នាព្រឹកថ្ងៃទី១០ ខែវិច្ឆិកា ឆ្នាំ២០១៩នេះ ក្រុមការងារថ្នាក់កណ្តាល ចុះជួយឃុំពាក់ស្នែង និងស្រុកអង្គរធំ ខេត្តសៀមរាប និងក្រុមការងារថ្នាក់ខេត្តថ្នាក់ស្រុក ថ្នាក់ឃុំ ថ្នាក់ភូមិ ព្រមទាំងពុទ្ធបរិស័ទចំណុះជើងវត្ត បានដង្ហែរបុណ្យកឋិនទានសាមគ្គីចូលទៅកាន់វត្តសប្បុវិសារាមហៅវត្តខ្នាច់ត្រាចដែលស្ថិតនៅក្នុងភូមិសណ្តាន ឃុំពាក់ស្លែង ស្រុកអង្គរធំ ខេត្តសៀមរាប។
ពិធីហែរអង្គកឋិនទានសាមគ្គីនេះ មានការអញ្ជើញជាអធិបតី ពីឯកឧត្តម ផៃ សុខខេង ទីប្រឹក្សាសម្តេចពិជ័យសេនា ទៀ បាញ់ ។
ព្រះគ្រូចៅអធិការ វត្តខ្នាច់ត្រាច មានថេរៈដិការថា៖ បច្ច័យដែលទទួលបានពីអង្គកឋិនទាននេះ ក្រៅពីការលៃលកសម្រាប់ចាយវាយទៅតាមតម្រូវការនៅពេលដែលកសាងអ្វីនៅក្នុងទីអារាមវត្តផង និងសម្រាប់ចង្ហាន់ប្រចាំថ្ងៃរបស់ព្រះភិក្ខុសង្ឃក្នុងវត្តផង។ ព្រះសង្ឃ គឺពឹងលើទាននិងបច្ច័យពីប្រជាពុទ្ឋបរិស័ទ នៅក្នុងទីវត្តអារាមដែលមានការរីកចំរើនទៅបានគឺមិនអាចខ្វះបានឡើយ ពីការចូលរួមរបស់ប្រជាពុទ្ឋបរិស័ទជិតឆ្ងាយដែលមានសទ្ឋាជឿជាក់លើព្រះពុទ្ឋសាសនា ហើយភាពរីកធំធាត់របស់ទីអារាមក៍ជាកត្តាឆ្លុះបង្ហាញឲ្យឃើញអំពីជីវភាពប្រសើរឡើងនៃប្រជាពុទ្ធបរិស័ទនៅក្នុងតំបន់ចំណុះជើងវត្តនោះផងដែរ។
ព្រះគ្រូចៅអធិការ បានបន្តថា អង្គកឋិនទានសម្រាប់វត្តនេះ កើតឡើងដោយហេតុ៤យ៉ាង គឺហេតុទី១ដោយសារជីដូនជីតាប្រជាពុទ្ឋបរិស័ទបានស្តាប់ព្រះធម៌ ព្រះវិន័យ ព្រះពុទ្ឋសាសនា បានដឹងថាកឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង បានអានិសង្ឍដល់ភិក្ខុជាបដិគ្គាហកៈអ្នកទទួលក្រាលគ្រងនិងអ្នកអនុមោទនាផង។ ទី២ ដោយហេតុបានឃើញព្រះសង្ឃគង់ចាំវស្សាក្នុងវត្តនេះបានរៀនសូត្រធម៌វិន័យ ប្រព្រឹត្តិត្រឹមត្រូវតាមច្បាប់ព្រះពុទ្ឋសាសនា។ ទី៣ ដើម្បីប្រមូលនូវបច្ច័យដែលបានពីអង្គកឋិននេះ យកទៅកសាងទីសេនាសេនៈអាស្រ័យរបស់ព្រះសង្ឃ ព្រមទាំងកសាងនូវហេដ្ឋារចនាសម្ព័ន្ឋនានាបន្ថែមទៀតមានដូចជាចាក់ដីតាមរបងវត្ត រៀបចំសួនច្បារ កសាងកុដិ ជាដើម។ ទី៤ដើម្បីជាទក្ខិណានុប្បទាន ឧទ្ទិសជូនដល់បុព្វការីជននៃយើងគ្រប់គ្នាដែលបានចែកឋានទៅកាន់សុគតិភពទៅហើយនោះផង។
សេង ផល្លី
