ឆ្នាំ២០១៩ គិតត្រឹមខែវិច្ឆិកា បទល្មើសពាក់ព័ន្ធទៅនឹងច្បាប់ ស្តីពីការជួញដូរមនុស្សនិងអាជីវកម្មផ្លូវភេទ មានសំណុំរឿងចំនួន៤៨ករណី ក្នុងនេះមានចំណាត់ការរួចហើយចំនួន ២៧សំណុំរឿង និង២១សំណុំរឿងទៀត កំពុងមានចំណាត់ការ។
នេះបើតាមសេចក្ដីរាយការណ៍របស់ លោកស្រី យូ សុភា អភិបាលរងខេត្តសៀមរាប និងជាប្រធានលេខាធិការដ្ឋាន គណកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស នៅក្នុងទិវាជាតិ ប្រយុទ្ធប្រឆាំង អំពើជួញដូរមនុស្ស ១២ធ្នូ លើកទី១៣ នាព្រឹកថ្ងៃទី១៦ ខែធ្នូ ឆ្នាំ២០១៩ នៅក្នុងខេត្តសៀមរាប។
ព្រឹត្តិការណ៍នេះ មានអ្នកចូលរួមជាង ១ពាន់នាក់ ព្រឹត្តិការណ៍នេះដែរ វាបានបង្ហាញពីជំហរ របស់ រាជរដ្ឋាភិបាលកម្ពុជា អំពីយកចិត្តទុកដាក់កាន់តែខ្លាំងថែមទៀត ក្នុងការការពារប្រជាពលរដ្ឋ និងប្រទេសជាតិ ពីភាពងាយរងគ្រោះទាំងឡាយ ដោយឧក្រិដ្ឋកម្ម ជួញដូរមនុស្ស។
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស មានប្រសាសន៍ថា ៖ នៅក្នុងសម័យកាលនេះ ទូទាំងពិភពលោកកំពុងតែមានក្តីបារម្ភចំពោះអំពើជួញដូរមនុស្ស ដែលបចុប្បន្ននេះបានក្លាយជាទាសភាពសម័យទំនើប គួរឲ្យភ័យខ្លាចនិងស្អប់ខ្ពើម ។ មានជនរងគ្រោះខ្លះ ត្រូវបានចំណាយកម្លាំងពលកម្មរបស់ខ្លួន បម្រើនិយោជក ឬបម្រើថៅកែ ស្ទើរមួយជីវិត ដោយមិនបានទទួលផលកម្រៃអ្វីទាល់តែសោះ ទីបំផុតពេលត្រឡប់មកស្រុកកំណើតវិញ បាននាំមកនូវភាពពិការ ទាំងបាត់បង់សមត្ថភាពពលកម្ម កាយ ស្មារតី រហូតដល់បាត់បង់ជីវិតក៏មាន។ អំពើព្រៃផ្សៃទាំងនោះ ហាក់ដូចជាស្ថិតក្នុងអាថ៌កំបាំង បើសិនជាយើងមិនបានស្តាប់ការរៀបរាប់របស់ជនរងគ្រោះទេនោះ ។
លោកជំទាវមានប្រសាសន៍ថា ការប្រារព្ធទិវាជាតិប្រយុទ្ធប្រឆាំងអំពើជួញដូរមនុស្ស គឺស្ថិតក្នុងគោលបំណងបញ្ជាក់ជូនជនរួមជាតិ និងសហគមន៍អន្តរជាតិថា រាជរដ្ឋាភិបាលកម្ពុជា នៅតែយកចិត្តទុកដាក់កាន់តែខ្លាំងឡើងថែមទៀត ក្នុងការការពារប្រជាពលរដ្ឋនិងប្រទេសជាតិ ពីភាពរងគ្រោះទាំងឡាយដោយឧក្រឹដ្ឋកម្មជួញដូរមនុស្ស ៕
អត្ថបទ និង រូបភាព ៖ ងិន គឹមឡេង និង ម៉ី សុខារិទ្ធ
កែសម្រួលអត្ថបទ៖ សេង ផល្ល
