នៅរសៀលថ្ងៃទី១៨ ខែវិច្ឆិកា ឆ្នាំ២០១៩នេះ លោក លី សេងហួរ ម្ចាស់កីឡដ្ឋាន KDR ក្នុងក្រុងសៀមរាប បានប្រកាសបង្កើតក្លឹបបាល់ទាត់ជាផ្លូវការ ដែលមានឈ្មោះថា សៀមរាបយូណាយធីត (SIEM REAP UNITED FOOTBALL CLUB) ព្រមទាំងមានការចុះហត្ថលេខាលើអនុស្សារណៈសហការគ្នាពាក់ព័ន្ឋទៅនឹងវិស័យកីឡា ជាមួយភ្នាក់ងារបាល់ទាត់ Bolabros និង ក្រុមហ៊ុនសម្ភារកីឡា Kaki Jersi មកពីប្រទេសម៉ាឡេស៊ី ។
លោក លី សេងហួរ ស្ថាបនិកក្លឹបនិង និងជាម្ចាស់កីឡដ្ឋាន KDR បានឱ្យដឹងថា ៖ កីឡដ្ឋាន KDR មានទីតាំងនៅក្នុងសង្កាត់ស្វាយដង្គំ ក្រុងសៀមរាប ហើយលោកបានសម្រេចបង្កើតក្លឹបបាល់ទាត់ដ៏ថ្មីស្រឡាងនេះ គឺដើម្បីរួមចំណែកអភិវឌ្ឍន៍ និង កសាងធនធានមនុស្សផ្នែកបាល់ទាត់របស់កម្ពុជា ហើយក្រៅពីការបង្កើតទំនាក់ទំនងជាមួយភាគីសំខាន់ទាំងពីរខាងលើ ក្លឹបនេះទទួលបានអត្ថប្រយោជន៍ជាច្រើនក្នុងភាពសហការជាដៃគូពីភាគីខាងលើ មានទាំងការជួយផ្គត់ផ្គង់សម្ភារដល់ក្រុមការងារ កីឡាករ និងកម្មវិធីបាល់ទាត់ទាំងជាតិ និងអន្តរជាតិផងដែរ ខណៈបច្ចុប្បន្នក្លឹបនេះ បាននឹងកំពុងរៀបចំប្រកួតពានរង្វាន់បាល់ទាត់សម្រាប់យុវជនអាយុក្រោម១១ឆ្នាំ និង អាយុក្រោម១៣ឆ្នាំ ដែលគ្រោងនឹងធ្វើឡើង នៅថ្ងៃអាទិត្យ ទី១៩ ខែមករា ឆ្នាំ២០២០ ដោយស្ថិតក្នុងគម្រោងសហប្រតិបត្តិការនេះដែរ ។
លោក លី សេងហួរ បានឱ្យដឹងទៀតថា ចំពោះកិច្ចចុះហត្ថលេខាលើអនុស្សារណៈនេះ គឺជាកិច្ចសហប្រតិបត្តិការដ៍ល្អមួយ ដែលនឹងជួយជំរុញដល់វិស័យកីឡា និងវិស័យទេសចរណ៍របស់កម្ពុជានៅខេត្តសៀមរាប ឱ្យកាន់តែរឹងមាំ និងខ្លាំងក្លាឡើង ដើម្បីឈានទៅប្រកួតក្នុងប្រទេស និងក្នុងតំបន់ ហើយ Bolabros គឺជាភ្នាក់ងាររៀបចំព្រឹត្តិការណ៍ប្រកួតបាល់ទាត់អន្តរជាតិរវាងប្រទេសនិងប្រទេស ចំណែកឯក្រុមហ៊ុន Kaki Jersi វិញ គឺជាក្រុមហ៊ុនផលិតសម្លៀកបំពាក់កីឡាដែលមានគុណភាពខ្ពស់មួយនៅប្រទេសម៉ាឡេស៊ី ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
