ទូរទស្សន៍សិង្ហបុរី Channel News Asia បានផ្សព្វផ្សាយព័ត៌មាន ឲ្យដឹងនៅថ្ងៃទី១៧ ខែវិច្ឆិកា ឆ្នាំ ២០១៩ថា បុរសជនជាតិអូស្ត្រាលី ម្នាក់ត្រូវបានគេ ចោទប្រកាន់ពីបទបង្កឲ្យមានអគ្គីភ័យ ដោយចេតនា ដើម្បីការពារដំណាំកញ្ឆា របស់គាត់ដែលបង្កឱ្យមានភ្លើងឆេះព្រៃ ដែលមិនអាចគ្រប់គ្រងបាន ខណៈដែលភ្លើងបានឆាបឆេះ នៅតាម ឆ្នេរសមុទ្រភាគ ខាងកើតរបស់ប្រទេសនេះ ។
ក្នុងករណីនេះត្រូវបានគេឲ្យដឹងថា មានមនុស្ស៤នាក់ត្រូវបានបាត់បង់ជីវិត និងផ្ទះជាង៣០០ ខ្នងត្រូវបានបំផ្លាញដោយភ្លើងឆេះព្រៃ ដែលបានបំផ្លិចបំផ្លាញផ្ទៃដីជាង ១លានហិកតា នៅតាមបណ្តោយឆ្នេរសមុទ្រ ភាគខាងកើតក្នុងរយៈពេលតែ ជាងមួយសប្តាហ៍ប៉ុណ្ណោះ។
ប៉ូលិសបាននិយាយថា បុរសអាយុ៥១ឆ្នាំ ម្នាក់បានបង្ហាញខ្លួននៅចំពោះ មុខតុលាការក្នុងតំបន់កាលពីថ្ងៃសៅរ៍ ដែលត្រូវបានចោទប្រកាន់ ពីបទមានចេតនា ដុតភ្លើងនៅតំបន់ Ebor រដ្ឋ New South Wales ក្នុងគោលបំណងការពារ ដំណាំកញ្ឆារបស់គាត់ ។
ប៉ូលិសបានឲ្យដឹងថា ការប៉ុនប៉ងបានផ្ទុះឡើងកាលពីថ្ងៃព្រហស្បតិ ហើយអ្នកពន្លត់អគ្គីភ័យបានព្យាយាមធ្វើការ ពន្លត់ភ្លើងនេះផងដែរ ៕
ប្រភព៖ ដើមអំពិល
ដោយ៖ ម៉ៅ បុប្ផាមករា
