នៅចុងឆ្នាំ២០១៩នេះ មន្ទីរពេទ្យកុមារអង្គរខេត្តសៀមរាប ជួបកង្វះខាតថវិកាប្រមាណជា ៧ម៉ឺនដុល្លា ដើម្បីប្រតិបត្តិការមនុស្សធម៌ ពិនិត្យព្យាបាលជម្ងឺកុមារដោយឥតគិតថ្លៃ គម្រោងរៀបចំរាត្រីសមោ.ស សប្បុរសធម៌ ឆ្លងឆ្នាំសាកល ២០១៩-២០២០ មានបំណងរៃអង្គាសថវិកា រួមចំណែកទ្រទ្រង់ដល់មន្ទីរពេទ្យកុមារមួយនេះ។
នេះបើតាមប្រសាសន៍ លោក អ៊ឹមផាន មលីវណ្ណ នាយកសាខាហាងជាង បាក់វណ្ណហុង លក់គ្រឿងអលង្ការប្រចាំខេត្តសៀមរាប បានលើកឡើងនៅក្នុងសន្និសីទសារព័ត៌មាន នារសៀលថ្ងៃទី១៣ ខែធ្នូ ឆ្នាំ២០១៩ ស្តីពីគម្រោងរៀបចំរាត្រីសមោ.ស សប្បុរសធម៌នោះ នៅសណ្ឋាគារមេម័រផាលេស ក្នុងក្រុងសៀមរាប។
លោក អ៊ឹមផាន មលីវណ្ណ បានបញ្ជាក់ថា រាត្រីសមោ.ស សប្បុរសធម៌នេះ គឺមានបំណងបំផុសចលនាក្នុងវិស័យឯកជន ឲ្យចូលរួមក្នុងសកម្មភាពជួយសង្គម ហើយមើលឃើញកាន់ជ្រៅអំពីឧត្តមប្រយោជន៍ក្នុងការប្រើប្រាស់សិល្បៈនៃការចែករំលែក ដែលជាអានុសាសន៍ដ៏ខ្ពង់ខ្ពស់នៃសម្តេចតេជោ ប្រមុខនៃរាជរដ្ឋាភិបាលកម្ពុជា បើទោះជាក្នុងផ្នែកណាមួយក៏ដោយ ជាពិសេសគឺចំពោះមុខ ដែលយល់ឃើញថា ជាតម្រូវការចាំបាច់របស់សង្គម និងជាគោលដៅដែលមិនអាចមើលរំលងបាន ។
ព័ត៌មានជាតិ ថ្មីៗ
លោក សេង សេរីវុឌ្ឍ តំណាងសណ្ឋាគារ មេម័រផាលេស លើកឡើងថា នៅក្នុងព្រឹត្តិការណ៍នោះ ក៏មានកម្មវិធីសប្បាយៗ ទស្សនីយភាពប្លែកៗ ជាមួយនឹងការប្រគុំតន្រ្តីស្គរដៃដែលសម្ដែងដោយក្រុមសិល្បៈករ សិល្បៈការិនី (Cambodia Living Art) ដោយលើកយកទម្រង់ទស្សនីយភាពដង្ហែព្រះបាទជ័យវរ្ម័នទី៧ របាំភោគផល និងក្បាច់គុណល្បុក្កតោខ្មែរ បន្ថែមពីនេះមានរៀបចំទទួលទានអាហារ និង ភេសជ្ជៈបែបខ្មែរ ដែលមានប្រភពមកពីតំបន់នានាក្នុងខេត្តសៀមរាប។ លោកបានបញ្ជាក់ដែរថា នេះមិនមែនជាលើកដំបូងទេ ដែលសណ្ឋាគារ មេម័រ ផាលេស បានរៀបចំកម្មវិធីសប្បុរសធម៌ដើម្បីចូលរួមជួយដល់សង្គម ។
នៅក្នុងកម្មវិធី នឹងមានការលក់សំបុត្រចូលរួមកំសាន្ត ក្នុងម្នាក់តម្លៃ ១៨០ដុល្លារ ហើយថវិកាដែលប្រមូលបានមកពីការលក់សំបុត្រ ត្រូវបានបែងចែក រាប់បញ្ជូលក្នុងមូលនិធិសប្បុរសធម៌មន្ទីរពេទ្យកុមារអង្គរ ។ ក្នុងនោះ ក៏មានការដាក់តាំងបង្ហាញនិងលក់គ្រឿងអលង្ការ ត្បូង ពេជ្រ ដើម្បីលើកស្ទួយតម្លៃស្នាដៃកូនខ្មែរ ដែលមិនមែននាំចូលពីបរទេស ។ ចំពោះថវិកា ដែលបានមកពីការលក់គ្រឿងអលង្ការទាំងនោះ ក៏នឹងត្រូវបានបែងចែកចូលក្នុងមូលនិធិសប្បុរសធម៌មន្ទីរពេទ្យកុមារអង្គរផងដែរ ។
អ្នកស្រី ស៊ិនកេត អារុណ តំណាងមន្ទីរពេទ្យកុមាអង្គរ ខេត្តសៀមរាប បានឲ្យដឹងថា ៖ ក្នុង១ឆ្នាំៗ មន្ទីរពេទ្យកុមារអង្គរ មានតម្រូវការថវិកាប្រមាណជា ៦លាន ៥សែនដុល្លា ដើម្បីប្រតិបត្តិការមនុស្សធម៌ ជួយសង្គ្រោះសុខភាព និងជីវិតកុមារកម្ពុជាមកពីគ្រប់ទិសទី ចេញពីជំងឺបៀតបៀនដោយឥតគិតថ្លៃ រួមទាំងបំពេញបេសកកម្មបណ្តុះបណ្តាលធនធានមនុស្សក្នុងវិស័យសុខាភិបាលលើជំនាញជំងឺកុមារ និងការអប់រំសុខភាពនៅតាមបណ្តាសហគមន៍ប្រជាពលរដ្ឋក្នុងខេត្ត ផងដែរ ។ ប្រភពថវិកាទាំងនោះ គឺបានមកពីចលនាសប្បុរសធម៌ទាំងក្នុងនិងក្រៅប្រទេស និងជំនួយរបស់រាជរដ្ឋាភិបាលកម្ពុជា ។ អ្នកស្រី ក៏បានរំលឹកថា សម្រាប់ចុងឆ្នាំ២០១៩នេះ មន្ទីរពេទ្យកុមារអង្គរ នៅខ្វះថវិកាប្រមាណជា ៧ម៉ឺនដុល្លា ដើម្បីទ្រទ្រង់ប្រត្តិបត្តិការរបស់ខ្លួន៕
អត្ថបទ និង រូបភាព ៖ ងិន គឹឡេង និង យូ វង្ស
កែសម្រួលអត្ថបទ៖ សេង ផល្លី
