ឯកឧត្តមប្រធានគណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែគិតគូរចំពោះសុខទុក្ខប្រជាពលរដ្ឋគ្រប់រូបមិនប្រកាន់វណ្ណៈ ពណ៌សម្បុរ សាសនា ឬនិន្នាការនយោបាយអ្វីឡើយ ដូចដែលបានលើកឡើងថា ទីណាមានទុក្ខលំបាក ទីនោះមានកាកបាទក្រហមកម្ពុជា។
ឯកឧត្តមបានបង្ហាញនូវការសោកស្តាយ យ៉ាងខ្លាំង ចំពោះឧបទ្ទេវហេតុបាក់អគារសាលាឆាន់ នៅវត្តប្រាសាទគោកចកនេះ ដែលករណីនេះគ្មានអ្នកណាចង់ឱ្យកើតឡើងទេ ហេតុនេះមានតែសូមជូនពរបងប្អូនឆាប់បានជាសះស្បើយ ដើម្បីវិលត្រលប់ទីលំនៅស្ថានវិញ និងប្រកបរបរចិញ្ចឹមជីវិតបន្តទៀត។
អំណោយមនុស្សធម៌ដែលផ្ដល់ជូនម្នារួមមាន៖ – អ្នករបួសធ្ងន់៖ មុង១ ភួយ១ សារុង១ ក្រមា១ មី១កេស ត្រីខ១យួរ ទឹកដោះគោខាប់២កំប៉ុង ស្ករស១គីឡូក្រាម ទឹកបរិសុទ្ធ២កេស អង្ករ៦០គីឡូក្រាម និងថវិកា១លានរៀល។
– អ្នករបួសស្រាល៖ មុង១ ភួយ១ សារុង១ ក្រមា១ មី១កេស ត្រីខ១យួរ ទឹកដោះគោខាប់២កំប៉ុង ស្ករស១គីឡូក្រាម ទឹកបរិសុទ្ធ២កេស អង្ករ៦០គីឡូក្រាម និងថវិកាប្រាំសែនរៀល។
នៅថ្ងៃម្សិលមិញនេះដែរ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានដឹកនាំក្រុមប្រតិបត្តិសាខា នាំយកទេយ្យវត្ថុចូលរួមរំលែកមរណទុក្ខគ្រួសារសព២គ្រួសារដែលរងគ្រោះស្លាប់ក្នុងឧបទ្ទេវហេតុបាក់អគារធម្មសភានៅវត្តប្រាសាទគោកចក
ទី១. សពលោក ឡន ឡោះ អាយុ ៤១ឆ្នាំ កំពុងប្រារព្ធធ្វើបុណ្យនៅវត្តពួក ឃុំពួក ស្រុកពួកខេត្តសៀមរាប ២. សពលោក យិន សំណាង អាយុ៣៥ឆ្នាំ កំពុងប្រារព្ធធ្វើបុណ្យនៅភូមិថ្មី ឃុំខ្ចាស់ ស្រុកសទ្រនិគមន ខេត្តសៀមរាប។ ទេយ្យវត្ថុចូលរួមបុណ្យមាន៖ មុង១ ភួយ១ សារុង១ ក្រមា១ មី១កេស ត្រីខ១យួរ ទឹកដោះគោខាប់២កំប៉ុង ស្ករស១គីឡូក្រាម ទឹកបរិសុទ្ធ២កេស អង្ករ៦០គីឡូក្រាម និងថវិកា១លានប្រាំសែនរៀល។
សូមបញ្ជាក់ថា៖ហេតុការណ៍មួយបានកើតឡើងនៅអំឡុងម៉ោង ១៤៖១៥នាទី រសៀលថ្ងៃទី២ខែធ្នូឆ្នាំ២០១៩ បណ្តាលឱ្យមនុស្ស ស្លាប់៣នាក់ និងរបួសធ្ងន់ស្រាល១៣នាក់ ក្នុងនោះមានព្រះសង្ឃពីរអង្គផង នេះបើតាមរបាយការណ៍ របស់អ្នកនាំពាក្យរដ្ឋបាលខេត្តសៀមរាប។មនុស្សស្លាប់និងរបួសនេះ បណ្តាលមកពីបាក់សំណង់ការដ្ឋានអគារឧបដ្ឋានសាលា (សាលាឆាន់)ស្ថិតក្នុងវត្តគោកចក ក្នុងភូមិគោកចក សង្កាត់គោកចកក្រុងសៀមរាបខេត្តសៀមរាប ខណៈដែលបានចាក់បេតុងពិដានប្លង់សេមួយសន្លឹក ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាព រដ្ឋបាលខេត្តសៀមរាប បានដឹកនាំកម្លាំងចម្រុះ រួមមាន កងកម្លាំងប្រដាប់អាវុធ ព្រះសង្ឃ ប្រជាការពារ និងប្រជាពលរដ្ឋចូលរួមសរុបចំនួន ៧៥០អង្គ/នាក់ ចូលរួមដោយស្ម័គ្រចិត្ត និង រថយន្តសង្គ្រោះ គ្រឿងចក្រ រថយន្តស្ទូច រថយន្តពន្លត់អក្គីភ័យ អេស្ការ រថយន្តចល័ត បានរើកកាយគំនរបាក់បែកដើម្បីស្វែងរកជនរងគ្រោះយកទៅសង្គ្រោះបន្ទាន់
អត្ថបទ និងរូបភាព៖ យូ វង្ស
