ថ្ងៃព្រហស្បតិ៍ ១១កើតត ខែកត្ដិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃ ទី ០៧ ខែវិច្ឆិកា ឆ្នាំ ២០១៩ នៅអាកាសយានដ្ឋានអន្តរជាតិសៀមរាប មានបើកកិច្ចប្រជុំ លំហាត់លើតុ ស្ដីពី ផែនការ ប្រតិបត្តិការ នៃសមយុទ្ធទ្រង់ទ្រាយធំ REPEX19 ក្រោមប្រធានបទ «គ្រោះថ្នាក់ យន្តហោះ ធ្លាក់ នៅ ក្នុង បរិវេណ អាកាសយានដ្ឋាន» ក្រោមអធិបតី ភាព ឯកឧត្តម ង៉ាន់ ភិរុណ អភិបាលរង ខេត្ត តំណាង ដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្ត សៀមរាប និងមានការចូលរួមពី ឯកឧត្តម អស់លោក កងកម្លាំង ប្រដាប់ អាវុធ ទាំង បី ប្រភេទ មន្ទីរ អង្គភាពជំនាញពាក់ព័ន្ធ សរុបចំនួន ៤២នាក់។
ឯកឧត្តម អភិបាលរង ក៏បានពាំនាំនូវការផ្តាំផ្ញើពីសំណាក់ឯកឧត្ដមអភិបាល ខេត្ត ឲ្យក្រុមការងារទាំងអស់បន្តការខិតខំប្រឹងប្រែងអនុវត្តនូវរាល់កិច្ចការរបស់ខ្លួនឲ្យបានល្អ និងមានប្រសាសន៍ណែនាំដើម្បីជម្រុញឲ្យការងារនេះអនុវត្តបានដោយរលូនដូចតទៅ៖
-បន្តកិច្ចសហការល្អ និងដោយយកចិត្តទុកដាក់ខ្ពស់ រវាងសមត្ថកិច្ច មន្ទីរ អង្គភាព ជំនាញ នានា ជុំវិញខេត្ត ជាមួយ នាយកអាកាសយានដ្ឋានអន្តរជាតិសៀមរាប
-ក្នុងករណីមានឧបទ្ទវហេតុកើតឡើង សូមសមត្ថកិច្ចជួយអន្តរគមន៍ និងហាមប្រជាពលរដ្ឋកុំឲ្យចូលក្នុងកន្លែងកើតហេតុដែលអាចធ្វើឲ្យប៉ះពាល់ការអនុវត្តការងារ និងបាត់បង់វត្ថុតាង ឬភស្តុតាងផ្សេងៗ។
គោលបំណង នៃលំហាត់លើតុនេះ គឺដើម្បីធ្វេីការសាកល្បងទៅលើទ្រីស្ដីនៃការចាត់តាំងក្នុងការឆ្លើយតបទៅនឹងស្ថានភាពសំរាប់ថ្ងៃទី១៨ ខែធ្នូ ឆ្នាំ ២០១៩ ដើម្បីប្រាកដថាគ្រប់ស្ថាប័ន អង្គភាព អន្តរាគមន៍ ដែលចូលរួមបានយល់ដឹងច្បាស់នូបវិសាលភាពនៃលំហាត់សមយុទ្ធទ្រង់ទ្រាយធំឆ្នាំ២០១៩ និងសកម្មភាពដែលត្រូវអនុវត្តរៀងៗខ្លួន និងដើម្បីពិនិត្យ វាយតម្លៃ លើសមត្ថភាព នៃការបែងចែកជនរងគ្រោះ ការសង្គ្រោះបឋមលើជនរងគ្រោះនៅកន្លែងកើតហេតុ មុនពេលបញ្ជូនទៅកាន់មន្ទីរពេទ្យ និងការដឹកជញ្ជូនទៅកាន់មន្ទីរពេទ្យ។ វាយតម្លៃ ផែនការ នៃការបញ្ចេញព័ត៌មានជាសាធារណៈ បញ្ហាប្រឈម និងការប្រើប្រាស់សម្រាប់ធនធានសារព័ត៌មាន។
សូមបញ្ជាក់ថា សមយុទ្ធ ទ្រង់ទ្រាយ ធំ REPEX19 គ្រប់ គ្រង គ្រោះអាសន្នប្រចាំអាកាសយានដ្ឋានអន្តរជាតិសៀមរាប នឹងប្រព្រឹត្ត ទៅនៅថ្ងៃទី១៨ ខែធ្នូ ឆ្នាំ ២០១៩ខាងមុខនេះ៕
អត្ថបទ និង រូបថត រដ្ឋបាលខេត្តសៀមរាប
