ថ្ងៃទី៩ ខែវិច្ឆិកា ឆ្នាំ២០១៩ ខួបទី៦៦ នៃទិវាបុណ្យឯករាជ្យជាតិ និងជាថ្ងៃកំណើតកងយោធពលខេមរភូមិន្ទ ដែលបានរំលឹកស្មារតីសាមគ្គីប្រជាជាតិកម្ពុជាទាំងមូល ដើម្បីរក្សាស្នាព្រះហត្ថ ព្រះមហាវីរក្សត្រ ព្រះបរមរតនកោដ្ឋ ពង្រឹងឆន្ទៈការពារជាតិ សាសនា ព្រះមហាក្សត្រ បន្តការអភិវឌ្ឍប្រទេសជាតិ ក្រោមម្លប់នៃគោលនយោបាយ ឈ្នះ ឈ្នះ ( រូបមន្តនៃសន្តិភាព ) របស់ប្រមុខរាជរដ្ឋាភិបាលកម្ពុជា។
ថ្ងៃទី ០៩ វិច្ឆិកា គឺជាថ្ងៃប្រវតិ្តសាស្ត្រ របស់ព្រះរាជាណាចក្រកម្ពុជា ដែលទទួលបានឯករាជ្យ ក្រោមព្រះរាជបូជនីយកិច្ចរបស់ព្រះករុណាសម្តេច ព្រះនរោត្តម សីហនុ ព្រះបរមរតនកោដ្ឋ ពីពួកអាណានិគមបារាំងសេស និងជាថ្ងៃបង្កើតកងយោធពលខេមរភូមិ្ទ ដែលត្រូវបានថ្នាក់ដឹកនាំ មន្ត្រី រាជការ កងកម្លាំងប្រដាប់អាវុធ អាជ្ញាធរមូលដ្ឋាន ប្រជាពលរដ្ឋនៅទូទាំងប្រទេស ប្រារព្ធពិធី អបអរសាទរ រំលឹកការដឹងគុណ និងចងចាំស្មារតី ទិវា៩វិច្ឆិកា ក្នុងសុឆន្ទៈដែលមិនអាចបំភ្លេចបាន ។
នៅខេត្តសៀមរាប ថ្ងៃទី០៩ ខែវិច្ឆិកា ឆ្នាំ២០១៩ បានប្រារព្ធទិវារំលឹកខួបអនុស្សាវរីយ៍លើកទី៦៦ ថ្ងៃបុណ្យឯករាជ្យជាតិ និង ថ្ងៃកំណើតកងយោធពលខេមរៈភូមិន្ទ (០៩វិច្ឆិកា១៩៥៣- ០៩ វិច្ឆិកា២០១៩ ) ក្រោមការរៀបចំឡើងដោយបញ្ជាការដ្ឋានយោធភូមិភាគទី៤ សហការជាមួយអាជ្ញាធរខេត្ត និងមានការចូលរួមដោយ ថ្នាក់ដឹកនាំ មន្ត្រីរាជការ ដែលជាពិសេសនោះគឺវត្តមានរបស់កងកម្លាំងប្រដាប់អាវុធ មកពីបណ្តាអង្គភាពនានា មួយចំនួនក្នុងខេត្ត ។
ថ្ងៃ៩ វិច្ឆិកា បានចារឹកនៅក្នុងទំព័រប្រវត្តិសាស្ត្រកម្ពុជា ស្តីពីស្នាព្រះហស្ត ក្រោមព្រះរាជបូជនិយកិច្ចរបស់សម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ដែលទ្រង់បានលះបង់ព្រះកាយពល ប្រកបដោយព្រះបញ្ញាញាណ តស៊ូ ទាមទារ ឯករាជ្យជូនមាតុភូមិកម្ពុជា ឲ្យបានរួចចាកផុតពីនឹមត្រួតត្រារបស់អាណានិគមនិយមបារាំង និង បានប្រកាសឯករាជ្យជាតិ នាថ្ងៃទី ០៩ វិច្ឆិកា ១៩៥៣ ដែលព្រះវីរៈភាពដ៏អង់អាចក្លាហាននេះ គឺជាព្រះរាជគំរូដ៏ល្អ សម្រាប់កូនចៅជំនាន់ក្រោយ ចងចាំនិងបន្តវេន បំពេញកាតព្វកិច្ច កសាង ការពារបូរណភាពទឹកដីសុវណ្ណភូមិនៃកម្ពុជា ។
ផ្តើមចេញពីព្រះមហាវីរភាពនេះ រាជរដ្ឋាភិបាលកម្ពុជា បានពុះពារជំនះគ្រប់ឧបសគ្គ ប្រយុទ្ឋប្រឆាំង និងទប់ស្កាត់ការវិលត្រឡប់មកវិញនៃរបបប្រល័យពូជសាសន៍ប៉ុលពត ប្រសូត្រឡើងវិញព្រះរាជាណាចក្រកម្ពុជាទី២ កសាងសន្តិភាព ឈានឆ្ពោះទៅរកការអភិវឌ្ឍលើគ្រប់វិស័យ លើកកម្ពស់ជីវភាពរស់នៅរបស់ប្រជាពលរដ្ឋ កាន់តែប្រសើរឡើង ក្រោមដំបូលនៃនយោបាយ ឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ថ្ងៃ៩វិច្ឆិកា ថ្ងៃកំណើតកងយោធពលខេមរភូមិន្ទ ក៏ជាទិវាគោរពដឹងគុណយ៉ាងធំធេង ចំពោះមហាពលីកម្ម ក្នុងវីរភាពដ៏អង់អាចក្លាហាន របស់វរៈជនស្នេហាគ្រប់ជំនាន់ កម្មាភិបាល យុទ្ធជន យុទ្ធនារី ក្នុងបុព្វហេតុ ជាតិ សាសនា ព្រះមហាក្សត្រ ។ ពិធីគោរពវិញ្ញាណខន្ឋ័ ដុតភ្លើងជ័យ និងបូជាធូបទៀន បានធ្វើឡើងនៅវិមានរំលឹកគុណអតីតវិរៈយុទ្ឋជនខេត្តសៀមរាប ដែលក្នុងនោះរួមមានវត្តមាន របស់ក្រុមប្រឹក្សាខេត្ត គណអភិបាលខេត្ត មេបញ្ជាការ មេបញ្ជាការរង ក្នុងជួរកងកម្លាំងប្រដាប់អាវុធ នាយទាហាន នាយនគរបាល នាយកងរាជអាវុធហត្ថខេត្ត និងមន្ត្រីរាជការជាច្រើនរូបទៀត ៕
រដ្ឋបាលខេត្តសៀមរាប ប្រារព្ធខួបអនុស្សាវរីយ៍លើកទី៦៦ ថ្ងៃបុណ្យឯករាជ្យជាតិ
រដ្ឋបាលខេត្តសៀមរាប ប្រារព្ធខួបអនុស្សាវរីយ៍លើកទី៦៦ ថ្ងៃបុណ្យឯករាជ្យជាតិ និង ថ្ងៃកំណើតកងយោធពលខេមរៈភូមិន្ទ#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Saturday, November 9, 2019
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
