ឯកឧត្តម ទៀ សីហា អភិបាលខេត្តសៀមរាប នឹងអញ្ជើញអុំទូកដោយផ្ទាល់ នៅថ្ងៃទី១២ ខែវិច្ឆិកា ឆ្នាំ២០១៩ ត្រូវជាថ្ងៃទី០៣ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ខេត្តសៀមរាបនេះបើតាមប្រសាសន៍របស់ឯកឧត្តមក្នុងពិធីបើកការប្រណាំងទូក នៃព្រះរាជពិធីបុណ្យអុំទូក បណ្តែតប្រទីបនិងសំពះព្រះខែ អកអំបុក នៅតាមបណ្ដាយស្ទឹង
ក្រុងសៀមរាបក្នុងខេត្តសៀមរាបនៅថ្ងៃទី១០ ខែវិច្ឆិកា ឆ្នាំ២០១៩។
តាមរយៈសេចក្តីជូនដំណឹងរបស់សាលាខេត្តសៀមរាប បានឲ្យដឹងថា នៅឆ្នាំ២០១៩ ខេត្តសៀមរាប នឹងរៀបចំពិធីប្រណាំងទូក រយៈពេល០៣ថ្ងៃ ចាប់ពីថ្ងៃទី១០ដល់ទី១២ ខែវិច្ឆិកា ឆ្នាំ២០១៩ ដូចគ្នានឹងពិធីប្រណាំងទូក នៃព្រះរាជពិធីបុណ្យអុំទូក
បណ្តែតប្រទីប និងសំពះព្រះខែ អកអំបុក នៅរាជធានីភ្នំពេញផងដែរ។
ថ្លែងក្នុងថ្ងៃទី០១ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងខេត្តសៀមរាប ឯកឧត្តម ទៀ សីហា បានអញ្ជើញ អភិបាលរងខេត្ត រួមនឹងមន្ត្រីនៃសាលាខេត្តសៀមរាប ចូលរួមអុំទូកហនុមានដែលជាទូករបស់រដ្ឋបាល
ខេត្តសៀមរាប សមាជិកក្រុមប្រឹក្សាខេត្ត និង ភ្ញៀវជាតិ-អន្តរជាតិ មន្ត្រីរាជការនៃមន្ទីរអង្គភាព ក្នុងខេត្ត ដើម្បីអុំទូកអបអរសារ នៅថ្ងៃទី០៣ ដែលជាថ្ងៃបញ្ចប់ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងខេត្តសៀមរាបទាំងអស់គ្នា។
សេង ផល្លី
