នៅថ្ងៃទី១០ ខែវិច្ឆិកា ឆ្នាំ២០១៩នេះអង្គការមូលនិធិថែទាំសុខភាពអ្នកជំងឺអេដស៍កម្ពុជា
បានចុះផ្សព្វផ្សាយអំពីការពារនៃមេរោគអេដស៍ការប្រឹក្សានិងធ្វើតេស្តឈាមមិនគិតថ្លៃដល់ប្រជាពលរដ្ឋដែលបានមកចូលរួមក្នុងព្រះរាជពិធីបុណ្យអុំទូកបណ្តែតប្រទីបនិងសំពះព្រះខែ អកអំបុកឆ្នាំ២០១៩ក្នុងខេត្តសៀមរាប។
ដើម្បីត្រៀមក្នុងឱកាសទិវាពិភពលោកប្រយុទ្ឋនឹងជំងឺអេដស៍ នៅថ្ងៃទី១ ខែធ្នូ ឆ្នាំ២០១៩នេះ និងឈរលើគោលបំណងចូលរួមជាមួយពិភពលោក ក្នុងការសម្រេចនូវទិសដៅថែទាំ ព្យាបាលអ្នកផ្ទុកមេរោគអេដស៍ និងចូលរួមអនុវត្តនូវគំនិតផ្តួចផ្តើមរបស់ថ្នាក់ជាតិ ៣.០ ក្នុងការលុបបំបាត់ការឆ្លងថ្មីមេរោគអេដស៍នៅឆ្នាំ២០២០។ យុទ្ធនាការនេះ អង្គការមូលនិធិថែទាំសុខភាពអ្នកជំងឺអេដស៍ បានសហការជាមួយមន្ទីរសុខាភិបាលខេត្ត និងកម្មវិធីអេដស៍ខេត្តសៀមរាប បានធ្វើសកម្មភាពអប់រំនិងផ្សព្វផ្សាយដល់សាធារណៈជនទូទៅ តាមរយៈការផ្តល់ស្រោមអនាម័យប្រមាណចា៥ពាន់ស្រោម ផ្តល់ប្រឹក្សាធ្វើតេស្តឈាមរកមេរោគអេដស៍ ដោយមិនគិតកម្រៃផងដែរ។
លោក វេជ្ជបណ្ឌិត ឈឹម សរ៉ាត់ នាយកប្រចាំតំបន់អាស៊ីនៃមូលនិធិថែទាំសុខភាពអ្នកជំងឺអេដស៍ មានប្រសាសន៍ថា៖ អង្គការនេះបានរៀបចំយុទ្ឋនាការអប់រំផ្សព្វផ្សាយ ចែកស្រោមអនាម័យ ផ្តល់ប្រឹក្សា និងធ្វើតេស្តឈាមដោយមិនគិតថ្លៃជូនប្រជាពលរដ្ឋទូទៅ ប្រសិនបើ ពួកគេសង្ស័យថាមានឆ្លងមេរោគអេដស៍ ។ សកម្មភាពទាំងអស់នេះធ្វើឡើង ដើម្បីដាស់តឿន លើកកម្ពស់សុខភាព និងការការពារពីការឆ្លងអេដស៍ កាមរោគ និងបានដឹងពីសុវត្ថិភាពក្នុងការរួមភេទ ។
សេង ផល្លី
