ជារៀងរាល់ឆ្នាំ រដូវកាលនៃភ្ញៀវទេសចរពិភពលោកចេញកំសាន្តក្រៅស្រុក ចាប់ពីខែតុលា ដល់ខែមីនា ក្នុងចន្លោះពេលនេះ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ជាកត្តារួមផ្សំ ដើម្បីធ្វើឲ្យទេសចរណ៍អន្តរជាតិ មានការចាប់អារម្មណ៍មកទស្សនាប្រទេសកម្ពុជាបន្ថែមទៀត។
រយៈពេល ៣ថ្ងៃនៃ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ ក្នុងខេត្តសៀមរាប តាមការសង្កេត ភ្ញៀវទេសចរណ៍អន្តរជាតិ មានការចាប់អារម្មណ៍ និងចូលរួមសប្បាយជាមួយប្រជាពលរដ្ឋខ្មែរ អំឡុងពិធីបុណ្យយ៉ាងសប្បាយរីករាយ។
តាមរយៈរបាយការណ៍ របស់មន្ទីរទេសចរណ៍ខេត្តសៀមរាប បានបង្ហាញថា ភ្ញៀវទេសចរ ដែលបានមកចូលមកកាន់ខេត្តសៀមរាប អំឡុងពិធីបុណ្យអុំទូក មានចំនួនសរុបជាង២៧ម៉ឺននាក់ ក្នុងនោះភ្ញៀវទេសចរណ៍អន្តរជាតិ មានចំនួនជាង២ម៉ឺននាក់។
តាមប្រសាសន៍ របស់ ឯកឧត្តម ទៀ សីហា អភិបាលខេត្តសៀមរាប ក្នុងពិធីបិទការប្រណាំងទូកង ក្នុងខេត្តសៀមរាប ឯកឧត្តមបានបញ្ជាក់ថា ចំនួនទូកចូលប្រកួតនៅឆ្នាំ២០១៩នេះ មានការកើនឡើង និងប្រកបដោយភាពសប្បាយរីករាយ។ ដោយឡែក ការងារសន្តិសុខ សណ្តាប់ធ្នាប់ របៀបរៀបរយសាធារណៈ មានភាពល្អប្រសើរ ដោយគ្មានគ្រោះថ្នាក់ចរាចរណ៍ គ្មានការប៉ះទង្គិចដោយអំពើហិង្សា អំពើឆក់ ប្លន់ និងបាតុភាព អវិជ្ជមានផ្សេងៗទៀតគួរឲ្យកត់សម្គាល់ឡើយ។
ឯកឧត្តមអភិបាលខេត្ត បញ្ជាក់ថា ភាពសប្បាយរីករាយកក់ក្តៅនេះ គឺបានមកពីសន្តិភាព នៃនយោបាយ ឈ្នះ ឈ្នះ របស់ប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន។ តាមរយៈការរៀបចំអបអរព្រះរាជពិធីអុំទូក បណ្តែតប្រទីប សំពះព្រះខែ បានធ្វើឲ្យបុណ្យប្រពៃណី វប្បធម៌ ជំនឿសាសនាមួយនេះ កំពុងក្លាយជាព្រឹត្តិការណ៍ទេសចរណ៍ប្រចាំឆ្នាំដ៏ទាក់ទាញ នាថ្ងៃអនាគត ។
អត្ថបទ និងរូបភាព៖ លោក ងិន គឹមឡេង និងលោក យូ វង្ស
កែសម្រួលអត្ថបទ៖ លោក សេង ផល្លី
