នៅព្រឹកថ្ងៃទី០៤ ខែធ្នូ ឆ្នាំ២០១៩នេះ មន្ទីរកិច្ចការនារីខេត្តសៀមរាប បានបន្តយុទ្ធនាការ ១៦ថ្ងៃបញ្ឈប់អំពើហិង្សាលើស្រ្តី ក្រោមប្រធានបទស្តីពី ក្រោមប្រធានបទស្តីពី រួមគិត រួមធ្វើ រួមដោះស្រាយ ដើម្បីបញ្ឈប់អំពើហិង្សាលើស្រ្តី និងក្មេងស្រី ដែលយុទ្ធនាការនេះ បានធ្វើឡើងនៅក្នុងវិទ្យាល័យហ៊ុន សែនសៀមរាប ក្នុងក្រុងសៀមរាប ក្រោមអធិបតីភាពលោកស្រី យូ សុភា អភិបាលរងខេត្តសៀមរាប ដោយមានការចូលរួមពីសំណាក់ លោកលោកស្រីអភិបាលអភិបាលរងក្រុង/ស្រុក លោកលោកស្រីប្រធានអនុប្រធានមន្ទីរអង្គភាពជុំវិញខេត្ត តំណាងអង្គការជាដែគូ និងមន្ត្រីរាជការនៃមន្ទីរកិច្ចការនារីខេត្ត លោកនាយកសាលា សិស្សានុសិស្ស និងប្រជាពលរដ្ឋក្នុងមូលដ្ឋានប្រមាណជាង៣០០នាក់ ។
បើតាមលោកស្រី ហិញ ហាច ប្រធានមន្ទីរកិច្ចការនារីខេត្តសៀមរាប បានថ្លែងថា យុទ្ធនាការ១៦ ថ្ងៃ បញ្ឈប់អំពើហិង្សាលើស្រ្តីនេះ ត្រូវបានរៀបចំធ្វើឡើងជារៀងរាល់ឆ្នាំនៅទូទាំងពិភពលោក ដែលរហូតមកដល់បច្ចុប្បន្នទិវានេះ បានក្លាយទៅជាទិវាអន្តរជាតិ ដែលអង្គការសហប្រជាជាតិបានកំណត់ជាផ្លូវការលេខ A/RES/54/134 ចុះថ្ងៃទី១៧ ខែធ្នូ ឆ្នាំ១៩៩៩ ហើយនឹងបានប្រកាសទទួលស្គាល់ថា ជាទិវាអន្តរជាតិ លុបបំបាត់អំពើហឹង្សាលើស្ត្រី តាមរយ:មហាសន្និបាតលើកទី៨៣ របស់អង្គការសហប្រជាជាតិ ដូច្នេះក្នុងកំឡុងពេលនៃយុទ្ធនាការ១៦ ថ្ងៃ បញ្ឈប់អំពើហិង្សាលើស្រ្តីនេះ បូរពណ៌ស ត្រូវបានបំពាក់ឲ្យប្រជាពលរដ្ឋ ជាពិសេសបុរស ព្រោះបូរពណ៌សនេះ ជាសញ្ញានៃការសន្យារបស់ពួកគេ ដើម្បីបញ្ឈប់អំពើហឹង្សាលើស្ត្រី ខណៈជាទូទៅនៅថ្ងៃទី២៥ ខែវិច្ឆិកា ត្រូវបានគេចាត់ទុកថា ជាទិវាអន្តរជាតិនៃការសមគ្គីភាពរបស់បុរសប្រឆាំ នឹងអំពើហឹង្សរបស់បុរសលើស្ត្រី ហេតុដូច្នេះហើយ ទើបជារៀងរាល់ឆ្នាំយុទ្ធនាការនេះ ត្រូវបានគេរៀបចំធ្វើឡើងចាប់ពីថ្ងៃទី២៥ ដល់ថ្ងៃទី១០ ខែធ្នូ ។
លោកស្រី យូ សុភា បានមានប្រសាសន៍ថា អំពើហិង្សាក្នុងគ្រួសារ និងការរំលោភបំពានផ្លូវភេទលើស្រ្ដី និងក្មេងស្រីតែងតែកើតមានឡើងជារៀងរាល់ថ្ងៃ និងគ្រប់ទីកន្លែងនៅលើពិភពលោក ហើយអំពើហិង្សាទាំងនោះកើតឡើងមានគ្រប់រូបភាពដោយវាកាន់តែអាក្រក់ទៅៗដែលស្រ្តី និងកុមារីនៅតែបន្តជាកម្មវត្ថុនៃអំពើហិង្សាលើរូបកាយ ផ្លូវចិត្ត ផ្លូវភេទ នៅក្នុងជីវភាពប្រចាំថ្ងៃ ដូច្នេះសកម្មភាពនៃយុទ្ធនាការ១៦ ថ្ងៃ បញ្ឈប់អំពើហិង្សាលើស្រ្តីជាច្រើន ត្រូវបានធ្វើជាសកល ដែលសកម្មភាពសំខាន់ៗទាំងនោះ រួមមាន៖ ការពាក់បូរពណ៌ស ការដើរក្បួនតាមទីសាធារណ: ការរៀបចំអង្គមីទិ្ទញ ការរៀបចំសម្ភារអបរំ ការរៀបចំផ្សព្វផ្សាយតាមប្រព័ន្ធព័ត៍មាន កាសែត ទរទស្សន៍ ការជិះកង់ និងការសំដែងសិល្ប: ជាដើម ។
លោកស្រី យូ សុភា មានប្រសាសន៍បន្តទៀតថា បច្ចុប្បន្នអំពើហិង្សាដែលតែងកើតមាននៅក្នុងសង្គមគឺមាន ៤យ៉ាង គឺអំពើហិង្សាលើផ្លូវកាយ អំពើហិង្សាផ្លូវចិត្ត , ផ្លូវភេទ និង ផ្លូវសេដ្ឋកិច្ច ដែលធ្វើឲ្យប៉ះពាល់យ៉ាងខ្លាំងសីលធម៌នៅក្នុងសង្គមជាតិ និងក្រុមគ្រួសារ ។ ដូច្នេះនៅក្នុងឱកាសនេះដែរលោកស្រីអភិបាលរងខេត្ត ក៏បានធ្វើការអំពាវនាវដល់ប្រជាពលរដ្ឋ អាជ្ញាធរមូលដ្ឋាន យុវជន សិស្សានុសិស្ស សកម្មចូលរួមទប់ស្កាត់ លើកកម្ពស់ការប្រព្រឹត្តបែបវិជ្ជមាន ចំពោះជនរងគ្រោះ និង ងាយរងគ្រោះ ដោយអំពើហិង្សាទាក់ទងនឹងយេនឌ័រ និង លើកទឹកចិត្តយុវជនចូលរួមបញ្ចប់ អំពើហិង្សាលើស្ត្រី និង ក្មេងស្រី គឺចាប់ពីខ្លួននាក់ ។ ក្នុងនោះដែរកត្តាសំខាន់ អាជ្ញាធរមូលដ្ឋានគឺមានតួនាទីយ៉ាងសំខាន់ក្នុងការធានានូវសុវត្ថិភាព ស្ថរភាព ជូន ដល់ប្រជាពលរដ្ឋ និងការលើកកម្ពស់នៃការយល់ដឹងអំពីអំពើហិង្សាលើស្ត្រី និង កុមារ ព្រមទាំងការផ្តល់ឱកាសដល់ ពួកគេចូលរួមពេញលេញ សម្រាប់ស្ត្រី និងកុមារដើម្បីជួយដល់ការអភិវឌ្ឍន៍សង្គមជាតិទៅពេលអនាគត ៕
អត្ថបទ និង រូបភាព៖ អ៊ុន ណារាជ្យ
