នៅព្រឹកថ្ងៃទី០៩ ខែវិច្ឆិកា ឆ្នាំ២០១៩នេះ កម្មវិធីទទួលទានអំបុកខ្មែរ ការពារជាតិ សាសនា ព្រះមហាក្សត្រ បានរៀបចំយ៉ាងអធិកអធម ដោយរដ្ឋបាលខេត្តសៀមរាប នៅកើតសួនច្បារព្រះរាជដំណាក់ ក្រោមវត្តមានរបស់អភិបាលខេត្តសៀមរាប ឯកឧត្តម ទៀ សីហា។ ក្នុងនោះនៅតាមបណ្ដាស្រុកក្រុងទាំង១២ របស់ខេត្តសៀមរាប មានអ្នកចូលរួមប្រមាណជាង ១៣ម៉ឺននាក់ ជាប្រជាពលរដ្ឋ គ្រូបង្រៀន សិស្សានុសិស្ស មន្ត្រីរាជការ កងកម្លាំងប្រដាប់អាវុធ ពិសេសនោះគឺវិស័យឯកជន រួមមានសមាគមសណ្ឋាគារ សមាគមចុងភៅកម្ពុជាជាដើម ។
ទិវាទទួលទានអំបុកខ្មែរ ថែជាតិ សាសនា ព្រះមហាក្សត្រ ៩ វិច្ឆិកា ២០១៩នេះ គឺជាព្រឹត្តិការណ៍លើកទី២ នៃព្រឹត្តិការណ៍បង្កើតទិវាពង្រឹងឆន្ទៈប្រជាជាតិកម្ពុជាក្នុងធ្លុងសាមគ្គីជាតិ ដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញអនុសាសន៍ និងអំពាវនាវឲ្យមានការចូលរួមនៃកោសិការសង្គមជាតិទាំងមូល បន្ទាប់ពីទិវាហូបនំបញ្ចុកសាមគ្គីសន្តិភាព ០៩ មិថុនា ២០១៩ កន្លងទៅ។ ព្រឹត្តិការណ៍ទាំងពីរនេះ សុទ្ធតែចង់ក្រើនរំលឹក និងពន្យល់ដល់ប្រជាពលរដ្ឋខ្មែរស្លូតត្រង់ ដែលលង់ចាញ់ឧបាយកលនៃក្រុមឧទ្ទាមក្បត់ជាតិ ដើម្បីទប់ស្កាត់និងប្រឆាំងផែនការរដ្ឋប្រហារ ប្លន់អំណាចពីរាជរដ្ឋាភិបាលស្របច្បាប់ ក្រោមលេសប្រជាធិបតេយ្យ និងសិទ្ធិមនុស្ស ។
ការចូលរួមរបស់ប្រជាជាតិកម្ពុជា ក្នុងទិវាទទួលទានអំបុកខ្មែរ ថែជាតិ-សាសនា-ព្រះមហាក្សត្រ គឺជាការបង្ហាញនូវការជឿជាក់ លើការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលកាន់អំណាចប្រទេសដោយគណបក្សប្រជាជនកម្ពុជា មានសម្តេចតេជោ ហ៊ុន សែន ជានាយករដ្ឋមន្ត្រី ។
រដ្ឋបាលខេត្តសៀមរាប រៀបចំពិធីហូបអំបុកនៅទូទាំងខេត្ត មានមនុស្សចូលរួម…
រដ្ឋបាលខេត្តសៀមរាប រៀបចំពិធីហូបអំបុកនៅទូទាំងខេត្ត មានមនុស្សចូលរួមប្រមាណ១៣ម៉ឺននាក់#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Saturday, November 9, 2019
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
