អាជ្ញាធរហ្វីលីពីនបានឱ្យដឹងនៅរសៀលថ្ងៃចន្ទនេះថា គ្រោះរញ្ជួយដីកម្រិតធ្ងន់ដែលបានវាយប្រហារលើកោះមិនដាណាវ ភាគខាងត្បូងនៃប្រទេសកាលពីថ្ងៃអាទិត្យ ម្សិលមិញនេះ បានបណ្ដាឱ្យមនុស្សស្លាប់កើនដល់ 0៧នាក់ហើយ និងមនុស្ស ៣៧នាក់ផ្សេងទៀតរងរបួស ខណៈអគារមួយចំនួនបានដួលរលំ និងអាចមានមនុស្សកំពុងជាប់ខ្លួនក្នុងនោះផងដែរ។ នេះបើតាមការចេញផ្សាយដោយ Sputnik នៅរសៀលថ្ងៃចន្ទ ទី១៦ ខែធ្នូ ឆ្នាំ២០១៩។
យោងតាមទីភ្នាក់ងារឃ្លាំមើលគ្រោះរញ្ជួយដីអាមេរិក USGS គ្រោះរញ្ជួយដីកម្រិតធ្ងន់ ៦.៨រ៉ិចទ័របានវាយប្រហារលើតំបន់ ក្បែរទីក្រុង ដាវ៉ៅ (Davao) នៃកោះមិនដាណាវ ហើយវាក៏ជាលើកទី ៥ ផងដែរគិតចាប់តាំងពីខែតុលា។ គ្រោះរញ្ជួយដីនេះ មានជម្រៅរញ្ជួយទៅក្នុងដី ២៨.២គីឡូម៉ែត្រ និងមានចំណុចរញ្ជួយនៅ ចំងាយ ៦១គីឡូម៉ែត្រពីភាគនិរតីពីតំបន់ឆ្នេរនៃទីក្រុង Davao។
អាជ្ញាធរហ្វីលីពីនបានបញ្ជាក់នៅថ្ងៃចន្ទនេះទៀតថា ក្រុមសង្គ្រោះបានព្យាយាមគាស់កកាយហាងលក់ទំនិញបាក់រលំមួយ នៅក្នុងក្រុងផាដាដា (Padada) នៃកោះមិនដាណាវ ទើបរកឃើញសាកសពបន្ថែមទៀត។
