ប្រធានាធិបតីអាមេរិកលោក ដូណាល់ ត្រាំ បានបង្កភាពភ្ញាក់ផ្អើលមួយដោយបង្ហោះរូបភាពបង្ហាញសាច់ដុំបែបកាត់ត នៅក្នុងកម្មវិធី Photoshop បន្ទាប់ពីមានពាក្យចចាមអារ៉ាមជាច្រើនពាក់ព័ន្ធនឹងបញ្ហាសុខភាពរបស់លោក។នេះបើតាមការចេញផ្សាយដោយសារព័ត៌មាន South China Morning Postនៅរសៀលថ្ងៃព្រហស្បតិ៍ ទី២៨ ខែវិច្ឆិកា ឆ្នាំ២០១៩។
លោក ដូណាល់ ត្រាំ បានបង្ហោះរូបភាពកាត់តខាងលើនៅក្នុងគណនី Twitter របស់លោកនៅថ្ងៃពុធសប្ដាហ៍នេះ (ម៉ោងនៅវ៉ាស៊ីនតោន) ហើយហេតុផលនៅពីក្រោយការបង្ហោះនេះ មិនទាន់មានការបញ្ជាក់នៅឡើយទេ ខណៈវាកើតឡើងក្រោយប្រធានាធិបតីអាមេរិករូបនេះ ត្រូវបានគេរាយការណ៍ថា បានធ្វើដំណើរគ្មានការគ្រោងទុកទៅកាន់មន្ទីរពេទ្យរដ្ឋាភិបាល នៅខាងក្រៅទីក្រុងវ៉ាស៊ីនតោនកាលពីថ្ងៃសៅរ៍សប្ដាហ៍មុន។
ម្យ៉ាងវិញទៀត លោក ត្រាំ ផ្ទាល់ក៏មិនបានសរសេររៀបរាប់អ្វី នៅលើរូបភាពនេះដែរ តែអ្វីដែលគេដឹងកាលពីប៉ុន្មានថ្ងៃមុននេះ លោកបានព្យាយាមបង្ហោះសារមួយចំនួន ដើម្បីបញ្ចប់ការជជែកគ្នាពីបញ្ហាសុខភាពរបស់លោក។
សូមបញ្ជាក់ផងដែរថា ទោះបីជាលោកមិនបានសរសេរអ្វីក្តី ក៏រូបភាពបែបនេះគឺបង្ហាញអំពីភាពរឹងមាំនៃរាងកាយរបស់មនុស្ស ដែលអាចនិយាយបានថា ជាសាររូបភាពបង្ហាញពីសុខភាពដ៏រឹងមាំរបស់លោក៕
