ថ្ងៃទី០៣ ខែធ្នូ ឆ្នាំ២០១៩ រដ្ឋបាលខេត្តសៀមរាប បានរៀបចំកិច្ចជំនួបពិភាក្សារវាងថ្នាក់ដឹកនាំខេត្តសៀមរាប ដែលដឹកនាំដោយ លោក លី សំរិទ្ធ អភិបាលរងខេត្ត តំណាងឯកឧត្តម ទៀ សីហា អភិបាល នៃគណៈអភិបាលខេត្ត ជាមួយ ឯកឧត្តម ចាង គូរហ័រ (Zhang Huohua) អភិបាលរងខេត្តយូណាន នៃសាធារណៈរដ្ឋ ប្រជាមានិតចិន ដែលមានការចូលរួមពី លោក នាយករដ្ឋបាលសាលាខេត្ត លោកនាយកទីចាត់ការទំនាក់ទំនងសាធារណៈ និងសហប្រតិបត្តការអន្តរជាតិ លោក អភិបាលរងក្រុងសៀមរាប លោកនាយករងទីចាត់ការអន្តរវិស័យ និងលោកនាយករងទីចាត់ការផែនការ និងវិនិយោគសាលាខេត្តផងដែរ។
កិច្ចជំនួបពិភាក្សានេះ រៀបចំឡើងក្នុងគោលបំណងពិភាក្សាអំពីគម្រោងសាងសង់អាកាសយានដ្ឋានអន្តរជាតិសៀមរាបអង្គរ ការពង្រឹង និងពង្រីកចំណងសម្ព័ន្ធមេត្រីភាព និងកិច្ចសហប្រតិបត្តិការរវាងខេត្តទាំងពីរ និងការប្រគល់រថយន្តបោសសំអាតក្រុង ជូនរដ្ឋបាលខេត្តសៀមរាប។
បន្ទាប់ពី លោក លី សំរិទ្ធ អភិបាលរងខេត្ត បានមានមតិស្វាគមន៍គណៈខេត្តយូណាន ចំពោះដំណើរទស្សនកិច្ចនេះរួចមក ឯកឧត្តម Zhang Huohua បានមានប្រសាសន៍ថា ក្រៅពីគម្រោងសាងសង់អាកាសយានដ្ឋានអន្តរជាតិសៀមរាបអង្គរ ខេត្តយូណាន តាមរយៈកិច្ចសហប្រតិបត្តិការជាមួយរដ្ឋបាលខេត្តសៀមរាប យើងមានគម្រោងជាច្រើងទៀត ដែលគម្រោងទាំងនេះ បាននឹងកំពុងដំណើរការផងដែរ។ តែដោយគម្រោងសាងសង់អាកាសយានដ្ឋានអន្តរជាតិសៀមរាប ជាគម្រោងដែលធំជាងគេ ខេត្តយូណាន បានស្នើដល់រដ្ឋបាលខេត្តសៀមរាប ដូចជាការសម្របសម្រួលអោយមានការផ្គត់ផ្គង់ទឹក ភ្លើង បណ្តាញលូបង្ហូរទឹកខ្វក់ និងប្រពន្ធទូរគមនាគមន៍ ដើម្បីធ្វើយ៉ាងណាឱ្យដំណើរការ នៃការសាងសង់អាកាសយានដ្ឋាននេះប្រព្រឹត្តទៅដោយរលូន។ ម្យ៉ាងវិញទៀត សូមរដ្ឋបាលខេត្តសម្របសម្រួល ដល់ការនាំចូលសម្ភារៈផ្សេងៗ និងការផ្ទេរទីតាំងពីអាកាសយានដ្ឋានចាស់ មកអាកាសយានដ្ឋានថ្មីផងដែរ។
ព័ត៌មានជាតិ ថ្មីៗ
ឆ្លើយតបនឹងសំណើនេះ លោក លី សំរិទ្ធ អភិបាលរងខេត្ត បានមានប្រសាសន៍ថា សំណើរបស់ឯកឧត្តម មួយចំនួន គឺស្ថិតក្នុងសមត្ថកិច្ចរបស់ថ្នាក់ជាតិ និងខ្លះទៀតជាសមត្ថកិច្ចរបស់ថ្នាក់ក្រោមជាតិ(ថ្នាក់ខេត្ត) តែទោះជាយ៉ាងណា រាជរដ្ឋាភិបាលបានបង្កើតគណៈកម្មការតម្រង់ទិស ការងារសាងសង់អាកាសយានដ្ឋានអន្តជាតិសៀមរាបអង្គរ ដែលគណៈកម្មការនេះ បាននិងកំពុងសិក្សាលើគម្រោងនេះយ៉ាងសកម្ម។ ទន្ទឹមនឹងនេះ រដ្ឋបាលខេត្តក៏បានបង្កើតអនុគណៈកម្មការថ្នាក់ខេត្តមួយផងដែរដើម្បីសហការធ្វើកិច្ចការនេះ។ លោកអភិបាលរងខេត្តសៀមរាបបានបន្តថា គម្រោងនេះ គឺជាគម្រោងមួយដែលប្រជាពលរដ្ឋកម្ពុជាបានដឹង ហើយពួកគាត់ក៏បានអបអរសាទរយ៉ាងខ្លាំង ដែលគម្រោងនេះ នឹងជួយជម្រុញដល់ការលើកកម្ពស់សេដ្ឋកិច្ចសង្គម ដើម្បីអភិវឌ្ឍន៍ខេត្ត ក៏ដូចជាទូទាំងព្រះរាជានាចក្រកម្ពុជា។
ខណៈនោះដែរ ឯកឧត្តមអភិបាលរងខេត្តយូណានក៏បានមានប្រសាន៍ថា គម្រោងនេះ ក៏ជាគម្រោងមួយដ៏មានសារសំខាន់សម្រាប់ប្រជានជនខេត្តយូណានផងដែរ ហើយឯកឧត្តម នឹងខិតខំគៀងគរវិនិយោគិន និងក្រុមហ៊ុន សហគ្រាស ទាំងធំទាំងតូចដើម្បីមកធ្វើការវិនិយោគនៅខេត្តសៀមរាបនេះ។
អត្ថបទ ៖ លោក ស៊ាង សុផាត
