រាជរដ្ឋាភិបាលប្រទេសជប៉ុន បានសម្រេចផ្ដល់ជំនួយថវិកាជិត២លាន (១,៧៩៩,៨៥០ដុល្លា) ដើម្បីគាំទ្រដល់ដំណើរការ មជ្ឍមណ្ឌលសកម្មភាពកំចាត់មីននៅកម្ពុជា រយៈពេល៦ខែ ចាប់ពីថ្ងៃទី០១ខែមករា ដល់ថ្ងៃទី៣០ ខែមិថុនា ឆ្នាំ២០២០ខាងមុខនេះ។
នេះបើតាមប្រសាសន៍ ឯកឧត្ដម ហេង រតនា អគ្គនាយកស៊ីម៉ាក់ ក្នុងឱកាសដំណើរទស្សនកិច្ច ឯកអគ្គរាជទូតថ្មី នៃប្រទេសជប៉ុនប្រចាំប្រទេសកម្ពុជា ឯកឧត្តម មីកាមី ម៉ាសាហ៊ីរ៉ូ (MIKAMI Masahiro) ទៅកាន់សារមន្ទីរសន្ដិភាពសកម្មភាពកំចាត់មីនខេត្ដសៀមរាប មានទីតាំងស្ថិតនៅតាមបណ្តោយផ្លូវជាតិលេខ ៦ ក្នុងឃុំត្រពាំងធំ ស្រុកប្រាសាទបាគង ខេត្តសៀមរាប កាលពីល្ងាចថ្ងៃទី២ខែធ្នូ ឆ្នាំ២០១៩ម្សិលមិញនេះ។
ឯកឧត្ដម ហេង រតនា បានបញ្ជាក់ថា ជំនួយថវិកាជិត២លាន របស់រាជរដ្ឋាភិបាលប្រទេសជប៉ុន តាមរយៈក្រសួងសេដ្ឋកិច្ចនិងហិរញវត្ថុកម្ពុជា នឹងគាំទ្រដល់ដំណើរការ បោសសំអាតមីនរបស់អង្គការស៊ីម៉ាក់ លើផ្ទៃដីចំការមីននៅស្រុកចំនួន៥ក្នុងខេត្ដបាត់ដំបង ដែលរួមមាន ជំនាញអ្នក និងគ្រឿងចក្រដោះមីនផងដែរ។
ព័ត៌មានជាតិ ថ្មីៗ
ឯកឧត្ដមបានបន្ដថា រដ្ឋាភិបាលជប៉ុន ក៏មានគម្រោងផ្ដល់ថវិកានេះ ជាជំនួយដំណាក់កាលទី២បន្ថែមទៀត ដែលមានទឹកប្រាក់ជិត១០លានដុល្លារ ក្នុងដំណើរសំអាតមីនក្នុងរយៈពេល២ឆ្នាំ នាខាងមុខទៀត។
បើតាមប្រសាសន៍ ឯកឧត្តម មីកាមី ម៉ាសាហ៊ីរ៉ូ (MIKAMI Masahiro) ឯកអគ្គរាជទូតថ្មី នៃប្រទេសជប៉ុនប្រចាំប្រទេសកម្ពុជា បានលើកឡើងថា សារមន្ទីរសន្ដិភាពសកម្មភាពកំចាត់មីនខេត្ដសៀមរាប គឺជាភស្តុតាងជាក់ស្ដែង ដែលរាជរដ្ឋាភិបាលកម្ពុជា បានខិតខំក្នុងការផ្ដល់សុខសន្ដិភាពជូនប្រជាពលរដ្ឋ និងចៀសផុតពីសោកនាដកម្មដែលបន្សល់ទុកពីសង្គ្រាមអតីតកាល ដោយសារគ្រាប់មិនទាន់ផ្ទុះ និងគ្រាប់មីន។
ឯកឧត្ដម ក៏បានថ្លែងអំណរគុណ ចំពោះរាជរដ្ឋាភិបាលនិងប្រជាជនជប៉ុន ដែលបានផ្ដល់ថវិកាគាំទ្រលើការបោសសំអាតមីនរបស់ស៊ីម៉ាក់ នៅកម្ពុជា។
សូមជម្រាបថា ចាប់ពីឆ្នាំ១៩៩៤ មកដល់ពេលបច្ចុប្បន្ននេះ រាជរដ្ឋាភិបាលប្រទេសជប៉ុន បានជួយជាថវិកាគាំទ្រដល់អង្គការស៊ីម៉ាក់ក្នុងការដំណើរការបោសសម្អាតមីនៅកម្ពុជាប្រមាណជាង១០០លានដុល្លារ ហើយនឹងបានជួយទាំងសម្ភារៈនិងបរិក្ខាសម្រាប់បោសសម្អាតមីននៅកម្ពុជាជាច្រើនទៀតផងដែរ៕
អត្ថបទ និង រូបភាព៖ បូ សាវី
កែសម្រួលអត្ថបទ៖ សេង ផល្លី
