នៅម៉ោងប្រមាណ១ទៀបភ្លឺថ្ងៃទី០៣ខែធ្នូ ឆ្នាំ២០១៩ការកកាយរកនិងជួយសង្គ្រោះដល់ជនរងគ្រោះដោយសារការបាក់រលំការដ្ឋានសាងសង់សាលាធម្មសភានៅវត្តប្រាសាទគោកចក ស្ថិតនៅភូមិវាល សង្កាត់គោកចក ក្រុងសៀមរាប ខេត្តសៀមរាបត្រូវបានបញ្ចប់។
តាមរយៈសាធារណមតិ បានលើកឡើងថា ឧបទ្ទេវហេតុនេះ អាចកើតឡើងបណ្ដាលមកពី ការតម្លើងការដ្ឋានមានរយៈពេលយូរ ដោយពុំមានបច្ច័យគ្រប់គ្រាន់ក្នុងការកសាងបន្ត ដោយបន្សល់ទុកនូវឈើទម្រ ក្ដារពុម្ពចោល ជាបណ្ដោះអាសន្នសិន លុះទទួលបានបច្ច័យបន្ថែមពីពុទ្ធបរិស័ទ ទើបគណៈកម្មការវត្តបន្តសាងសង់បន្តទៀត។
តាមការរយៈរបាយការណ៍ ស្នងការដ្ឋាននគរបាលខេត្តសៀមរាប ជនរងគ្រោះដែលបានធ្លាក់ទៅក្នុងគំនរសំណង់ មានចំនួនសរុបចំនួន១៦អង្គ/នាក់ ក្នុងនោះ របួសធ្ងន់ ៣នាក់ របួសស្រាល ១០អង្គ/នាក់ និងមនុស្សចំនួន ៣នាក់បានទទួលមរណភាពនៅក្នុងឧបទ្ទេវហេតុនោះ។
តាមរបាការណ៍ដដែលនេះ បានឲ្យដឹងថា ជនរងគ្រោះរបួសធ្ងន់ និងស្រាល កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប និងមន្ទីរពេទ្យឯកជនមួយកន្លែងក្នុងខេត្តសៀមរាប។
សូមរំលឹកថា ឧបទ្ទេវហេតុ បាក់រលំអគារការដ្ឋានសាងសង់សាលាធម្មសភានៅវត្តប្រាសាទគោកចកនេះ បានកើតឡើងនៅវេលម៉ោង ០២៖១៥នាទីរសៀល ថ្ងៃទី០២ ខែធ្នូ ឆ្នាំ២០១៩។ ការសង្គ្រោះបានប្រើប្រាស់មធ្យោបាយសរុបរួមមាន ៖
– កម្លាំងប្រដាប់អាវុធ ព្រះសង្ឃ ប្រជាការពារ និងប្រជាពលរដ្ឋចូលរួមសរុប ៧៧៥អង្គ/នាក់
– ប្រើប្រាស់រថយន្តសង្រ្គោះ ចំនួន ០៩គ្រឿង
– គ្រឿងចក្រមធ្យោបាយសង្រ្គោះ រួមមាន រថយន្តពន្លត់អគ្គិភ័យ ០២គ្រឿង រថយន្តស្ទូច ០៣គ្រឿង អេស្កាវ៉ាទ័រ ០៤គ្រឿង រថយន្តអគ្គិសនីចល័ត ០១គ្រឿង ។
អត្ថបទ៖ សេង ផល្លី
រូបភាព៖ បូ សាវី
