នៅវេលាម៉ោង៩និង២០នាទីព្រឹក ថ្ងៃទី២០ ខែវិច្ឆិកា ឆ្នាំ២០១៩នេះ ឯកឧត្ដម យូ ហេនរី វ៉ាន់ ធីអូ (U Henry Van Thio) អនុប្រធានាធិបតីនៃសាធារណរដ្ឋសហព័ន្ធមីយ៉ាន់ម៉ា បានអញ្ជើញមកដល់ទឹកដីនៃខេត្តសៀមរាប តាមជើងយន្តហោះពីរាជធានីភ្នំពេញ បន្ទាប់ពីឯកឧត្ដមបានអញ្ជើញចូលរួមក្នុងកិច្ចប្រជុំកំពូលអាស៊ីប៉ាស៊ីហ្វិក លើកទី២ ឆ្នាំ២០១៩ កាលពីថ្ងៃទី១៩ ខែវិច្ឋិកាម្សិលមិញនេះ នៅរាជធានីភ្នំពេញ ។
មានវត្តមាន អញ្ជើញទទួលបដិសណ្ឋាកិច្ច ចំពោះ ឯកឧត្ដម យូ ហេនរី វ៉ាន់ ធីអូ នៅឯព្រលានយន្តហោះអន្តរជាតិសៀមរាប ក្នុងឱកាសនោះ រួមមានលោក ពិន ប្រាកដ អភិបាលរងខេត្ត ជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត និង មន្ត្រីសាលាខេត្តជាច្រើនរូបទៀត ។
សូមជម្រាបថា ឯកឧត្ដម យូ ហេនរី វ៉ាន់ ធីអូ អនុប្រធានាធិបតីនៃសាធារណរដ្ឋសហព័ន្ធមីយ៉ាន់ម៉ា ក្នុងដំណើរទស្សនៈកិច្ចនៅក្នុងខេត្តសៀមរាប នាពេលនេះ ឯកឧត្ដមនឹងទៅទស្សនាប្រាសាទអង្គរវត្ត និង ប្រាសាទមួយចំនួនទៀត មុនចាកចេញពីព្រលានយន្តហោះអន្តរជាតិសៀមរាប នៅវេលាម៉ោងប្រមាណ០៣និង៣០នាទីរសៀលថ្ងៃដដែលនេះ ។
សូមរំលឹកដែរថា ឯកឧត្ដម យូ ហេនរី វ៉ាន់ ធីអូ បានអញ្ជើញមកប្រទេសកម្ពុជា ដើម្បីមកចូលរួមក្នុងកិច្ចប្រជុំកំពូលអាស៊ីប៉ាស៊ីហ្វិក លើកទី២ ឆ្នាំ២០១៩ នៅរាជធានីភ្នំពេញ ដែលរៀបចំជាលើកដំបូងដោយព្រះរាជាណាចក្រកម្ពុជា ខណៈដែលកិច្ចប្រជុំកំពូលអាស៊ីប៉ាស៊ីហ្វិក លើកទី១ កាលពីឆ្នាំ ២០១៨ រៀបចំនៅប្រទេសនេប៉ាល់។ បន្ទាប់ពីកិច្ចប្រជុំកំពូលអាស៊ីប៉ាស៊ីហ្វិក សម្ដេចតេជោ ហ៊ុន សែន ក៏បានជួបពិភាក្សាការងារជាមួយ ឯកឧត្ដម យូ ហេនរី វ៉ាន់ ធីអូ លើកិច្ចការជំរុញទំហំពាណិជ្ជកម្ម និងកិច្ចសហប្រតិបត្តិការបន្ថែមទៀត លើវិស័យវប្បធម៌ និងទេសចរណ៍ផងដែរ។
អត្ថបទ និង រូបថត ៖ លោក លីវ សាន្ត
