មនុស្សប្រុសស្រី អាយុចាប់ពី០៥ឆ្នាំ ដល់អាយុ៦៨ឆ្នាំ ចំនួន២៨នាក់ ស្ថិតនៅក្នុងស្រុកពួក ខេត្តសៀមរាប បានពុលត្រីប្រៃកំពឹស កាលពីវេលម៉ោងប្រមាណ៤ល្ងាច ថ្ងៃទី០២ ខែធ្នូ ឆ្នាំ២០១៩ម្សិលមិញនេះ។ ប៉ុន្តែ អាការៈពុលនោះ ពុំធ្ងន់ធ្ងរបណ្ដាលឲ្យប៉ះពាល់ដល់អាយុជីវិតនោះទេ។
តាមការស្រាវជ្រាវរបស់សមត្ថកិច្ចជំនាញ បានឲ្យដឹងថា អ្នកផលិតត្រីប្រៃកំពឹស រស់នៅភូមិគោកជួន ឃុំពួក ស្រុកពួក ខេត្តសៀមរាប និងប្រកបរបរផលិតត្រីប្រៃលក់ផ្សារពួក ស្រុកពួក ជាអចិន្ត្រៃយ៍។ តែសមត្ថកិច្ចនៅពុំទាន់បានដឹងថា អាការៈពុលនោះ បណ្ដាលមកពីអ្វីនៅឡើយទេ។
សូមជម្រាបថា ឃុំដែលមានប្រជាពលរដ្ឋពុលត្រីប្រៃកំពឹសមាន ឃុំពួកមានចំនួន ២១នាក់ និងឃុំខ្នាត ចំនួន០៧នាក់។ បន្ទាប់ ការហូបត្រីប្រៃកំពឹស និងកើតមានអាការៈពុលក្អួតចង្អោរ ក្រុមគ្រួសារបានបញ្ជូន ជនរងគ្រោះទៅសម្រាកព្យាបាល នៅមន្ទីរពេទ្យបង្អែកខេត្តសៀមរាប មន្ទីរពេទ្យបង្អែកពួក មណ្ឌលសុខភាពទឹកវិល មណ្ឌលសុខភាពខ្នាត នៅគ្លីនិចឯកជន និង អ្នកជំងឺមួយចំនួនបានសម្រាកព្យាបាលនៅផ្ទះរបស់ខ្លួនក្នុងខេត្តសៀមរាប ។
ព័ត៌មានជាតិ ថ្មីៗ
អត្ថបទ និង រូបភាព៖ មន្ទីរព័ត៌មានខេត្តសៀមរាប
