នៅរសៀលថ្ងៃទី១២ ខែវិច្ឆិកា ឆ្នាំ២០១៩ ឯកឧត្តម ទៀ សីហា អភិបាលខេត្តសៀមរាប បានប្រកាសថា នឹងបង្កើតឲ្យមានការប្រណាំងទូកអុំមិត្តភាពបន្តទៀតនៅឆ្នាំក្រោយ ដោយអនុញ្ញាតឲ្យប្រជាពលរដ្ឋចូលរួមអុំ ជាមួយថ្នាក់ដឹកនាំខេត្ត មន្ត្រីរាជការ និងកងកម្លាំងសមត្ថកិច្ចផងដែរ។
ពិធីប្រណាំងទូកមិត្តភាព ក្នុងថ្ងៃទី៣ នៃព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុកក្នុងខេត្តសៀមរាប ដែលមានការចួលរួមប្រកួតដោយ សមាជិកក្រុមប្រឹក្សាខេត្ត ដឹកនាំដោយ ឯកឧត្តម អ៊ឹង ហឿន ប្រធាន ក្រុមប្រឹក្សាខេត្ត មន្ត្រីសាលាខេត្តសៀមរាបដឹកនាំដោយ ឯកឧត្តម ទៀ សីហា អភិបាលខេត្តសៀមរាប ប្រធាន-អនុប្រធាន មន្ត្រីមន្ទីរ-អង្គភាពជុំវិញខេត្ត រួមនិងមហាជន សរុប២២ ទូក ដែលបានធ្វើឲ្យពិធីនេះ មានភាពសប្បាយ ប្រកបដោយសាមគ្គីភាព។
ក្នុងឱកាសបិទបញ្ចប់ ពិធីប្រណាំងទូកមិត្តភាពនេះ ឯកឧត្តម ទៀ សីហា បានសម្តែងនូវការសាទរ ចំពោះការចូលរួមរបស់ថ្នាក់ដឹកនាំ មន្ត្រីរាជការ អាជ្ញាធរក្រុង ស្រុក កងកម្លាំង ដែលបានចូលរួមក្នុងការប្រកួតប្រណាំងអុំទូក នាថ្ងៃ បញ្ចប់ព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក ឆ្នាំ២០១៩នេះ ។
ឯកឧត្តមអភិបាលខេត្ត បានបញ្ជាក់ថា នេះជាលើកទី១ហើយ ដែលខេត្តបានរៀបចំធ្វើពិធីប្រណាំងអុំទូកជាមិត្តភាព ដោយមានការចូលរួមពីថ្នាក់ដឹកនាំ មន្ត្រីរាជការ កងកម្លាំង មហាជន និង សណ្ឋាគារទេសចរណ៍ ចូលរួមប្រណាំង ដើម្បីបម្រើដល់ការទស្សនាកម្សាន្ត សប្បាយរីករាយ ជូនដល់ប្រជាពលរដ្ឋ ភ្ញៀវជាតិ អន្តរជាតិទៀតផង ។
ពិធីប្រកួតប្រណាំងអុំទូកមិត្តភាព នឹងរៀបចំនៅឆ្នាំក្រោយបន្តក្នុងខេត្តសៀមរាប
ពិធីប្រកួតប្រណាំងអុំទូកមិត្តភាព នឹងរៀបចំនៅឆ្នាំក្រោយបន្តក្នុងខេត្តសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, November 13, 2019
អត្ថបទ និងរូបភាព៖ លោក ម៉ី សុខារិទ្ធ
កែសម្រួលអត្ថបទ៖ លោក សេង ផល្លី
