ថ្ងៃទី១៥ ខែធ្នូ ឆ្នាំ២០១៩នេះ ប្រជាពលរដ្ឋក្នុងស្រុកក្រឡាញ់ ខេត្តសៀមរាបជាង ២ពាន់នាក់ ក្នុងនោះរួមទាំងកុមារផង បានទទួលការពិនិត្យពិគ្រោះ និងព្យាបាលជំងឺ ដោយមិនគិតថ្លៃ នៅមណ្ឌលសុខភាពស្នួល ក្នុងស្រុកក្រឡាញ់ ខេត្ដសៀមរាប។
សកម្មភាពមនុស្សធម៌នេះ មានការចូលរួមពីមន្ទីរសុខាភិបាលខេត្ដសៀមរាប សហការជាមួយ ក្រុមយុវជនសហភាពសហព័ន្ធយុវជនកម្ពុជា ខេត្តសៀមរាប មន្ទីរពេទ្យកុមារអង្គរ និងក្រុមគ្រូពេទ្យមកពីប្រទេសចិន ក្នុងគោលបំណង ថែរក្សាសុខភាពដល់ប្រជាពលរដ្ឋ និងកុមារនៅតាមជនបទ និងកាត់បន្ថយការចំណាយលើការថែទាំសុខភាពជាដើម។ល។
លោក ក្រុស សារ៉ាត់ ប្រធានមន្ទីរសុខាភិបាលខេត្ដសៀមរាប បានបញ្ជាក់ថា រយៈពេលមួយថ្ងៃនេះ ប្រជាពលរដ្ឋក្មេងចាស់ ជាង២ពាន់នាក់ បានមកទទួល ការពិនិត្យពិគ្រោះ និងព្យាបាលជំងឺ លើប្រភេទជំងឺទូទៅ ពិនិត្យអេកូ កាត់វែនតា និងជំងឺកូនក្មេងផងដែរ។ ហើយចំពោះអ្នកជំងឺមានសភាពធ្ងន់ធ្ងរ ក្រុមគ្រូពេទ្យនឹងយកពួកគាត់ទៅ ព្យាបាលបន្ដនៅមន្ទីរពេទ្យផ្សេងទៀត ដែលមានរថយន្ដចាំទទួលជាស្រេច។ លើសពីនោះ ក្រុមគ្រូពេទ្យស្ម័គ្រមនុស្សធម៌របស់អគ្គកុងស៊ុលចិន ក៏បានផ្ដល់ ដូចជាភួយ មីកញ្ចប់ និងសម្ភារៈជាច្រើនទៀត ជូនប្រជាពលរដ្ឋដែលកំពុងជួបការខ្វះខាតក្នុងមូលដ្ឋាននេះ។
មានវត្តមានក្នុង ឱកាសនោះ លោក ពិន ប្រាកដ អភិបាលរងខេត្ដសៀមរាប មានប្រសាសន៍ថា សកម្មភាពមនុស្សធម៌នាពេលនេះ វាបានជួយសម្រាលការចំណាយថវិកា លើការថែរក្សាសុខភាព និងថ្លៃថ្នាំពេទ្យ និងថ្លៃមធ្យោបាយធ្វើដំណើរ ព្រមទាំងចំណេញពេលវេលា ដែលទាំងនេះជាតម្រូវការចាំបាច់។ ដោយឡែក ការថែរក្សារសុខភាព ហូបស្អាត ផឹកស្អាត និងរស់នៅប្រកបដោយអនាម័យ នៅតែមិនអាចចៀសបាន ដើម្បីធ្វើឲ្យសុខភាពរបស់ហើយទាំងអស់គ្នាកាន់តែល្អប្រសើរឡើង។
សូមជម្រាបថា នេះជាលើកទី១៤ហើយ ដែលក្រុមគ្រូពេទ្យស្ម័គ្រចិត្ត បានចុះផ្ដល់សេវាពិគ្រោះ ពិនិត្យ និងព្យាបាលសុខភាពជូនប្រជាពលរដ្ឋ និងកុមារនៅតាមតំបន់ជនបទក្នុងខេត្តសៀមរាប។
អត្ថបទ និង រូបភាព ៖ បូ សាវី
កែសម្រួលអត្ថបទ៖ សេង ផល្លី
