លោកឧត្តមសេនីយ៍ត្រី ភឹង ចិន្តារ៉េត ស្នងការរងនៃស្នងការដ្ឋាននគរបាលខេត្តសៀមរាប បានឲ្យដឹងថា : ជនជាតិចិនចំនួន២នាក់ ត្រូវបានកម្លាំងសមត្ថកិច្ចនគរបាលខេត្តសៀមរាបឃាត់ខ្លួន ដែលជាប់សង្ស័យពាក់ព័ន្ធនឹងករណីលួចម៉ូតូ០១គ្រឿង ម៉ាកហុងដាឃ្លីក សេរីឆ្នាំ២០១២ ពណ៌ក្រហមលាយខ្មៅ ពាក់ស្លាកលេខ បាត់ដំបង ១L-៩៣៤៣ បន្ទាប់ពីមានករណីបាត់ម៉ូតូ កាលពីថ្ងៃទី១៨ ខែវិច្ឆិកា ឆ្នាំ២០១៩ នៅចំណុចបាយ័នប៊ូទិកអូតែល ស្ថិតនៅភូមិបន្ទាយចាស់ សង្កាត់ស្លក្រាម ក្រុង/ខេត្តសៀមរាប ។
លោកឧត្តមសេនីយ៍ត្រី ភឹង ចិន្តារ៉េត បានឲ្យដឹងទៀតថា កាលពីព្រឹកថ្ងៃទី១៧ ខែវិច្ឆិកា ឆ្នាំ ២០១៩ មានបុរសជនជាតិថៃម្នាក់ បានមកជួលម៉ូតូមួយគ្រឿងម៉ាកហុងដាឃ្លីកនេះ ចំនួនពីរថ្ងៃ ក្នុងមួយថ្ងៃតម្លៃ១០ដុល្លារអាមេរិក ពីក្រុមហ៊ុន វិមានណេរថួរ ខណៈដែលបុរសជនជាតិថៃរូបនេះ បានស្នាក់នៅបន្ទប់ នៃបាយ័នប៊ូទិកអូតែលនេះតែម្ដង ប៉ុន្តែនៅវេលាម៉ោង១០នាទីព្រឹក ថ្ងៃទី១៨ ខែវិច្ឆិកា ឆ្នាំ២០១៩ បុរសជនជាតិថៃនោះ ក៏ខាងបានទូរស័ព្ទមកប្រាប់ម្ចាស់ក្រុមហ៊ុនវិមានណេរថួរថា ម៉ូតូដែលគេបានជួលជិះនោះបានបាត់ហើយ ហើយម្ចាស់ក្រុមហ៊ុន បានពិនិត្យមើល GPSដែលចាប់ជាប់នឹងម៉ូតូ ឃើញកំពុងធ្វើដំណើរពីសៀមរាបទៅភ្នំពេញ ទើបប្តឹងរាយការណ៍មកសមត្ថកិច្ចតែម្តង។
លោកឧត្តមសេនីយ៍ត្រី ភឹង ចិន្តារ៉េត បានឲ្យដឹងបន្ថែមទៀតថា បន្ទាប់ពីទទួលបានបណ្តឹងពីជនរងគ្រោះ សមត្ថកិច្ចខេត្តសៀមរាប បានទំនាក់ទំនងសហការជាមួយកម្លាំងនគរបាលនាយកដ្ឋានព្រហ្មទណ្ឌ ធ្វើការប្រម៉ាញ់ចាប់បានជនសង្ស័យជនជាតិចិនចំនួន ០២នាក់ ម៉ូតូ ០១គ្រឿង និងគ្រឿងសម្ភារកាត់សោ គាស់ទូរដែកមួយចំនួនទៀត ហើយជនសង្ស័យទាំងពីរនាក់ ត្រូវបានសមត្ថកិច្ច កសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តតាមនីតិវិធីបន្ត ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
