អតីតទីប្រឹក្សាសន្តិសុខជាតិអាមេរិកលោក ចន បូលតុន (John Bolton) នាដើមសប្តាហ៍នេះបានចេញមុខរិះគន់ធ្ងន់ៗ លើគោលនយោបាយរបស់ប្រធានាធិបតីអាមេរិក លោក ដូណាល់ ត្រាំ ពាក់ព័ន្ធកូរ៉េខាងជើង ដោយលោកបានព្រមានថា ប្រទេសនេះគឺជាការគំរាមកំហែងដ៏ធំបំផុតមួយ។ នេះបើតាមការដកស្រង់ការផ្សាយ ចេញពីសារព័ត៌មាន CNA នៅព្រឹកថ្ងៃអង្គារ ទី២៤ ខែធ្នូ ឆ្នាំ២០១៩។
ក្នុងសារមួយបង្ហោះលើបណ្តាញសង្គម Twitter លោក Bolton បានលើកឡើងថា ហានិភ័យចំពោះកងទ័ព និងសម្ព័ន្ធមិត្តរបស់អាមេរិក គឺធំសម្បើមខ្លាំងណាស់ ហើយចាំបាច់តម្រូវឲ្យមានគោលនយោបាយថ្មី ដែលមានប្រសិទ្ធភាពជាងបច្ចុប្បន្ន មុនពេលកូរ៉េខាងជើងមានបច្ចេកវិទ្យាកាន់តែទំនើបខ្លាំងថែមទៀត ដែលអាចបង្កការគំរាមកំហែងកាន់តែអាក្រក់ ចំពោះសហរដ្ឋអាមេរិកទាំងមូល។
លោក Bolton ក៏បានរិះគន់លោក ត្រាំ ផងដែរ ចំពោះការដែលនិយាយថា ការធ្វើតេស្តមីស៊ីលរយៈចម្ងាយខ្លីរបស់កូរ៉េខាងជើងកន្លងនេះ មិនជាបញ្ហាធំដុំអ្វីឡើយ។ បើតាមលោក Bolton ការលើកឡើងបែបនេះ ប្រៀបដូចជាមានន័យថា លោក ត្រាំ មិនខ្វាយខ្វល់ពីសុវត្ថិភាពរបស់កងទ័ពអាមេរិក ដែលឈរជើងនៅក្នុងតំបន់ ឬមួយក៏សន្ធិសញ្ញារបស់អាមេរិកជាមួយសម្ព័ន្ធមិត្តរបស់ខ្លួន ដូចជាជប៉ុននិងកូរ៉េខាងត្បូងយ៉ាងដូច្នោះ។
គួរជម្រាបថា លោក John Bolton នេះហើយ គឺជាបុគ្គលដែលបានបង្ហាញការសង្ស័យដោយបើកចំហ ចំពោះកិច្ចប្រជុំកំពូលជាប្រវត្តិសាស្រ្ត រវាងលោក ដូណាល់ ត្រាំ និងប្រមុខដឹកនាំកំពូលរបស់កូរ៉េខាងជើងគឺលោក គីម ជុងអ៊ុន ហើយបានជំរុញឲ្យលោកប្រធានាធិបតីអាមេរិក មានការប្រុងប្រយ័ត្នខ្ពស់។
