តាមរយៈជំនួយឧបត្ថម្ភថវិការរបស់ស្ថាប័ន APIWSA និង ក្រុមហ៊ុនHONDA ដោយមានកិច្ចសហការផ្ទាល់ពីនាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក របស់ក្រសួងសាធារណការនិងដឹកជញ្ជូន សាលាខេត្តសៀមរាប កាកបាទក្រហមកម្ពុជា អង្គការខេមសែហ្វ វិទ្យុFM១០២ ជាមួយនឹងដៃគូពាក់ព័ន្ធសំខាន់ៗនោះ នៅព្រឹកថ្ងៃទី១៩ ខែវិច្ឆិកា ឆ្នាំ២០១៩នេះ គណៈ កម្មាធិការជាតិសុវត្ថិភាពចរាចរណ៍ផ្លូវគោក បានរៀបចំពិធីវគ្គបណ្ដុះបណ្ដាលស្ដីពី ការបើកបរប្រកបដោយសុវត្ថិភាព និងហានិភ័យនៃការបើកបរក្រោមឥទ្ធិពលនៃគ្រឿងស្រវឹង នៅវិទ្យាល័យ ១០មករា ១៩៧៩ ក្រោមអធិបតីភាពលោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈ កម្មាធិការជាតិសុវត្ថិភាពចរាចរណ៍ផ្លូវគោក និង លោក ពិន ប្រាកដ អភិបាលរងខេត្តសៀមរាប ដោយមានការចូលរួមពីសំណាក់អ្នកស្រី អូលីវ្យែ វាយឌែន តំណាងរបស់ស្ថាប័ន APIWSA , លោក ដួង យ៉ាណាត តំណាងក្រុមហ៊ុនHONDA និង លោក ខឹម សុផល ប្រធានគំរោងសុវត្ថិភាពចរាចរណ៍ របស់កាកបាទក្រហមកម្ពុជា និងជាឧត្តមទីប្រឹក្សាបច្ចេកទេសអង្គការ CAMSAFE , ថ្នាក់ដឹកនាំមន្ទីរអង្គភាពជុំវិញខេត្ត , អាជ្ញាធរមូលដ្ឋាន ,លោកគ្រូអ្នកគ្រូ សិស្ស និស្សិត យុវជន អ្នកស្ម័គ្រចិត្ត និងវិស័យឯកជន ប្រមាណចំនួន៣០០នាក់ ។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា៖ គ្រោះថ្នាក់ចរាចរណ៍ បានបង្កឲ្យមានការខាតបង់ទ្រព្យសម្បត្ដិ អាយុជីវិតមនុស្ស និងបន្សល់ទុកនូវបញ្ហាពិការភាព កុមារកំព្រា ស្ដ្រីមេម៉ាយ ចាស់ឥតទីពឹង និងបញ្ហាសង្គមផ្សេងៗមួយចំនួនទៀត បើទោះបីជាបញ្ហាទាំងអស់នេះ បង្កឡើងដោយបុគ្គលម្នាក់ ឬមនុស្សមួយក្រុមក៏ពិតមែន ប៉ុន្តែវាជាភារកិច្ចទទួលខុសត្រូវរួមរបស់យើងទាំងអស់គ្នា ។
លោក ពិន ប្រាកដ មានប្រសាសន៍បន្ថែមថា ក្នុងនាមក្រុមប្រឹក្សាខេត្ត និង អាជ្ញាធរខេត្ត សូមអំពាវនាវដល់សិស្សានុសិស្ស យុវជន បងប្អូនប្រជាពលរដ្ឋទាំងអស់ សូមមេត្ដាចូលរួមចំណែកតាមរយៈការអនុវត្ដជាក់ស្ដែងលើការប្រើប្រាស់មួកសុវត្ថិភាពក្នុងពេលបើកបរ និងធ្វើដំណើរតាមម៉ូតូនិងគោរពច្បាប់ចរាចរណ៍ផ្លូវគោកឱ្យបានជាប្រចាំ ជាពិសេសគឺការដាស់តឿនរំលឹកក្រុមគ្រួសារ កូនចៅ មិត្តភ័ក្ត្រ ដែលមិនទាន់យល់ដឹង ចេះច្បាប់ ឱ្យពួកគាត់បានយល់ដឹងកាន់តែច្បាស់ពីសារៈសំខាន់នៃការប្រើប្រាស់ផ្លូវថ្នល់ និងជំរុញឱ្យមានគោរពច្បាប់ចរាចរណ៍នៅគ្រប់ពេលធ្វើដំណើរតាមយានយន្ត ដែលទាំងអស់នេះ សុទ្ឋតែជាកត្តាអាចជួយឱ្យចៀសផុតពីគ្រោះថ្នាក់ចរាចរណ៍ជាយថាហេតុបាន ដើម្បីលើកកម្ពស់សុវត្ថិភាពចរាចរណ៍ផ្លូវគោក ទាំងអស់គ្នា ។
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍ថា៖សុវត្ថិភាពចរាចរណ៍ គឺជាបញ្ហាសុខភាពសាធារណៈ និងការងារអភិវឌ្ឍន៍ដ៏ចំបង ដែលទាមទារឲ្យមានការដោះស្រាយបន្ទាន់ ព្រោះចំនួនអ្នកស្លាប់ដោយគ្រោះថ្នាក់ចរាចរណ៍លើពិភពលោក នៅតែមានចំនួនខ្ពស់ និងបន្ដកើនឡើងយ៉ាងខ្លាំង ដែលមានចំនួនប្រមាណ ១,៣៥លាននាក់ជារៀងរាល់ឆ្នាំ ដូច្នេះ តាម រយៈនៃការបើកវគ្គបណ្ដុះបណ្ដាលនាពេលនេះ គឺជាកិច្ចគាំទ្រដល់ការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការសម្រេចឲ្យបាននូវផែនការសកម្មភាពជាតិសុវត្ថិភាពចរាចរណ៍ផ្លូវគោក ២០១១- ២០២០ សំដៅកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍លើដងផ្លូវក្នុងប្រទេសកម្ពុជា ។
លោកជំទាវ មឹន មាណវី មានប្រសាសន៍បន្ថែមថា កម្មវិធីនៃគម្រោងនេះ ថាគឺពិតជាឆ្លើយតបនឹងកាលៈទេសៈដែលរាជរដ្ឋាភិបាលកម្ពុជាកំពុងពុះពារយ៉ាងសកម្មទប់ស្កាត់លុបបំបាត់គ្រោះថ្នាក់ចរាចរណ៍ដែលបច្ចុប្បន្នកំពុងស្ថិតនៅក្នុងក្តីបារម្ភនៅឡើយ ដូច្នេះសូមផ្តាំផ្ញើដល់យុវជន ដែលជាទំពាំងស្នងឬស្សីរបស់ប្រទេសជាតិ ត្រូវធ្វើជាគំរូក្នុងការគោរពច្បាប់របស់ប្រទេសជាតិយើង ដែលផ្តើមពីច្បាប់ស្តីពីចរាចរណ៍ផ្លូវគោកចាប់ពីពេលនេះទៅ ព្រោះថាសកម្មភាពរបស់យើងក្នុងគោរព និងអនុវត្តច្បាប់គឺបានបង្ហាញយ៉ាងច្បាស់អំពីឥរិយាបថ និងស្មារតីទទួលខុសត្រូវយ៉ាងជាក់ស្តែង។
គួររំលឹកថា នៅក្នុងត្រីមាសទី៣ នៃឆ្នាំ២០១៩នេះ គ្រោះថ្នាក់ចរាចរណ៍ កើតឡើងចំនួន ៩៨៨លើកនៅលើដងផ្លូវនៃព្រះរាជា ណាចក្រកម្ពុជា ដែលបណ្តាលឱ្យមានអ្នកស្លាប់ចំនួន ៤៨៨នាក់ និងរបួសចំនួន១,៤៩៤នាក់ ក្នុងនោះខេត្តសៀមរាប ស្លាប់ចំនួន៣៧ នាក់ ហើយមូលហេតុដែលបង្កឲ្យមានគ្រោះថ្នាក់ គឺនៅតែបណ្តាល មកអំពីបើកបរល្មើសល្បឿនកំណត់ ៣៣ភាគរយ , ការមិនគោរពសិទ្ធអទិភាព ២៧ភាគរយ , ការមិនប្រកាន់ស្តាំ ១៣ភាគរយ , ការ វ៉ាជែង ១០ភាគរយ , ការបត់ ភាគរយ , ស្រវឹង ៤ភាគរយ , កត្តា យាន យន្ត ៣ភាគរយ , និងងងុយ១ភាគរយ ។
បើប្រៀបធៀបនឹងឆមាសទី៣ ឆ្នាំ២០១៨ គ្រោះថ្នាក់ចរាចរណ៍កើនឡើងចំនួន ៣២ភាគរយ ដែលក្នុងចំណោមចំនួនអ្នកស្លាប់ដោយគ្រោះថ្នាក់ចរាចរណ៍ ៨០ភាគរយ គឺជាអ្នកបើកបរម៉ូតូ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
