូវគោក របៀបពាក់មួកសុវត្ថិភាពផងដែរ ។
ក្នុងសកម្មភាពបើកយុទ្ធនាការអប់រំផ្សព្វផ្សាយពីសុវត្ថិភាពចរាចរណ៍នេះ ក៏មានរៀបចំក្បួនដង្ហែរទៅតាមដងវិថីនានាក្នុងក្រុង សៀមរាប ព្រមទាំងមានការស្រែកពោលនូវពាក្យពេជ្រ នៃខ្លឹមសារអប់រំ ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍ , មួកមួយជីវិត ម្នាក់ , ពិសារគ្រឿងស្រវឹងកុំបើកបរ រួមគ្នាគោរពច្បាប់ចរាចរណ៍ ។ ក្នុងនោះដែរក៏មានធ្វើការចែកនូវខិត្តប័ណ្ណអប់រំដល់បងប្អូនអ្នកធ្វើ ដំណើរតាមម៉ូតូ ,រថយន្ត ,រ៉ឺម៉ក់កង់បី និង ចូលទៅក្នុងទីផ្សារធំថ្មី ព្រមទាំងធ្វើការប្រកាសអប់រំឲ្យប្រជាពលរដ្ឋ អ្នកធ្វើដំណើរឲ្យបានយល់ដឹង ពីឥរិយាបទខុសឆ្គង ដែលបណ្តានាំឲ្យមានគ្រោះថ្នាក់ក្នុងពេលធ្វើដំណើរ និង ចៀសវាងការប្រព្រឹត្តកំហុសទាំងនោះទៀត ផង ៕
ម៉ី សុខារិទ្ធ ភ្នាក់ងារខេត្តសៀមរាប
