ខេត្តសៀមរាបថ្ងៃទី ០៨ ខែ ធ្នូ ឆ្នាំ២០១៩-ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា បានថ្លែងបើកទិវារត់ពាក់កណ្តាលម៉ារ៉ាតុងអន្តរជាតិលើទី២៤ឆ្នាំ២០១៩នៅមុខប្រាសាទអង្គរខេត្តសៀមរាប នៅព្រឹកថ្ងៃទី ០៨ ខែ ធ្នូ ឆ្នាំ២០១៩នេះថា ព្រឹត្តិការណ៍រត់ពាក់ កណ្តាលម៉ារ៉ាតុងអន្តរជាតិលើទី២៤ឆ្នាំ២០១៩នៅអង្គរឆ្នាំនេះមានអ្នកចូលរួមចំនួន១២១៧៥ នាក់ មកពី៨៥ប្រទេស បើធៀបនឹងកាលឆ្នាំ២០១៨ គឺមានការឡើងប្រមាណ២០% ហើយដែលចូលរួមច្រើនជាងគេ គឺជនជាតិអង់គ្លេស ជប៉ុន អាមេរិក អូស្រ្តាលី បារាំង និងប្រជាជនកម្ពុជាមានចំនួន៧ពាន់នាក់
ឯកឧត្តមបានចាត់ទុកកំណើនអ្នកចូលរួមឆ្នាំនេះ គឺជាជោគជ័យថ្មីមួយទៀត ដើម្បីឈានទៅរកភាពល្បីល្បាញលើពិភពលោក ។ ឯកឧត្តមថា «តាមរយៈភាពរីកចម្រើនយ៉ាងឆាប់រហ័យនៃព្រឹត្តិការណ៍កីឡាទេសចរណ៍នេះ បានធ្វើចក្ខុវិស័យ និងទិសដៅរបស់ក្រសួងទេសចរណ៍ ក៏ដូចជាគណៈកម្មាធិការជាតិអូឡាំពិកកម្ពុជា គឺកំពុងទទួលបានជោគជ័យជាបណ្ដើរៗហើយឈានទៅដល់កម្រិតល្បីល្បាញទូទាំងពិភពលោកកាន់តែខ្លាំងថែមទៀតនាថ្ងៃខាងមុខ»។ ហើយចំពោះទិវារត់ប្រណាំងអន្ដរជាតិពាក់កណ្ដាលម៉ារ៉ាតុងនេះ ចំនួនអ្នកចូលរួម និងមានការកំណើន ជារៀងរាល់ឆ្នាំនេះ គឺដោយសារពួកគេឃើញកម្ពុជាមានសន្ដិភាព និងការអភិវឌ្ឍន៍ ពិសេសការរៀបចំស្របតាមស្ដង់ដារអន្ដរជាតិ មានការយកចិត្តទុកដាក់ខ្ពស់លើភ្ញៀវទេសចរ និងការផ្ដល់នូវសុវត្ថិភាព សម្រាប់ការចូលរួមទៀតផង ជាពិសេសការរៀបចំព្រឹត្តិការណ៍នេះមានការកំណត់ពេលវេលាច្បាប់លាស់។ ឯកឧត្តមបានបញ្ជាក់ថា នៅឆ្នាំ២០២០ ព្រឹត្តិការណ៍រត់ប្រណាំងអន្ដរជាតិពាក់កណ្ដាលម៉ារ៉ាតុងនេះ បានសម្រេចជ្រើសរើសយកថ្ងៃទី០៦ខែធ្នូឆ្នាំ២០២០ ដូច្នេះអ្នកចូលរួមជាតិ និងអន្តរជាតិ គេអាចរៀបចំខ្លួន និងពេលវលាមកចូលរួមសប្បាយបានកាន់តែច្រើន។
គួរបញ្ជាក់ថា ទិវារត់ប្រណាំងអន្ដរជាតិពាក់កណ្ដាលម៉ារ៉ាតុងឆ្នាំនេះ គឺមាន ៤វិញ្ញាសារួមមានរត់ ២១គីឡូម៉ែត្រ, ១០គីឡូម៉ែត្រ, ៥គីឡូម៉ែត្រ និងរត់កម្សាន្ដ ៣គីឡូម៉ែត្រ ។ គោលបំណង នៃការរៀបចំព្រឹត្តិការណ៍នេះ គឺដើម្បីធ្វើផ្សព្វផ្សាយពីតំបន់ទេសចរប្រវត្តិសាស្ដ្រកម្ពុជា ទាក់ទាញកំណើនទេសចរ និងផ្សាភ្ជាប់ជាមួយការងារសង្គម ដោយថវិកាទទួលបានពីការរៀបចំ នឹងត្រូវបរិច្ចាគជួយដល់មន្ទីរពេទ្យកុមារ កាកបាទក្រហមកម្ពុជា អង្គការកុមារកំព្រា និងជនពិការដោយសារគ្រាប់មីនជាដើម៕
អត្តបទ៖ឃុត សៅ
រូបភាព៖ខេងឧត្ដម
