នាព្រឹកថ្ងៃទី ០៣ ខែ ធ្នូ ឆ្នាំ២០១៩នេះ នៅស្រុកស្រីស្នំ ខេត្តសៀមរាប មានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០១៩ ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្តស្តីទី និង លោកពិន ប្រាកដ អភិបាលរងខេត្តសៀមរាប និងនិមន្ត អញ្ជើញចូលរួមពីព្រះសង្ឃ ថ្នាក់ដឹកនាំមន្ទីរ-អង្គភាព អង្គការសង្គមស៊ីវិល អាជ្ញាធរ សិស្សានុសិស្ស និង ប្រជាពលរដ្ឋមកពី ស្រុកក្រឡាញ់ និង ស្រុកស្រីស្នំ ចំនួននាក់៦០៧ ក្នុងនោះស្រី ១៣៣នាក់ ។
វេទិកានេះ មានគោលបំណង ផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ នៅក្នុងស្រុកទាំងពីរនេះ បានស្វែងយល់ពីស្ថានភាពទូទៅ នៃការអភិវឌ្ឍខេត្ត ក្រុង-ស្រុក ឃុំ-សង្កាត់ និង បញ្ហាប្រឈម ដែលកើតកន្លងមក ហើយវេទិកានេះ ក៏នឹងផ្តល់ឱកាស ឲ្យអ្នកចូលរួមទាំងអស់ បញ្ចេញនូវមតិយោបល់របស់ខ្លួនពាក់ព័ន្ធនឹងកង្វល់ សំណូមពរ តម្រូវការជាក់ស្តែងក្នុងមូលដ្ឋាន ។
ជារួម សំណួរ និងសំណូមពររបស់ប្រជាពលរដ្ឋនៅមូលដ្ឋាន ដែលបានលើកនៅក្នុងវេទិកានោះ បានផ្តោតទៅលើ បញ្ហាតម្លៃអគ្គិសនី ,ការងារអប់រំ បញ្ហាផ្លូវថ្នល់ ការសុំបង្កើតរចនាសម្ព័ន្ធភូមិ បញ្ហាសេវាសាធារណៈ ប្រព័ន្ធធារាសាស្ត្រ សាងសង់មណ្ឌលសុខភាព និង ហេដ្ឋារចនាសម្ព័ន្ធ ។ ក្នុងនោះក៏មានលើកនូវសំណួរ និង សំណូមពរផ្ទាត់មាត់មានចំនួន២៣ របស់សមាជិកអង្គវេទិកាដែលបានសរសេរដាក់ប្រអប់បានលើកឡើង ក្នុងនោះមាន ៣៣ សំណួរ និង សំណូមពរផងដែរ ។ ក្នុងនោះ មានសំណួរ និង សំណូមពរផ្ទាត់មាត់មានចំនួន២៣ និង ៣៣ សំណួរ និងសំណូមពរសរសេរលើក្រដាស់ ។
ជាការឆ្លើយតប ចំពោះសំណួរ និង សំណូមពរផ្ទាត់មាត់ចំនួន២៣ ត្រូវបានបណ្តាមន្ទីរ អង្គភាពពាក់ព័ន្ធ ធ្វើការបកស្រាយ ដោយឡែក សំណួរ និងសំណូមពរសរសេរលើក្រដាស់ ៣៣ផ្សេងទៀត ក្រុមប្រឹក្សាខេត្ត នឹងយកសំណួរ និង សំណូមពរទាំងនោះ ទៅពិនិត្យ ពិភាក្សា ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតប និង ជម្រាបជូនដំណឹងជាលាយលក្ខអក្សរ ដល់ម្ចាស់សំណួរ តាមកាលវេលាសមគួរ តាមរយៈមេឃុំ ក្រុមប្រឹក្សាឃុំ នៅតាមមូលដ្ឋាននីមួយៗ។
មានប្រសាសន៍ក្នុងវេទិកានោះ លោក ពិន ប្រាកដ បានធ្វើការថ្លែងអំណរគុណដល់សមាជិកសមាជិកានៃ អង្គវេទិកា ដែលបានលើកនូវចំណុចល្អៗដែលជាទុក្ខកង្វល់របស់បងប្អូននៅក្នុងមូលដ្ឋាន ពិតជាកម្លាំងចលករក្នុងការជំរុញឲ្យមាន ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ឲ្យកាន់តែមានល្បឿនទៅមុខ និងបានចាក់ឬសចូលជ្រៅដល់មូលដ្ឋាន ។
មានមតិបូកសរុបនិងបិទអង្គវេទិកានោះ ឯកឧត្តម អ៊ាន ឃុន ក៏បានធ្វើការថ្លែងអំណរគុណ ដល់បងប្អូនដែលបានចំណាយពេលចូលរួម ក្នុងអង្គវេទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០១៩ដែលបានធ្វើឲ្យយើង បានយល់កាន់តែច្បាស់រាល់ការអភិវឌ្ឍន៍របស់រាជរដ្ឋាភិបាល ក៏ដូចអាជ្ញាធរខេត្ត ក្រុង-ស្រុក និង ដឹងពីទុក្ខកង្វល់របស់ប្រជាពលរដ្ឋនៅតាមមូលដ្ឋាន និង តម្រូវការចាំបាច់របស់ប្រជាពលរដ្ឋផងដែរ ។ អង្គវេទិការយៈពេលពេញមួយព្រឹកនេះ ជាសញ្ញាវិជ្ជមានថ្មីបន្ថែមទៀត ចំពោះ កិច្ចខិតខំប្រឹងប្រែង ក្នុងកិច្ចពិគ្រោះយោបល់ ពិភាក្សា ដើម្បីពិនិត្យ ពិចារណា និង ធ្វើការឆ្លុះបញ្ចាំងទៅលើសមិទ្ធផលដែលសម្រេចបាន និង បញ្ហាប្រឈមក្នុងឆ្នាំ២០១៩ និងគម្រោងសកម្មភាពជាអាទិភាពសម្រាប់ឆ្នាំ២០២០របស់រដ្ឋបាលខេត្ត ដែលជាកម្លាំងចលករជម្រុញឲ្យការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិកាន់តែមានល្បឿនទៅមុខឥតឈប់ឈរ ហើយក៏ជាកាយវិការដ៏ប្រពៃ សំដៅធ្វើឲ្យថ្នាលនៃលទ្ធិប្រជាធិបតេយ្យនៅកម្ពុជា កាន់តែចាក់ឬសយ៉ាងជ្រៅ នៅតាមសហគមមូលដ្ឋានរបស់យើង ហើយ ព្រឹត្តិការណ៏នាថ្ងៃនេះ វាក៏ជាយន្តការមួយក្នុងការពង្រឹងនីតិរដ្ឋ និង អភិបាលកិច្ចល្អនៅមូលដ្ឋាន។
អត្ថបទ និង រូបភាព៖ ខេង ឧត្តម
កែសម្រួលអត្ថបទ៖ សេង ផល្លី
