នាព្រឹកថ្ងៃទី២០ ខែវិច្ឆិកា ឆ្នាំ២០១៩ ក្រុមហ៊ុន គួម៉ី លីកើ គ្រុប (GUOMEI LIQUOR GROUP) នៃខេត្តសានតុង សាធារណរដ្ឋប្រជាមានិតចិន បានចុះហត្ថលេខាជាមួយក្រុមហ៊ុន ប្រាយវេយ៍ (Brightway Group) លើកិច្ចព្រមព្រៀងសហប្រតិបត្តិការជាយុទ្ធសាស្ត្រ ស្តីពីការដោយជ្រើសរើសយកខេត្តសៀមរាប ជាទីតាំងបង្កើតរោងចក្រផលិត ជី កសិកម្ម សរីរាង្គ ដោយជ្រើសរើសយកខេត្តសៀមរាប ។
កិច្ចព្រមព្រៀងនេះ ផ្អែកលើកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ រវាងព្រះរាជាណាចក្រកម្ពុជា ជាមួយសាធារណរដ្ឋប្រជាមានិតចិន និងឈរលើគំនិតផ្តួចផ្តើម របស់រដ្ឋាភិបាលនិងប្រជាជនចិន (ផ្លូវមួយ ខ្សែក្រវ៉ាត់មួយ)។
តាមរយៈការបង្កើតរោងចក្រនេះ គេសង្ឃឹមថា មិនត្រឹមតែបានកាត់បន្ថយការនាំចូលជីកសិកម្មពីបរទេស ចូលមកកម្ពុជាប៉ុណ្ណោះទេ ក៏ប៉ុន្តែប្រជាកសិករនឹងទទួលបានតម្លៃជីដ៏សមរម្យជាងមុន និងបង្កើតការងារ សម្រាប់ប្រជាពលរដ្ឋកម្ពុជាផងដែរ ។
ពិធីចុះហត្ថលេខានេះ ក៏មានការផ្សារភ្ជាប់ផងដែរ ជាមួយកិច្ចដំណើរការនៃអង្គសិក្ខាសាលា ស្តីពីកិច្ចសហប្រតិបត្តិការ លើសមត្ថភាពផលិតកម្មរបស់សហគ្រាសកម្ពុជា និងខេត្តសានតុង នៃប្រទេសចិន ក្នុងក្របខណ្ឌនៃគំនិតផ្តួចផ្តើម ផ្លូវមួយ ខ្សែក្រវ៉ាត់មួយ។
ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្មកម្ពុជា ថ្លែងថា តាមរយ: នៃការដាក់ចេញនូវគំនិតផ្តួចផ្តើម ផ្លូវមួយ ខ្សែក្រវាត់មួយ របស់សាធារណរដ្ឋប្រជាមានិតចិន គឺបានរួមចំណែកយ៉ាងសកម្ម ដល់ការជំរុញកិច្ចអភិវឌ្ឍតំបន់ និងសកលលោក។ គំនិតផ្តួចផ្តើមនេះ គឺជាក្របខណ្ឌនៃកិច្ចសហប្រតិបត្តិការសេដ្ឋកិច្ច និងការអភិវឌ្ឍនៅក្នុងតំបន់ ក៏ដូចជានៅក្នុងសកលលោក ហើយក៏ជាយន្តការមួយ ដែលផ្តល់នូវធនធានដល់ប្រទេសនានាលើសកលលោក ពិសេសប្រទេសកំពុងអភិវឌ្ឍសម្រាប់បំពេញគម្លាតតម្រូវការហិរញ្ញប្បទាន ដើម្បីបង្កើនការតភ្ជាប់សេដ្ឋកិច្ចរបស់ខ្លួន ។
ឯកឧត្តម បញ្ជាក់ថា តាមរយៈអង្គសិក្ខាសាលានេះដែរ មានក្នុងគោលបំណង ជំរុញកិច្ចសហប្រតិបត្តិការវិនិយោគ របស់សហគ្រាសនៃខេត្តសានតុង មកធ្វើការវិនិយោគនៅកម្ពុជា ដែលវានឹងបង្កើននូវចំណងមិត្តភាពកិច្ចសហប្រតិបត្តិការអន្តរជាតិ និងការយោគយល់គ្នា ដើម្បីពង្រឹងលើការលើកកម្ពស់ការអភិវឌ្ឍន៍វិស័យសេដ្ឋកិច្ច កំណើនការងារ ពង្រឹងគុណភាពជីវិតរស់នៅរបស់ប្រជាពលរដ្ឋ និងដើម្បីផលប្រយោជន៍ទៅវិញទៅមក សម្រាប់ភាគីទាំងពីរ កម្ពុជា-ចិន។
លោក នាក់ ណេរ៉ុន អភិបាលរងខេត្តសៀមរាប ក៏បានបង្ហាញនូវការចាប់អារម្មណ៍ផងដែរថា ៖ សម្រាប់ការចូលរួមរបស់រាជរដ្ឋាភិបាលកម្ពុជា ក្នុងការអនុវត្តគំនិតផ្តួចផ្តើម ផ្លូវមួយ ខ្សែក្រវាត់មួយ បានធ្វើឲ្យខេត្តសៀមរាប ទទួលបាននូវអត្ថប្រយោជន៍យ៉ាងច្រើន លើវិស័យសេដ្ឋកិច្ច សង្គម និងវប្បធម៌ ។ នាពេលបច្ចុប្បន្ន ខេត្តសៀមរាប មានចំណងសម្ព័ន្ធមេត្រីភាពជាមួយបណ្តាខេត្ត-ក្រុង នៃសាធារណរដ្ឋប្រជាមានិតចិន សរុបចំនួន ២៨ខេត្ត-ក្រុង និងមានក្រុមហ៊ុន និងសហគ្រាសចិន ចំនួន ១៩៤ បាននិងកំពុងប្រតិបត្តិការវិនិយោគរបស់ខ្លួនក្នុងខេត្តសៀមរាប ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
